Samuweli a Nenli

24 Yehova aahitthikela-tho onanariwa ni atthu a Isarayeli,+ okathi mutthu mmosa aamutumerenrye awe Davidi orowa owiiriha etthu yootakhala atthu a Isarayeli oriki: “Murowe, mwaalepe atthu+ a Isarayeli ni a oYuda”.+ 2 Siiso, mwene aahimuhimeerya Yowabi,+ xeefi a anakhotto, yoowo aarina awe oriki: “Xontte, nviravire mahimo ootheene a Isarayeli, okhuma oDani mpakha oBeri-Xeba,+ ni mwaalepe atthu, wiira kisuwele mwaattelo aya”. 3 Masi, Yowabi aahimwaakhula mwene oriki: “Yehova, Muluku anyu, owuncererye atthu ikwaha 100, nave maitho a pwiyaka mwene yoone eyo. Masi xeeni pwiyaka mwene oniphavela awe opaka etthu ela?”

4 Moolumo a mwene yaari oowerya ovikana moolumo a Yowabi ni moolumo a maxeefi a anakhotto. Siiso, Yowabi ni maxeefi a anakhotto yaahikhuma ohoolo wa mwene anarowa waalepa atthu a Isarayeli.+ 5 Nto, yaahilapuwa muro Yordani ni yaahimaka wAroweri,+ mpantta woolopwana* wa epooma yaari eriyari wa opuro woowaataleya. Nuumala-vo, yaahirowa mpantta wa atthu a oGadi ni a oYazeri.+ 6 Nuumala-vo, yaahirowa oXileyaadi+ ni muttetthe wa oTahitimi-Hodixi, anavira oDani-Yaani, erowaka oSiidoni.+ 7 Moottharelana, yaahirowa mapuro oolipihiwa a oTiiro,+ ni ipooma sootheene sa ahivi+ ni akanaani. Nuumala-vo, yaahiphiya oBeri-Xeba,+ muttetthe onikhala oNegebi+ wa oYuda. 8 Awo yaaheetteetta elapo yootheene, nto yaahitthikela oYerusalemu nuuvira miyeeri 9 ni mahiku 20. 9 Yowabi aahinvahererya mwene nummeru na atthu aalempe awe. Atthu a Isarayeli yaari 800.000 anakhotto ootupa yaakunxe espaata,* nave atthu a oYuda yaari alopwana 500.000.+

10 Masi, murima wa Davidi waanimutthimaka+ nuumala waakontari atthu. Davidi aahimuhimeerya Yehova oriki: “Koottheka vaalupale+ mwaha woopaka etthu ela. Vano, xontte, Yehova, mmulevelele murumeyi anyu,+ okhala wiira oopaka etthu yeelolo”.+ 11 Okathi Davidi aavennye awe voosiisu, Yehova aahilavula ni profeta Gadi,+ yoowo aamutaphulela Davidi itthu ooniheriwa awe ni Muluku. Vano Muluku aahimuhimeerya wiira: 12 “Murowe, mwamuhimeerye Davidi wiira: ‘Etthu onihimya awe Yehova, tiila: “Sookhala ihukhumu iya tthaaru. Muthanle emosa, nto miyo kinoowiirelani yeeyo”’”.+ 13 Siiso, Gadi aahirowa wa Davidi onamuleela wiira: “Exeeni muniphavela anyu? Niireke muniphavela wiira ekhumelele etala mulaponi mwanyu iyaakha 7?+ Wala muniphavela wiira mwaatthyaweke awanani anyu okathi anoolupatthaayani miyeeri miraru?+ Aahiiso muniphavela wiira ekhumelele ekwerere mulaponi mwanyu mahiku mararu?+ Muupuwele saana, nuumala-vo mukileele ele muniphavela anyu wiira kamuleele Muluku okirumme”. 14 Siiso, Davidi aahimuhimeerya Gadi wiira: “Etthu eyo yootepa okixankiha. Halaali nihukhummwe ni Yehova,+ ohiya ni atthu,+ okhala wiira omoriwa wawe ikharari ti wuulupale”.+

15 Moottharelana, Yehova aahaaroihela ekwerere+ atthu a Isarayeli, okhuma voosiisu mpakha okathi aathanlale awe. Nto atthu 70.000 yaahikhwa,+ okhuma oDani mpakha oBeri-Xeba.+ 16 Okathi nlaikha nle nookolenle aya ntata oYerusalemu wiira nipwetexe, Yehova aahiriipiwa murima mwaha wa ehasara ele.+ Nto aahihimeerya nlaikha nle naapwetexa atthu ale wiira: “Vaaphiyerya! Mukuruxe ntata”. Nlaikha na Yehova naari waattamela opuro oneepetthiwa etiriku wa Arauna,+ muyebusi.+

17 Okathi Davidi aawenhe awe nlaikha nle naapwetexa atthu, aahimuhimeerya Yehova wiira: “Ti miyo kitthenke, nave ti miyo kipanke etthu ela yootakhala. Ankhi ipwittipwitthi iya+ siirale-ni? Xontte, mukihukhumu miyo paahi ni atthu a etthoko ya paapa aka”.+

18 Vano Gadi aahirowa wa Davidi nihiku nenle, onamuhimeerya wiira: “Nvenye, mmutekele altaari Yehova, opuro oneepetthiwa etiriku wa Arauna, muyebusi”.+ 19 Siiso, Davidi aahiiwelela moolumo a Gadi, ni aahipaka ele Yehova aamurumme awe. 20 Okathi Arauna anwenhe awe mwene ni arumeyi awe arwaaka ohoolo wawe, moowaakuveya Arauna aahirowa vaari awe mwene, okokhora, uurama mpakha vathi. 21 Arauna aahikoha wiira: “Pwiya aka mwene aarwenleni wa murumeyi awe?” Davidi aahaakhula oriki: “Kaarwenle othuma opuro anyu oneepetthiwa etiriku wiira kimutekele altaari Yehova. Siiso, enoomala-mala ehasara ela enaakhumelela atthu”.+ 22 Masi Arauna aahimuhimeerya Davidi wiira: “Muhalaneke, pwiyaka mwene, nvaheke ele munoona anyu oreerela.* Sookhala ipooyi iya wiira sikhale yoovaha para opahiwa. Vano ethaapwa ela eneepetthaniwa etiriku ni miri iya sinipuruliwa ni ipooyi, murumeeleke ntoko ikhuni wiira mpahe soovaha iyo. 23 Kinnoovahani* itthu iya sootheene mwene”. Arauna aahimuhimeerya mwene oriki: “Yehova, Muluku anyu, ooreeliheni”.

24 Nto, mwene aahimuleela Arauna wiira: “Nnaari, mukileele eperesu wiira kithume opuro ola. Nkikhanle onvaha mikuttho soopahiwa Yehova, Muluku aka, kihilinve etthu”. Siiso, Davidi aahithuma opuro ole weepetthiwa etiriku ni ipooyi iye, olivaka ixeekele* 50 sa eparatha.+ 25 Vano Davidi aahimutekela altaari+ Yehova opuro ole, nave aahivaha mikuttho para opahiwa ni mikuttho sa opatthani. Moottharelana, Yehova aahiiwa ovekelela waya elapo ele,+ nto ehasara ele yaakhumelela Isarayeli yaahimala.