Hagayo

1 Eyaakha ya nenli ya mwene Dario, mweeri wa neethanu na mosa, nihiku noopacerya na mweeri owo, Zorobabeli+ kuvernatoro a oYuda mwaana a Salathiyeli, vamosa ni namukuttho muulupale Yooxuuwa, mwaana a Yehosadaki, yaahileeliwa moolumo a Yehova ni profeta Hagayo,*+ yaahimya wiira:

2 “Etthu onihimya awe Yehova a anakhotto, tiila: ‘Atthu ala anihimya wiira: “Nlelo khophiyale okathi wiira etekiwe* empa* ya Yehova”’”.+

3 Profeta Hagayo+ aahileeliwa-tho moolumo a Yehova yaahimya wiira: 4 “Niireke ola okathi wookhalaka ipa sanyu sooviriheliwa ithaapwa, nlelo empa ela ehononiwe ene?+ 5 Vano etthu onihimya awe Yehova a anakhotto, tiila: ‘Nwehaweheke iphiro sanyu. 6 Nyuwo munnaala ipyo sinceene, masi munihepha vakhaani.+ Munnoolya, masi khamunivona. Munniwurya, masi khamuniphiyeriwa. Munniwara ikuwo, masi khamuniviheriwa. Ole onivara muteko onnihela esalaario awe mmurupani woothaala’”.

7 “Etthu onihimya awe Yehova a anakhotto, tiila: ‘Nwehaweheke iphiro sanyu’.

8 “‘Nwele omwaako, nave muruuhe matera.+ Muteke empa aka,+ yeeyo enrowa okisivela ni okivuwiha’.+ Yehova tonihimya”.

9 “Yehova a anakhotto onihimya wiira: ‘Nyuwo mwaanilipelela itthu sinceene, masi mphwanye vakhaani. Okathi mwaaroihale anyu seiyo vakhaani owannyinyu, miyo kaahimwara-mwarya kiiseelelaka.+ Mwaha wa xeeni? Mwaha woowi empa aka yoohononeya, variki khula mmosa a nyuwo ohaatteliwa muteko okhapelelaka empa awe.+ 10 Tivo erimu eri vasulu vanyu khiyaamoronxe okame, nave etthaya khiyaaruwenrye. 11 Miyo kaahuumiha etthaya anyu ni miyaako sanyu, seiyo saawiirihani osuka ipyo, eviinyu, makhura ni miri. Nyuwo vamosa ni mihuwo sanyu munnihaawa, nave ootheene anyu munnivara muteko mahala’”.

12 Zorobabeli+ mwaana a Salathiyeli,+ vamosa ni namukuttho muulupale Yooxuuwa mwaana a Yehosadaki,+ ni atthu ootheene yaahiwiriyana nsu na Yehova Muluku aya, ni moolumo a profeta Hagayo, okhala wiira Yehova Muluku aya, aahimuruma. Nto atthu yaahipacerya woova mwaha wa Yehova.

13 Vano Hagayo, namitthaka a Yehova, aahaaleela atthu ehapari ela ottharaka etthu aarummwale awe ni Yehova, oriki: “‘Miyo kiri ni nyuwo’,+ onihimya Yehova”.

14 Vano Yehova aahimwiiriha+ kuvernatoro a oYuda Zorobabeli mwaana a Salathiyeli,+ vamosa ni namukuttho muulupale Yooxuuwa+ mwaana a Yehosadaki, ni atthu ootheene wiira apacerye ovara muteko empa ya Yehova a anakhotto, Muluku aya.+ 15 Eyo yiiraneyale nihiku 24 na mweeri wa neethanu namosa, eyaakha ya nenli ya mwene Dario.+