Silempwale ni Luka
9 Yesu aahiwiihana arummwa 12, aavaha owerya wa woomola malaikha ootheene ootakhala+ ni waapenuxa atthu yaawereiwa.+ 2 Nave aahaaruma waalaleerya atthu Omwene wa Muluku, ni waapenuxa aretta. 3 Owo aahaahimeerya wiira: “Muhikuxe etthu mwaarowaka mukwaha anyu, nnakhala ttootto, hata murupa wa yoolya ya mukwaha, nnakhala ephaawu, hata musurukhu.* Nave muhikuxe malaya manli.*+ 4 Khula etthoko eniphiya anyu, mukhaleke vaavo mpakha okathi munikhuma anyu.+ 5 Khula opuro ohinrowa anyu waakheliwa, mwaakhumaka epooma eyo, mutatheke ntthupi na inawu sanyu, ntoko ethoonyeryo yoowi atthu awo aalopoliwa”.*+ 6 Vano, awiixutti yaahirowa mmuttettheni, enalaleya ihapari sooreera ni waapenuxa aretta mapuro ootheene.+
7 Mwene Herodi,* aahiiwa itthu sootheene siiraneya, nto aahixanka vanceene, okhala wiira atthu akina yaahimya wiira Yohani oohihimuxiwa mookhwaani.+ 8 Masi atthu akina yaahimya wiira aari Eliya, nave-tho akina yaahimya wiira aari profeta mmosa a khalai aahihimuxiwe mookhwaani.+ 9 Herodi aahihimya wiira: “Miyo kooruma wiira Yohani iikitthiwe muru.+ Nto, ti pani ola, kiniiwa aka wiira onnipaka itthu iya sootheene?” Tivo, Herodi aaniphavela onweha.+
10 Nuumala arummwa otthika, awo yaahimuleela Yesu itthu sootheene yaapanke aya.+ Nto Yesu aahaakuxa, aaroiha opuro wahaavira-viriwa, epooma ya oBethisaida.+ 11 Okathi mittitthi sa atthu saasuwenle aya, saahimutthara. Yesu aahiwaakhela saana atthu awo, onaaleela itthu sa Omwene wa Muluku. Nave aahaapenuxa ale yaawereiwa.+ 12 Vano nihiku naahala vakhaani omala. Nto arummwa 12 yaahimwaattamela Yesu, anamuleela wiira: “Mwaamwarye atthu ala arowe mmawaani ni mittetthe soowaattamela, wiira aphwanye opuro woophumurya ni woothuma yoolya, maana opuro ola ori ahu, ti woorakamela omuttettheni”.+ 13 Nto Yesu aahiwaakhula wiira: “Mwaavaheke nyuwo yoolya”.+ Awo yaahihimya wiira: “Hiyo nrina iphaawu thanu ni ihopa piili paahi. Khino nihaana orowa othuma yoolya yoowaavaha atthu ala ootheene?” 14 Veekeekhai, yaahikhala alopwana oowiiraka 5.000. Masi Yesu aahaahimeerya awiixutti awe wiira: “Mwaaleele atthu akilaathi ikurupu sa atthu 50”. 15 Awiixutti yaahiira siiso, nto atthu ootheene yaahikilaathi. 16 Nuumala-vo, Yesu aahikuxa iphaawu iyo thanu ni ihopa piili, aahiweha osulu, onavekelela. Vano aahikawanya iphaawu iyo, aavaha awiixutti iphaawu ni ihopa, wiira yaavahe atthu ale. 17 Atthu ootheene yaahilya mpakha ovona. Nuumala-vo, saahittotteliwa ipetaaso saahanle,* khusarya ittanka*+ 12.
18 Okathi mukina, Yesu ovekelaka mekhawe, awiixutti yaahimwaattamela. Nto owo aahaakoha wiira: “Atthu anihimya wiira miyo ka pani?”+ 19 Awo yaahimwaakhula wiira: “Yohani Mpatisa. Akina anihimya wiira mwa Eliya. Akina-tho, anihimya wiira mwa profeta mmosa a khalai ohihimuxiwe mookhwaani”.+ 20 Yesu aahaakoha wiira: “Ankhi nyuwo, munihimya wiira miyo ka pani?” Pedru aahaakhula wiira: “Nyuwo mwa Kristu a Muluku”.+ 21 Nto, Yesu aahaalopola oratteene awiixutti ale wiira ahimuleele mutthu.+ 22 Owo aahimmye wiira: “Mwaana a Mutthu ohaana ohaaxiwa vanceene ni okhoottiwa ni makhulupale a ayuda, ni makhulupale a anamukuttho ni alipa-oowiixuttiha nlamulo. Nave ohaana wiiviwa,+ masi onrowa ohihimuxiwa nihiku na neeraru”.+
23 Vano, Yesu aahaahimeerya awiixutti awe ootheene wiira: “Akhala mutthu oniphavela okitthara, aikhootte mmansawe,+ okuxe mwiri awe wa nihaaxeryo,* okitthareke voohihiyererya nihiku ti nihiku.+ 24 Ole oniphavela woopola okumi awe, onoomurimeela. Masi, ole onimurimeela okumi awe mwaha wa miyo, onoophwanya.+ 25 Mweekeekhai, mutthu oniphwanya exeeni waakhela olumwenku wootheene, variki okumi awe orowaka opweteya?+ 26 Tthiri, ole onrowa wuuliwa muru mwaha wa miyo ni moolumo aka, nave Mwaana a Mutthu onimuuliwa muru mwaha wa mutthu owo, okathi mwaana owo onirwa awe ni ovuwa wawe, ovuwa wa Tiithi awe vamosa ni wa malaikha oowaarya.+ 27 Kinooleelani ekeekhai wiira, aakhala ari vaava ahinrowa okhwa, ahoonale toko Omwene wa Muluku”.+
28 Vano, nuuvira mahiku 8 ohimyale ene masu ala, Yesu aahimukuxa Pedru, Yohani, ni Yakobo, awela vamwaako wiira avekele.+ 29 Okathi aavekela awe, owiitho wawe waahithatuwa, nave ikuwo sawe saahitteela vanceene, sinatutha. 30 Niinaano-ru, yaahikhumelela alopwana anli enavaanela ni Yesu. Awo yaari Moise ni Eliya. 31 Alopwana awo anli yaahirwa ni ovuwa, nto analavula moota Yesu aarowa awe okhuma valaponi, weiwo waarowa wiiraneya oYerusalemu.+ 32 Vano Pedru ni akhwaawe yiira arupaka. Nto okathi yaavennye aya, yaahoona ovuwa wa Yesu+ ni yaahiwoona alopwana anli yeemenle ene ni yoowo. 33 Okathi alopwana awo yaahala aya orowa, Pedru aahimuleela Yesu, wiira: “Mwiixuttihi, vaareera hiyo okhala vaava. Nrowe nteke itenta* tthaaru, emosa yawinyu, ekina ya Moise, nave-tho ekina ya Eliya”. Owo khaasuwela yaahimya awe. 34 Nlelo olavulaka itthu iya, naahikhumelela neeku, naakhuneela. Nto awo yaahoova. 35 Vano, naahiiwanyeya nsu+ nikhumaka muneekuni-mmo, nriki: “Ola Mwanaka, yoowo kimuthanlale aka.+ Mmwiiweleleke yoowo”.+ 36 Okathi nsu nle naiwanyeya aya, Yesu aahanle mekhawe. Vano awo khiyaalavunle etthu. Nave mahiku ene yaawo khuuvo yaamulenle aya itthu iye yoonale aya.+
37 Mmeeloni mwaya, akhuruwaka vamwaako, muttitthi muulupale wa atthu waahirwa okumana ni Yesu.+ 38 Okathi ene yoowo, mulopwana mmosa aari ni muttitthi owo, aahimuhimeerya Yesu wiira: “Mwiixuttihi, kihoovarani metto, munwehe mwanaka mwaamulopwana, okhala wiira kirina mmosa yoola paahi.+ 39 Nookhala nlaikha nootakhala nninvara. Nanvara vale, niinaano-ru ninnimukhuweliha, ni ninnimmoroxela vathi, onaluwela okhumaka nipheru mwaano. Nlaikha nlo khanimmuhiya nihimuhaaxale vanceene ni onvulaliha. 40 Kihaavekela awiixutti anyu wiira yoomole, masi awo khawenrye”. 41 Yesu aahaakhula oriki: “Nyuwo atthu oohaamini ni ootakhala!+ Kinrowa okhala ni nyuwo mpakha silini? Kinrowa woovilelani mpakha silini? Mukiruuhele-va”.+ 42 Okathi mmiravo owo aamwaattamela awe Yesu, nlaikha nlo nootakhala naahimurihela vathi, nnamuluweliha vanceene. Masi Yesu aahipwapwela nlaikha nle nootakhala, ompenuxa mmiravo owo, ni onvahererya paapa awe. 43 Atthu ootheene yaahitikinihiwa vanceene ni owerya wuulupale wa Muluku.
Atikinihiwe ene ni itthu sootheene Yesu aapaka awe, owo aahaahimeerya awiixutti awe wiira: 44 “Nwiriyane oratteene moolumo ala ni muhiliyale, maana Mwaana a Mutthu onrowa ovarihiwa ni ovahereriwa mmatatani mwa atthu”.+ 45 Masi awo khiyaiwexenxe moolumo awe, okhala wiira yootaphulela ya moolumo awo yaahiipithihiwa. Nave-tho, yaanoova omukoha ele yaataphulela aya moolumo ale.
46 Vano, awiixutti yaahipacerya onyakulihana aphavelaka omusuwela ti pani a yaawo aari muulupalexa.+ 47 Yesu, osuwelaka etthu yuupuwelela aya vamurimani vaya, aahimukuxa mwanamwane, omweemexa vakhiviru vawe, 48 onaahimeerya so: “Ole onimwaakhela mwanamwane ola, mwaha wa nsina naka, onikaakhela miyo. Nave, ole onikaakhela, onimwaakhela Ole okirumme.+ Mweekeekhai, ole oniixoona okhala mwaamukhaani eriyari anyu, yoowo tori muulupale”.+
49 Yohani aahimuhimeerya Yesu wiira: “Mwiixuttihi, nonweha mutthu oomolaka malaikha ootakhala mwa nsina nanyu. Nto hiyo niheererya omukhoottiherya, okhala wiira khoneetta ni hiyo”.+ 50 Masi Yesu aahimuleela wiira: “Muheererye omukhoottiherya, maana ole ohinoovirikanyani, ori ni nyuwo”.
51 Waattamelaka* okathi wa Yesu orowa wiirimu, owo kheemerenrye etthu+ omukhoottiherya orowa oYerusalemu. 52 Siiso, aahaaruma anamitthaka* ohoola. Awo yaahiphiya muttetthe wa asamariya wiira alokiherye itthu wiira amwaakhele. 53 Masi atthu a muttetthe owo khiyaamwaakhenle,+ okhala wiira aahilakela orowa oYerusalemu. 54 Okathi awiixutti Yakobo ni Yohani+ voonale aya etthu ele, yaahimukoha Yesu wiira: “Pwiya, munniphavela wiira nirume okhuruwa mooro wiirimu wiira waapwetexe atthu ale?”+ 55 Masi Yesu aahirukunuwa onaaweha ni onaapwapwela. 56 Nuumala-vo, yaahirowa muttetthe mukina.
57 Vano yeettaka mustaraatani, mutthu mmosa, aahimuleela wiira: “Kinimoottharani khula opuro munrowa anyu”. 58 Masi, Yesu aahimwaakhula wiira: “Akhwatte aakhalana mittupha saya, nave axipalame* aakhalana ipuru saya, masi Mwaana a Mutthu, khorina opuro awe woorupa”.+ 59 Yesu aahimwiirela mukina wiira: “Mukhale mwiixutti aka”. Mulopwana owo aahimwaakhula wiira: “Pwiya, mukeemererye toko orowa waavitha apaapa”.+ 60 Masi Yesu aahimuhimeerya wiira: “Mwaahiye alipa-ookhwa,+ yaavitheke alipa-ookhwa. Masi nyuwo murowe mwalaleyeke Omwene wa Muluku mapuro ootheene”.+ 61 Nave-tho mukina aahimmye wiira: “Pwiya, miyo kinimoottharani, masi mukeemererye toko orowa waalaxerya atthu a vatthokoni vaka”. 62 Yesu aahimwaakhula wiira: “Ole onilima ottharaka eliinya, onaweha itthu sihanle ottuli,+ khoniphwanela okela Moomweneni mwa Muluku”.+