Mammeru
24 Okathi Balaamu oonale awe wiira Yehova aaniphavela* omureeliha Isarayeli, Balaamu khaamulamphe.+ Masi aahirukunuwa onaweha woothakoni. 2 Okathi Balaamu aawenhe awe aisarayeli amanke ene moothakoni, akawanyiwe ene mahimo aya,+ Balaamu aahaakhela ikuru sa Muluku.+ 3 Balaamu aahilavula muhupi ola:+
“Muhupi wa Balaamu, mwaana a Beyori.
Muhupi wa mulopwana yoowo ahuliwe maitho awe.
4 Muhupi wa mutthu oniiwa moolumo a Muluku,
Yoowo onwenhe moolohani Muluku Oowerya Sootheene,
Yoowo uuramenle vathi maitho awe ahiwalinwe, tuula:+
6 Iyo ti soowaatta sinlikana ni maxepa,+
Sinlikana ni ixarti siri mukerekhere mwa muro,
Sinlikana ni miri sa alowe* saaliwe ni Yehova,
Sinlikana ni miri sa eseeturu* siri mukerekhere mwa maasi.
7 Maasi anniyiiheya miyaapu sawe miili,
Nave osuulu awe ohaaliwa mukerekhere mwa maasi manceene.+
8 Muluku tomukuminhe wExiitu,
Owerya wawe onnaakhaliherya, siisaale ntoko manyaka a epooyi ya mutakhwani.
Muluku onoomaliha maloko anaahasula awo,+
Onookhuura makhuva aya, ni onimwaapwetexa ni mattheere awe.
9 Isarayeli ookhoroma, ni ohimmaathi ntoko kharamu,
Ntoko kharamu, ti pani okhanle onvenxa?
Ale anooreelihani anooreeriwa,
Nave ale anootakhalihani anootakhalihiwa”.+
10 Vano, Balaki aahinanariwa vanceene ni Balaamu. Nto Balaki aahimana makuphi onyoholelaka, ni aahimuleela Balaamu wiira: “Miyo kihooruuhani wiira mwaatakhalihe awanani aka,+ masi ikwaha iya tthaaru nyuwo murimwaareeliha paahi. 11 Mukhumeke-va, mutthikeleke elapo anyu. Miyo kaaphavela woovahani itthu sinceene sooreera,+ masi Yehova ohookhoottiheryani”.
12 Balaamu aahimwaakhula Balaki, iiraka: “Miyo kaahaaleela anamitthaka anyu wiira: 13 ‘Hata Balaki okivahaka empa awe esareyale ene eparatha ni eweero, miyo nkaarowa opaka etthu ekina ehikhanle ele Yehova, Muluku aka okirumme awe, ekhale etthu yooreera aahiiso yootakhala. Kinrowa olavulaka paahi etthu Yehova onrowa awe okileela’.+ 14 Vano kinoohokolowela wa atthu aka. Masi kihinatthi kinimooleelani etthu atthu ale anrowa aya owiiriha atthu anyu muhoolo”.* 15 Nto Balaamu aahilavula muhupi ola:+
“Muhupi wa Balaamu, mwaana a Beyori.
Muhupi wa mulopwana yoowo ahuliwe maitho awe.+
16 Muhupi wa mutthu oniiwa moolumo a Muluku,
Orina osuwela wa Muluku Muulupalexa,
Yoowo onwenhe moolohani Muluku Oowerya Sootheene,
Yoowo uuramenle vathi maitho awe ahiwalinwe:
17 Kinonweha, masi khahiyo niinaano;
Kinonweha saana, masi khokhanle vakhiviru.
Owo onoothala eyuuci ya Mowabi,+
Ni ekarakasa ya muru wa anakhotto ootakhala.
18 Edomi onookuxiwa ni aisarayeli,+
Seyiri+ onookuxiwa ni awanani awe,+
Vano Isarayeli onimooniherya olipa wawe murima.
19 Mutthu onikhuma wa Yakobe onimwaawerya,+
Nave mutthu yoowo onimwaapwetexa ale ahanle opooma”.
20 Okathi aawenhe awe amaleki, aahilavula-tho muhupi awe iiraka:
21 Okathi aawenhe awe akenewu,+ aahilavula-tho muhupi awe iiraka:
“Nipuro ninkhala anyu ti noolipihiwa, ninlikana ni epuru etekiwe vamwala.
22 Masi ookhala onrowa opaha nihimo na akenewu.*
Asiiria anrowa wookhalihani silini ipottha?”
23 Owo aahitthikela-tho olavula oriki:
“Ti pani onrowa woopowa, okathi Muluku onrowa awe opaka etthu eyo?
24 Apakiti animoorwa akhumaka ephareya ya oKitimi,+
Awo animwaahaaxa asiiria,+
Nave anoomuhaaxa Heeberi.
Masi owo onoopwetexiwa voomalela”.
25 Vano Balaamu+ aahivenya, onatthikela elapo awe. Nave-tho, Balaki aahirowa ephiro awe.