Samuweli a Nenli

2 Nuumala-vo, Davidi aahimukoha Yehova+ oriki: “Kiireke kihaana orowa epooma emosa ya oYuda?” Yehova aahimwaakhula wiira: “Muroweke”. Davidi aahimukoha-tho wiira: “Kiroweke woowi?” Owo aahimwaakhula wiira: “OHebroni”.+ 2 Nto Davidi aahirowa ni axaarawe anli, Ahinowami,+ a oYezireyeli ni Abigayili+ naamukhweli a Nabali a oKarmelo. 3 Davidi aahaakuxa-tho alopwana aarina awe,+ khula mulopwana ni atthu a etthoko awe, nto yaahimaka oHebroni, ni ipooma saarukurenrye. 4 Alopwana a oYuda yaahirwa, ni yaahimukhaliha Davidi mwene a etthoko ya Yuda.+

Awo yaahimuleela Davidi wiira: “Alopwana a oYabexi-Xileyaadi tanvinthe Sawuli”. 5 Davidi aahaaruma alopwana orowa oYabexi-Xileyaadi, waaleela alopwana a weiwe wiira: “Yehova ooreeliheni, okhala wiira moomooniherya ophenta woororomeleya pwiya anyu, Sawuli, mwaha wonvitha.+ 6 Yehova owooniheryeni ophenta woororomeleya okathi wootheene. Nave miyo kinimooreerelani murima mwaha wa etthu mpanke anyu.+ 7 Vano mwiilipihe ni mukhale alopwana oolipa murima, okhala wiira pwiya anyu, Sawuli, ohookhwa, ni etthoko ya Yuda yookithanla ntoko mwene aya”.

8 Masi Abineri+ mwaana a Neri, xeefi a anakhotto a Sawuli, oomukuxa mwaana a Sawuli Ixi-Boxethi,+ olapuwana muro Yordani, orowaka mpantta mukina wa oMahanayimi.+ 9 Nave oomukhaliha mwene wiira olamuleleke oXileyaadi,+ aalamuleleke atthu a wAxeri, a nihimo na Efrayimi,+ a nihimo na Beniyamini, oYezireyeli,+ ni wIsarayeli wootheene. 10 Ixi-Boxethi, mwaana a Sawuli, aarina iyaakha 40 okathi aakhanle awe mwene a wIsarayeli, ni aahilamulela iyaakha piili. Vano atthu a etthoko ya Yuda, yaamukhaliherya Davidi.+ 11 Davidi aahiviriha iyaakha 7 ni miyeeri 6+ ori ene mwene oHebroni ni aalamulelaka atthu a etthoko ya Yuda.

12 Nuuvira okathi, Abineri mwaana a Neri, ni arumeyi a Ixi-Boxethi, mwaana a Sawuli, yaahikhuma oMahanayimi,+ arowa oXibeyoni.+ 13 Yowabi,+ mwaana a Seruwiya,+ ni arumeyi a Davidi, yaahirowa okumana naawo, ntthiya na Xibeyoni. Ekurupu emosa yaari ekhopela ekina ya ntthiya, ni ekurupu ekina yaari ekhopela ekina. 14 Vano, Abineri aahimuleela Yowabi wiira: “Naathanle alopwana wiira awane yaawo-ru, ohoolo wahu”. Yowabi aahaakhula wiira: “Niire siiso”. 15 Nto yaahiilokiherya ni yaahilapuwa wiira yawane. Nihimo na Beniyamini yaahithanliwa alopwana 12 a ekurupu ya Ixi-Boxethi, mwaana a Sawuli. Anakhotto a Davidi yaathanliwe 12. 16 Khula mmosa aahinvara muru nwanani awe ni yaahihomana ni espaata, nto ootheene aya yaahikhwaasa. Tivo opuro ole wa oXibeyoni oniihaniwa aya Helikathi-Hazurimi.

17 Ekhotto yaawaniwe nihiku nle, khiyaareere oviha. Nto, Abineri ni alopwana a Isarayeli, yaahiweriwa ni anakhotto a Davidi. 18 Anamwane araru a Seruwiya,+ Yowabi,+ Abixayi,+ ni Asaheli,+ yaari okhottoni weiwo. Asaheli aaniwerya otthyawa ntoko naahe. 19 Asaheli aahipacerya omoomola Abineri, ahihapuwelaka nnakhala moono woolopwana, nnakhala moono woothiyana, okhala wiira amphavela Abineri. 20 Okathi Abineri aawenhe awe ottuli, aahimukoha wiira: “Nyuwo ti Asaheli?”. Owo aahaakhula wiira: “Aayo, ti yoomi”. 21 Abineri aahimuhimeerya wiira: “Muhapuwele moono woolopwana, aahiiso moono woothiyana, ni munvare mulopwana mmosa, wiira mmwaakhe itthu sawe”. Nto Asaheli khaaphavenle ohiya omoomola. 22 Abineri aahitthikela-tho omuleela Asaheli oriki: “Muhiye okoomola, wiira kihiwiiveni. Kawiivani vale, kinimuuliwa muru okathi kinrowa aka okumana ni munninyu Yowabi”. 23 Masi, Asaheli khaaphavenle ohiya omoomola. Nto Abineri aahimutuphela, omuhoma erukulu ni ewiha* ya nivaka+ nawe, mpakha othorowela mpantta mukina. Asaheli owo, aahimora khukhwa, atthu ootheene yaavira opuro ole aakhwiiye awe Asaheli, yaaneemela.

24 Nuumala-vo, Yowabi ni Abixayi, yaahimutthimakela Abineri. Okathi nsuwa naakela aya, yaahiphiya opuro woottukhuwa wa Amma, yoowo ori ohoolo wa oXiya, ephiro ya woothakoni ya oXibeyoni. 25 Nave, atthu a nihimo na Beniyamini, yaahitakaahana ni Abineri, ni yaahikhala ekurupu emosa ya anakhotto, athukumana opuro mukina woottukhuwa. 26 Abineri aahimukhuwelela Yowabi oriki: “Nnoothipelela wiivana mpakha liini? Khamunsuwela wiira yookhumelela aya ti yoowereya? Munrowa waaleela liini atthu anyu wiira ahiye owoomola axinnaya?” 27 Vano, Yowabi aahimwaakhula oriki: “Ntoko siisaale Muluku eekeekhai onikhala awe, mwahaalavunle, atthu aka khiyaarowa ohiya owoomola axinnaya mpakha voosiisu”. 28 Moottharelana, Yowabi aahoopa nlope, nto atthu awe yaahihiya owoomola aisarayeli, vano ekhotto yaahimala.

29 Abineri ni anakhotto awe, yaaheetta ohiyu ole wootheene, aviraka wAraba,+ alapuwa muro Yordani. Nave, yaahivira oxepani wootheene,* nuumala-vo yaahiphiya oMahanayimi.+ 30 Nuumala Yowabi otthika aamoomola awe Abineri, aahaathukumanya atthu ootheene. Ohiya Asaheli paahi, anakhotto 19 a Davidi, yaahikhwa. 31 Masi, anakhotto a Davidi, yaahaaxintta atthu a nihimo na Beniyamini, ni alopwana a Abineri. Nto atthu 360 a yaawo, yaahikhwa. 32 Awo yaahikuxa murutthu wa Asaheli+ avitha mahiye a paapa awe, oBetelehemu.+ Nuumala-vo, Yowabi ni anakhotto awe, yaaheetta ohiyu wootheene aphiya oHebroni,+ oxaka.