Yesaya
56 Etthu Yehova onihimya awe, tiila:
“Mweetteleke exariya,+ mwiireke itthu sooreera,
Okhala wiira woopola waka ori vakhiviru,
Nave exariya aka enimooniheriwa.+
2 Oohakalala tuule oniira siiso,
Ti yoole oneettela itthu iyo,
Yoole onittittimiha nihiku na saabadu, ohiveehaka.+
Nave onikhootta opaka itthu sootakhala.
3 Namurwa onimukokhorela Yehova,+ ohihimyeke wiira:
‘Yehova onookivalaanya ni atthu awe’.
Nave mulopwana oohuliwa,* ohihimyeke wiira: ‘Moone! Miyo ka mwiri woowuuma’”.
4 Etthu onihimya awe Yehova, tiila: “Alopwana ahiniyara anittittimiha isaabadu saka, ni anithanla itthu sinkisivela ni anivarexexa nivarihano naka, kinoowiirela etthu ela:
5 “Kinimwaavaha opuro mpaani mwaka ni kinimuupuwela nsina naya.
Eyo etthu yooreera vanceene ovikana okhalana anamwane axilopwana ni axithiyana.
Kinimwiiriha nsina naya olempwa, para mahiku ootheene,
Nave khaninrowa omala.
6 Anamurwa anirwa wa miyo, Yehova, wiira akikokhoreleke,
Wiira aphenteke nsina naka, Yehova,+
Ni wiira akhale arumeyi aka,
Nave ootheene ale anittittimiha esaabadu ni ahiniveeha esaabadu eyo,
Ni anivarexexa nivarihano naka,
7 Kinimwaaruuha vamwaako vaka voowaarya,+
Nave kinoowiiriha otteeliwa murima mpaani mwaka mwa mavekelo.
Kinimweemererya valtaari vaka, soovaha saya para opahiwa ni mikuttho saya.
Empa aka enrowa ohimmwaka okhala empa ya mavekelo para atthu ootheene”.+
8 Pwiya Muulupalexa Yehova, yoowo onaathukumanya atthu a Isarayeli amwara-mwariwe,+ onihimya wiira:
“Kinimwaathukumanya ale akina, kaatakaahe ni ale athukumanyiwe”.+
9 Nyuwo inama sootheene sa owali,
Nyuwo inama sa owali sa mutakhwani, murwe mulyeeke.+
10 Alipa-oowehaweha khanoona.+ Awo khanisuwela etthu ekhanle oowiiraneya.+
Ootheene aya ankhala mwa alapwa ahiniwuwa,* ahiniwerya owuwa.*+
Awo anoomumulasa paahi ni wummaathi, nave waasivela orupa.
11 Atthu awo ari ntoko alapwa anilya vanceene;
Khaniphiyeriwa.
Ari ntoko amakampusi ahinsuwela etthu.+
Ootheene aya anitthara ephiro aya;
Ootheene aya aniphavela wiiya ni anihimya wiira:
12 “Murwe, kinoorowela eviinyu,
Niwurye mpakha ohapaliwa.+
Nihiku na meelo ninrowa olikanaka ni olelo, masi meelo-vo, vanootepexa oreera!”