Isaalimu

Nsipo na Davidi.

101 Kinimwiipa isipo, kilavulaka sa ophenta woororomeleya ni exariya.

Kinimoottottopelani ni isipo, nyuwo Yehova.

2 Kinoopakaka itthu ni ankhili ni voororomeleya.

Munirwa silini wiira mukikhaliherye?

Kiri ene mpaani mwaka, kinoovaraka+ itthu sooreera.

3 Nkinrowa owehaka itthu sihirina efaita.

Kinninyokha itthu aniira aya atthu yaale anihiya ovara itthu sooreera;+

Nkinrowa waattamela itthu iyo.

4 Nkiniwaattamela atthu arina murima wootakhala;

Nkinrowa weemererya* itthu sootakhala.

5 Ole onimootherya mukhwaawe wiiphiini,+

Miyo kinommaaliha.*

Mutthu oowiittottopa ni oowiixinnuwiha,

Miyo nkinrowa onvilela.

6 Kinoowaavyaka mulaponi atthu aniwiiwelelani,

Wiira akhaleke ni miyo.

Ole oneetta voororomeleya, tonrowa okivarelaka muteko.

7 Khuuvo nawoothe onrowa okhalaka mpaani mwaka.

Nnakhala mutthu oowootha khonrowa weemelaka ohoolo waka.*

8 Khula voosiisu, kinimwaamaalihaka* atakhali ootheene a mulaponi,

Wiira kaapwetexe atthu ootheene aniira sootakhala, mpooma mwa Yehova.+