Silempwale ni Marko
15 Nuumala oxa, makhulupale a anamukuttho, makhulupale a ayuda ni alipa-oowiixuttiha nlamulo, vamosa ni eSineedrio* yootheene, yaahithukumana wiira ampake palano a moota yaarowa aya omwiiva Yesu. Nto yaahimutthukwa, amuroiha wa Pilato.+ 2 Vano, Pilato aahimukoha wiira: “Niireke nyuwo mwa Mwene a ayuda?”+ Yesu aahaakhula oriki: “Ti nyuwo munihimya”.+ 3 Masi makhulupale a anamukuttho yaanimuhimyana itthu sinceene. 4 Pilato aahitthikela-tho omukoha oriki: “Nyuwo khamunaakhula etthu?+ Niireke khamuniiwa itthu sinceene munihimyaniwa anyu ni atthu ala?”+ 5 Masi Yesu khaakhunle-tho etthu, nto Pilato aahitikinihiwa vanceene.+
6 Khula efesta ya paasikha, Pilato aahilimalela omutaphula mutthu mmosa aatthukweliwe, atthu yanvekela aya.+ 7 Mahiku awo, aahikhala mulopwana mmosa, aihaniwa Baraba. Owo ni akhwaawe yaatthukwelaniwe awe mukhatteya, yaahinvirikanya kuvernu ni yaahiwiiva atthu. 8 Muttitthi wa atthu waahirowa wa Pilato onanvekela ntoko saalimalenle aya. 9 Pilato aahaakoha oriki: “Muniphavela wiira kimutaphule Mwene a ayuda?”+ 10 Tthiri, Pilato aanisuwela wiira makhulupale a anamukuttho yanvarinhe Yesu mwaha wa nrima.+ 11 Masi makhulupale a anamukuttho, yaahitumererya* muttitthi ole wiira avekele otaphuliwa Baraba, ohiya Yesu.+ 12 Pilato aahaakoha-tho oriki: “Nto muniphavela wiira kimwiirihe exeeni ole munimuhimya anyu okhala Mwene a ayuda?”+ 13 Atthu ale yaahikhuwela ariki: “Okhomeliwe vamwirini!”*+ 14 Masi Pilato aahitthikela-tho waakoha wiira: “Mwaha wa xeeni? Otthenke-ni?” Nlelo awo yaamutepa okhuwela ariki: “Okhomeliwe vamwirini!”*+ 15 Vano Pilato ophavelaka waahakalaliha atthu, aahimutaphula Baraba. Nto nuumala oruma owaxuliwa Yesu,+ aahaavahererya wiira yamukhomele vamwirini.+
16 Atoropa yaahimuroiha Yesu mukintaali, niire so, owannyawe Pilato. Nave yaahaathukumanya atoropa ootheene.+ 17 Yaahinwariha ekuwo ya ekoore violeeta ni yaahipaka ekhara ya miiwa, anwariha mmuru. 18 Vano awo yaanimukhuwelela ariki: “Ihaali, nyuwo Mwene a ayuda!”+ 19 Nave-tho, yaanimmana vamuru ni mutathi. Yaanimusenela, anakokhora ohoolo wawe yoothereryaka omuttittimiha. 20 Nuumala onveehasa, awo yaahimurula ekuwo eyo ya ekoore violeeta, anwariha-tho malaya awe a ota. Nto yaahimukuxa anamuroiha okhomeliwa vamwirini.+ 21 Nave-tho, yaahimukhanyererya mulopwana mmosa aavira okhumaka omatta, yoowo aihaniwa Simoni a oKirene, wiira oteexe mwiri wa nihaaxeryo*+ wa Yesu. Mulopwana owo aari paapa awe Alexandre ni Rufo.
22 Siiso, yaahimuroiha nipuro niihaniwa oGolgotha, nenlo nintaphulela, “Muru Ohanle Makhuva-ru”.+ 23 Opuro ole, yaahinvaha eviinyu yootakaaheriwa ni miira,*+ masi Yesu aahikhootta. 24 Nuumala omukhomela Yesu vamwirini, atoropa ale yaahikawana malaya awe a ota, yaavereryaka esoorti wiira yoone ele khula mutthu aarowa awe okuxa.+ 25 Waari okathi wa 9 oora ya voosiisu,* awo yaamukhomenle aya vamwirini. 26 Vano nipawe naahimya mulattu ene aakhomeliwa awe, naalempwe so: “Mwene a ayuda”.+ 27 Nave yaahaakhomela vamwirini alatarau anli vamosa nuuwo. Mmosa moono awe woolopwana, mukina moono awe woothiyana.+ 28* —— 29 Nto atthu yaavira, yaaninveeha Yesu attikinyaka muru,+ yiiraka: “Khwaa! Nyuwo mwaahimya wiira munoopwexa etemplo ni mwanwerya oteka-tho muhina mwa mahiku mararu,+ 30 mwiixoopole ni mukhuruwe vamwirini wa nihaaxeryo-vo”.* 31 Nave-tho, makhulupale a anamukuttho ni alipa-oowiixuttiha nlamulo, yaaninveeha, ariki: “Ola oowerya owoopola atthu akina, masi khoniwerya wiixoopola!+ 32 Mmuhiye Kristu, Mwene a Isarayeli, okhuruwe vamwirini wa nihaaxeryo,* wiira ninwehe, nimukupali”.+ Nave hata ale yaakhomeliwe vamosa nuuwo, yaaninveeha.+
33 Yaarumale aya 12 oora,* elapo ele yootheene yaahikhumelela ewiriphi* mpakha 15 oora.*+ 34 Yeettaka 15 oora, Yesu aahikhuwela ni nsu noowiiwanyeya, oriki: “E′li, E′li, la′ma sa·bach·tha′ni?”, yeeyo enitaphulela wiira, “Muluku aka, Muluku aka, xeeni muhalaka okinyanyala?”+ 35 Atthu akina yeemenle vakhiviru vaavale, nuumala omwiiwa, yaahiira: “Mmwiiweke! Ola onimwiihana Eliya”. 36 Mutthu mmosa aahitthimaka, oxuweya exiponxa* nviinyuni yoonyuunya, otthukwelela vamutathini, onanvaha Yesu wiira owurye,+ oriki: “Mmuhiye! Noone vakhala wiira Eliya onimoorwa omukuruxa”. 37 Vano Yesu aahitthikela-tho okhuwela ni nsu noowiiwanyeya, nuumala-vo, aahikhwa.*+ 38 Ekortiina ya mutemplo+ yaahikhereya okhuma osulu mpakha vathi.+ 39 Nto, nuumala mukhulupale a anakhotto, yoowo eemenle vaavale, oweha itthu siiraneyale ni Yesu ohalaka okhwa, aahihimya wiira: “Tthiri, mulopwana ola aari Mwaana a Muluku”.+
40 Yaahikhala-tho vaavale athiyana, yeemenle ottaiwene, awehaka. Mwa yaawo, aahikhala Maria Madalena, Maria maama awe Yakobo mukhaani ni Yosefe, vamosa ni Salome,+ 41 yaawo yaamutthara Yesu ni yanvarela muteko+ okathi aari awe oGalileya ni athiyana akina yaamutthanre oYerusalemu.
42 Vano, nihinatthi okela nsuwa ni okhala wiira naari nihiku naalokiheriwa aya esaabadu, niire so, nihiku nimosa ehinatthi esaabadu, 43 Yosefe a wArimathaya aahilipiha murima onarowa okumana ni Pilato, onvekela murutthu wa Yesu.+ Yosefe owo aari mulopwana oottittimihiwa iirela mpantta etripunaale ya etiini ya ayuda. Nave aanilipelela Omwene wa Muluku. 44 Pilato aahiphavela osuwela akhala wiira Yesu aahikhwa aahiiso nnaari, tivo aahimwiitthana mukhulupale a anakhotto, khimukoha. 45 Nuumala Pilato osuwela wiira Yesu aahikhwa, aahimweemererya Yosefe okuxa murutthu. 46 Yosefe aahithuma ekuwo ya eliinyu yooreera, aahikuruxa murutthu wa Yesu, ovitikelela ni ekuwo eyo ya eliinyu yooreera, ovitha mmahiye+ yaathimpwale vamwala. Nuumala-vo, aahipirikixela nluku vamukhora va mahiye awo.+ 47 Masi, Maria Madalena ni Maria maama awe Yosefe, yaahihala vaavale awehaka opuro aavithiwe awe Yesu.+