Yesaya
9 Masi, ewiriphi eyo khenrowa okhala ntoko muttetthe waathanyiwa wa oZabuloni ni wa oNefetali, ni okathi elapo yaari aya mmaxakhani.+ Nto, ohoolo waya Muluku onimwiiriha ephiro eyo ottittimihiwa, eyo piiyo, ephiro enivira waattamela ophareya, muttetthe wa oYordani, oGalileya yaakhala aya amalapo.
2 Atthu yaale yeetta mweepiphini,
Yaahoona waarya wuulupale.
Vano atthu yaale yaakhala mulaponi mooriipela vanceene,
Waarya waahaamwaleela.+
3 Muhiiriha nloko okhala noowaatta;
Moowiiriha otteeliwa murima vanceene.
Ntoko atthu anitteeliwa aya murima, okathi wa ohepha,
Ntoko anitteeliwa aya murima,
Okathi anikawana aya itthu awaakhale aya atthu okhottoni.
4 Muhintakasa mwiri yaakapatta aya mmakhatani, wiira ateexane miritti soolemela,
Muhintakasa ekopo yaarumeeliwa wiira amaneliwe mmakhatani, eyo piiyo, ekopo ya makapataaxi,
Ntoko nihiku yaaxinttiwe aya elapo ya oMidiyani.+
5 Ipoota sootheene sa atoropa sinixekexa elapo okathi aneetta aya,
Ni malaya ootheene asareyale ephome,
Sinrowa okhala ikhuni.
Noovahiwa mwaana mwaamulopwana;
Onrowa ovahiwa nsina noowi Mulipa-oosuwela ovaha miruku,+ Muluku Oowerya,+ Tiithi a Mahiku Ootheene, Mukhulupale a Murettele.
7 Omwene awe onoomwareela elapo yootheene,*
Nave murettele khonrowa omala,+
Veehiceni ya Davidi+ ni moomweneni mwawe,
Wiira okhalihe omwene owo+ ni eettiheke,
Orumeelaka exariya,+
Okhuma olelo-va mpakha mahiku ootheene.
Tthiri, Yehova a anakhotto, yoowo ori a nthiti, tonrowa opaka eyo.
8 Yehova oomuroihela muhupi woophukela Yakobe,
Nave muhupi owo woohimmwa wIsarayeli.+
9 Atthu ootheene anoosuwela, eyo piiyo,
Efrayimi ni atthu anikhala oSamariya,
Yaawo aniittottopa ni aniikompela ahimyaka wiira:
10 “Soomora ipa sa itixolu,
Masi hiyo ninrowa oteka ipa sa maluku oothikiliwa.+
Sihiikitthiwa miri sa efiiku,
Masi hiyo ninrowa orantteliha ni miri sa eseeturu”.
11 Yehova onimwaaruuha awanani a Resini wiira amutuphele,*
Ni onoowiiriha awanani awo opaka etthu.
12 Mpantta onikhuma nsuwa, animoorwa atthu a oSiiria, ni mpantta onikela nsuwa*+ animoorwa atthu a oFilisti,
Wiira yaathame ni ammirye Isarayeli.+
Mwaha wa itthu iya sootheene, onanariwa wa Muluku khomanle,
Masi nlelo ohookola ntata nawe wiira aamane.+
13 Atthu khamutthikenle ole aamanne;
Awo khamwaavyale Yehova a anakhotto.+
14 Nihiku nimosa-ru,+ Yehova onrowa okwasa muru ni mwiila wa Isarayeli,
Eyo piiyo, mwiri onimela ni malaxi oorakama* wIsarayeli.
15 Mutthu oowuuluvala yoowo onittittimihiwa vanceene, tori muru,
Masi profeta onilaleya itthu soowoothiwa, tori mwiila.+
16 Ale anaahoola atthu awo anniweettakasiha,
Nave ale anihooliwa khanisuwela etthu yoowiira.
17 Tivonto, Yehova khonrowa otteeliwa murima ni amiravo aya,
Nave khonrowa waamorela ikharari anamwane ahirina paapa aya* ni athiyana anaamukhweli,
Okhala wiira ootheene aya anninvirikanya Muluku ni tootakhala murima,+
Nave atthu ootheene anilavula itthu seethiru.
Mwaha wa itthu iya sootheene, onanariwa wa Muluku khomanle,
Masi nlelo ohookola ntata nawe wiira aamane.+
18 Otakhala onnipatta ntoko mooro,
Onnipaha miiwa ni malaxi.
Mooro owo onoopaha etakhwa yoophipa,
Nave eyo enrowa otthuwaka mwiixi.
19 Mwaha wa onanariwa wa Yehova a anakhotto,
Elapo ela yoopahiwa ni mooro,
Nave atthu anrowa opahiwa ni mooro.
Khuuvo onrowa omulevelela munnawe.
20 Mutthu mmosa onoomeya yoolya eri moono awe woolopwana,
Masi nlelo onoovoliwa etala;
Nave mutthu mukina onimoolya eyoolya eri moono awe woothiyana,
Masi nlelo khonrowa ovona.
Khula mutthu, onookhuura ethai ya moono awe.
21 Manase onoomukhuura Efrayimi,
Nave Efrayimi onoomukhuura Manase.
Oowanli aya anoowana ni Yuda.+
Mwaha wa itthu iya sootheene, onanariwa wa Muluku khomanle,
Masi nlelo ohookola ntata nawe wiira aamane.+