Ezekiyeli

21 Vano kaahisuwelihiwa moolumo a Yehova, yaahimya wiira: 2 “Nyuwo mwaana a mutthu, nweheke oYerusalemu, mulaleye muhimyaka nipuro noowaarya ni mulaleye eprofesia muhimyaka elapo ya Isarayeli. 3 Muhimeerye elapo ya Isarayeli wiira: ‘Etthu onihimya awe Yehova, tiila: “Miyo kinoowana ni nyuwo, kinookumiha espaata* aka opuro onikhala aya+ wiira kaamala-malihe eriyari anyu anaxariya vamosa ni atakhali. 4 Okhala wiira kinimwaamala-maliha eriyari anyu anaxariya vamosa ni atakhali, kinookumiha espaata aka opuro onikhala aya kaakumiheryaka atthu ootheene, eyo piiyo, a osuuli ni a onorti. 5 Atthu ootheene anoosuwela wiira miyo Yehova, kookumiha espaata aka opuro onikhala aya. Eyo khentthikela-tho opuro onikhala aya”’.+

6 “Nyuwo mwaana a mutthu, mwiittheke iphumu okathi munithukumela anyu mwaha wa woova, aayo, mwiittheke iphumu muriipiwe ene murima ohoolo waya.+ 7 Awo yookohani wiira: ‘Xeeni muniittha anyu iphumu?’ Nyuwo muhaana owaakhula wiira: ‘Mwaha wa ihapari sinrwa’. Tthiri iyo sinimoorwa, mirima sootheene sinootothowa mwaha woowoova, matata ootheene anoomora, atthu ootheene anooriipiwa murima nave makutha ootheene anoottonya maasi.*+ ‘Mwiiwe! Ihapari iyo sinimoorwa tthiri; iyo sinimwiiraneya’. Pwiya Muulupalexa Yehova tonihimya”.

8 Kaahisuwelihiwa-tho moolumo a Yehova yaahimya wiira: 9 “Nyuwo mwaana a mutthu, mulaleye eprofesia mwiiraka: ‘Etthu onihimya awe Yehova, tiila: “Muhimye so: ‘Espaata! Espaata+ yoononiwa ni yooreerihiwa. 10 Eyo yoononiwa wiira ewiive atthu anceene; yooreerihiwa wiira yaaryeke ntoko etari’”’”.

“Niireke khanikhanle ootteeliwa murima?”

“‘Niireke eyo* enookhootta ekopo ya mwanaka,+ ntoko enikhootta aya miri sootheene?

11 “‘Espaata ela yookumiheriwa wiira ereerihiwe ni erumeeliweke. Ela yoononiwa ni yooreerihiwa, wiira evahereriwe mmatatani mwa mulipa-oowiva.+

12 “‘Nyuwo mwaana a mutthu, munleke ni mwiikhupanyeryeke,+ okhala wiira eyo ehaarweela atthu aka; eyo ehaarweela makhulupale ootheene a Isarayeli.+ Awo animwiiviwa ni espaata vamosa ni atthu aka. Tivonto mmane etara anyu mooniheryaka oriipiwa murima. 13 Kiireke yootokosiwa+ ele enrowa wiiraneya akhala wiira espaata enookhootta ekopo? Eyo* enoohiya okhala’.+ Pwiya Muulupalexa Yehova tonihimya.

14 “Vano nyuwo mwaana a mutthu, mulaleye eprofesia, mmane makuphi, muhimye ikwaha tthaaru mwiiraka: ‘Espaata!’ Ela espaata eniiva, espaata eniwiiva atthu anceene, ni enaarukurerya.+ 15 Mirima saya saanoova vanceene,+ nave atthu anceene animwiiviwa vamikhora sa ipooma saya, kinoowiiva atthu anceene ni espaata. Aayo, eyo ennaarya ntoko etari nave yooreerihiwa para wiiva! 16 Nyuwo espaata yoononiwa, mwiikitthe mpantta woolopwana! Mpwetexe mpantta woothiyana! Murowe khula opuro munrowa anyu wooniheriwa! 17 Miyo kinimoopa makuphi ni kinoomaliha onanariwa waka.+ Ti miyo Yehova, kilavunle”.

18 Kaahisuwelihiwa-tho moolumo a Yehova yaahimya wiira: 19 “Vano nyuwo mwaana a mutthu, mulepele iphiro piili wiira evire espaata ya mwene a oBabiloonia. Iphiro soopiili sihaana opacerya elapo emosa-ru, nave muhaana ohela esinaale opuro sinipacerya aya iphiro iyo enooniherya ipooma soopiili sinrowa aya. 20 Muhaana olepela ephiro enrowa aya ovira espaata erowaka waRaba+ wa wAmoni, nave muhaana olepela ephiro ekina enrowa epooma yoolipihiwa ya oYerusalemu,+ oYuda. 21 Tthiri, mwene a oBabiloonia onneemela mapuro sinikumana aya iphiro iyo soopiili wiira aaxerye ehako. Owo onnixekexa mavaka awe. Onnikohererya ilatarato sawe,* nave onnaaxerya ehako omurumeelaka hapa a mwaamunama. 22 Ehako aaxenrye awe moono awe woolopwana enithoonya oYerusalemu, wiira seemexiwe ikaruma para opwetexiwa epooma, orume wiiviva atthu, wiiwanyeye okhuwela wa ekhotto, wiira seemexiwe ikaruma sa ekhotto para ohonona mikhora, wiira atekiwe mapuro oottukhuwa anrukurerya epooma, ni wiira etekiwe exiri enrukurerya epooma.+ 23 Masi atthu a oYerusalemu yaawo aleihenrye okhala oororomeleya wa atthu a oBabiloonia, anrowa woonaka wiira ehako eyo ti yeethiru.+ Masi, mwene a oBabiloonia onimuupuwela mulattu aya ni onimwaavara.+

24 “Etthu onihimya awe Pwiya Muulupalexa Yehova, tiila: ‘Nyuwo muhiiriha mulattu anyu wuupuweliwa mooniheryaka soottheka sanyu ni musuwelihaka itampi sanyu ni itthu sootheene munipaka anyu. Nto vano muupuweliwe anyu, munookuxiwa vookhanyereriwa’.

25 Vano nyuwo, mukhulupale ootakhala a wIsarayeli, munlikana ni mutthu ovulalihiwe ni onihala okhwa.+ Nihiku nanyu na ohukhummwa noophiya. 26 Etthu onihimya awe Pwiya Muulupalexa Yehova, tiila: ‘Murule nleeso,* nave murule ekhara.+ Itthu khasintthikela ntoko saari aya khalai.+ Mutthu oottittimihiwa onooyevihiwa,+ nave mutthu ohinooneliwa vatthu onoovuwihiwa.+ 27 Miyo kinimwiiriha ekhara eyo okhala milepe. Aayo, kinookhaliha milepe!* Nave khuuvo onrowa ohalana ekhara eyo, mpakha ophiya ole orina etireitu yoohalana.+ Vano, miyo kinonvahererya yoowo’.+

28 Vano nyuwo mwaana a mutthu, mulaleye eprofesia mwiiraka: ‘Ela ti etthu onihimya awe Pwiya Muulupalexa Yehova, aahimyaka atthu a wAmoni ni oveeha waya’. Muhimye wiira: ‘Espaata! Espaata yookumihiwa opuro onikhala aya wiira ewiive atthu, yoononiwa wiira yiive ni yaaryeke ntoko etari. 29 Nnaamwi mooniheriwe ene etthu yoowoothiwa ni ehako yeethiru enoohimyani nyuwo, nyuwo munimuukeliwa vamosa ni atthu yiiviwe, alopwana yaawo ootakhala niphiyale nihiku naya, okathi wa ohukhummwa waya wookiserya. 30 Muttikiherye espaata opuro onikhala aya. Miyo kinimoophukelani opuro muhuuwale anyu, elapo yeeyo muyariwe anyu. 31 Miyo kinoonanariwa ni nyuwo. Nave kinoowiiseelelani mooro wa oviruwa waka ni kinimoovahereryani mmatatani mwa atthu ootakhala, yaawo anisuwela saana opwetexa.+ 32 Nyuwo munrowa olikanaka ni ikhuni sintetheeriwa vaikho.+ Ephome anyu enoomwarexeliwa vathi, nto khamuntthikela-tho wuupuweliwa, okhala wiira ti miyo Yehova kilavunle’”.