Zakariya
4 Nlaikha naalavula ni miyo naahitthika, nikivenxa, ntoko siisaale sinivenxiwa awe mutthu onirupa. 2 Vano nlaikha nno naahikikoha wiira: “Munoona-ni?”
Nto miyo kaahaakhula wiira: “Kinoona muthuko wootheene wa eweero,+ orina etixela vasulu vaya. Nave sookhala ixamaniiya 7 vasulu vaya,+ aayo, ixamaniiya 7. Ixamaniiya iyo siri vasulu vaya, sookhalana mipompe 7. 3 Nave vakhiviru va muthuko owo sookhala miri miili sa olivera,+ mmosa ori moono woolopwana wa itixela, mukina ori moono woothiyana”.
4 Vano kaahikoha nlaikha nne naalavula ni miyo wiira: “Pwiyaka, itthu iya sintaphulela-ni?” 5 Nto nlaikha nle naalavula ni miyo naahikikoha wiira: “Khamunsuwela ele entaphulela aya itthu iya?”
Vano miyo kaahaakhula wiira: “Nnaari, pwiyaka”.
6 Nlaikha nlo naahikileela wiira: “Moolumo Yehova onimuleela awe Zorobabeli, taala: ‘“Itthu iya khasinrowa wiiraneya mwaha wa otupa wa anakhotto, nnakhala mwaha wa owerya wa apinaatamu,+ masi sinimwiiraneya mwaha wa owerya wa ikuru saka”.+ Yehova a anakhotto tonihimya. 7 Nyuwo mwaako muulupale, mwa pani? Nyuwo munrowa okhala opuro woowaataleya+ ohoolo wa Zorobabeli.+ Nave owo onooruuha nluku nri vasulu va etemplo okhuwelaka, oriki: “Ti nooreera! Ti nooreera!”’”
8 Kaahiiwa-tho moolumo a Yehova, yaahimya wiira: 9 “Zorobabeli oohela matata awe va alisenso a empa ela,+ nave matata awe anoomaliha empa ela.+ Nto nyuwo munoosuwela wiira Yehova a anakhotto tokirumme orwa wa nyuwo. 10 Ti pani aathannye nihiku naapacenrye aya itthu saamukhaani?+ Tthiri awo anootteeliwa murima ni anooweha epurumu* mmatatani mwa Zorobabeli. Mithuko* iya 7, ti maitho a Yehova, yaawo aniwehaweha* elapo yootheene”.+
11 Vano kaahikoha nlaikha nle wiira: “Miri iya miili sa olivera, mmosa ori moono woolopwana ni mukina ori moono woothiyana wa muthuko, sintaphulela-ni?”+ 12 Miyo kaahikoha nlaikha nle ekwaha ya nenli kiiraka: “Iritta iya piili* sa miri sa olivera sinikumiha makhura a ekoore ya eweero anivira mipompe sa eweero, sintaphulela-ni?”
13 Nto nlaikha nlo naahikikoha wiira: “Khamunsuwela ele entaphulela aya itthu iya?”
Vano miyo kaahaakhula wiira: “Nnaari, pwiyaka”.
14 Nlo naahaakhula wiira: “Miri iya sinithoonyerya ale athanliwe ni Muluku. Awo ari anli, yaawo yeemenle vakhiviru wa Pwiya a elapo yootheene”.+