Samuweli Oopacerya

31 Vano afilisti yaahiwana ni atthu a Isarayeli.+ Nto atthu a Isarayeli yaahaatthyawa afilisti, nave atthu anceene yaahikhwa omwaako Xilbowa.+ 2 Afilisti yaahimutthimakela Sawuli ni anaawe. Afilisti awo yaahimwiiva Yonathani,+ Abinadabi ni Malikixuwa, anamwane a Sawuli.+ 3 Ekhotto yaahinviherya vanceene Sawuli. Ale yaavonya mattheere yaahimulukama, nto owo aahivulalihiwa vanceene.+ 4 Moottharelana, Sawuli aahimuhimeerya mulipa aamukhaliherya oteexa nikula nawe na wiixaakihana,* wiira: “Mukumihe espaata* anyu, mukiive, wiira atthu ale oohinnuwihiwa+ ahikiirihe etthu yootakhala nuumala-vo akiive”. Masi mulipa aamukhaliherya oteexa nikula na wiixaakihana khaaphavenle, okhala wiira aanoova vanceene. Vano Sawuli aahikuxa espaata iimorihela vasulu vaya.+ 5 Okathi mulipa aamukhaliherya oteexa nikula na wiixaakihana oonale awe wiira Sawuli aahikhwa,+ owo nave aahitholola espaata awe iimorihela vasulu vaya, okhwa vamosa ni Sawuli. 6 Siiso, Sawuli, anaawe araru, mulipa aamukhaliherya oteexa nikula na wiixaakihana, ni arumeyi awe ootheene yaahikhwa nihiku nle.+ 7 Okathi atthu a Isarayeli, yaakhala opuro woowaataleya ni muttetthe wa oYordani yaasuwenle aya wiira anakhotto a Isarayeli yaahitthyawa ni wiira Sawuli vamosa ni anaawe yaahikhwa, awo yaahipacerya ohiya ipooma saya anatthyawa.+ Nto afilisti yaanikuxa ipooma iyo anakhala memmo.

8 Mmeeloni mwaya, okathi afilisti yaarwiiye aya wiira akuxe itthu sa atthu ale yaawiivale aya, yaahimphwanya Sawuli ni anaawe araru ookhwa ene omwaako Xilbowa.+ 9 Vano, awo yaahimwiikittha muru ni yaahimurula ikaruma sawe sa ekhotto, nave yaahaaruma atthu orowa elapo yootheene ya afilisti olaleya ihapari iyo,+ mpaani mwa amuluku aya+ ni eriyari ya atthu. 10 Moottharelana yaahipweha ikaruma sawe sa ekhotto mpaani mwa elatarato ya Astoreti, nave yaahithomeya murutthu awe vasulu va exiri ya oBethi-Xani.+ 11 Okathi atthu a oYabexi-Xileyaadi+ yaiwale aya etthu afilisti yaamwiirinhe aya Sawuli, 12 anakhotto ootheene yaahivenya, yeetta ohiyu wootheene, akuxa murutthu wa Sawuli ni wa anaawe, saathomeiwale vaxirini va oBethi-Xani. Nuumala-vo, yaahitthikela oYabexi, apaha mirutthu iyo weiwo. 13 Moottharelana, yaahikuxa makhuva aya,+ avitha vathi va mwiri oniihaniwa tamarikeira yoowo waari oYabexi.+ Nave yaahitthukwa mahiku 7.