Zakariya
13 “Nihiku nlo, atthu a etthoko ya Davidi ni atthu anikhala oYerusalemu anoothipeliwa ehime, wiira areerihiwe mwaha wa etampi aya ni ohiloka waya.+
2 Yehova a anakhotto onihimya wiira: “Nihiku nlo, kinoottipiha elapo ela masina a ilatarato,+ nto iyo khasintthikela-tho wuupuweliwa. Nave kinimwaamala-maliha elapo ela maprofeta+ ni ale anipaka itthu Muluku onoona awe okhala soohiloka. 3 Akhala wiira mutthu onootthikela olavula eprofesia, paapa awe ni maama awe amuyanre, anoomuhimeerya wiira: ‘Nyuwo munimookhwa, okhala wiira moolavula itthu soowootha ni nsina na Yehova’. Nto paapa awe ni maama awe amuyanre, anoomuhoma mwaha wa olavula eprofesia.+
4 “Nihiku nlo, khula profeta onimuuliwa muru mwaha wa itthu ooniheriwe awe. Vano awo khantthikela-tho owara nlaya na manri+ wiira yaawoke atthu akina. 5 Khula mmosa a yaawo onoohimya wiira: ‘Nkihiyo profeta. Miyo ka mulimi, okhala wiira ookhala mulopwana aakithumme ntoko epottha okathi kaari aka mmiravo’. 6 Akhala mutthu onimukoha wiira: ‘Ankhi makhwatta ala mmakhatani mwanyu-mu, mwiirale-ni?’* owo onimwaakhula wiira: ‘Apatthani aka* takivulalinhe owannyeya’”.
7 Yehova a anakhotto onihimya wiira: “Nyuwo espaata,* nvenye munvirikanye makampusi aka,+
Munvirikanye mulopwana yoowo ori mpatthani aka.
Mmwiive makampusi,+ nave mmwara-mwarye ipwittipwitthi sawe.+
Miyo kinoovenxa ntata naka wiira kaavirikanye ale ahinooneliwa vatthu”.
8 Yehova onihimya wiira: “Elapo ela yootheene,
Atthu anceene animwiiviwa,
Anrowa ohala atthu vakhaani paahi.
9 Atthu awo vakhaani anrowa ohala kinimwaaviriha vamooroni,
Kinimwaareeriha ntoko sinreerihiwa aya eparatha,
Nave kinooweererya ntoko eneereriwa aya eweero.+
Awo anooromola nsina naka,
Nto miyo kinoowaakhula.
Miyo kinoohimya wiira: ‘Awo atthu aka’,+
Nave awo anoohimya wiira: ‘Yehova tori Muluku ahu’”.