Wahala a Nenli
7 Vano, Salomooni omalaka-ru ovekela,+ waahikhuruwa mooro wiirimu,+ opaha yoovaha ni mikuttho. Nto ovuwa wa Yehova waahisareya mpaani-mme.+ 2 Anamukuttho khiyaawerya ovolowa mpaani mwa Yehova, okhala wiira ovuwa wa Yehova waahisareya mpaani mwa Yehova.+ 3 Atthu ootheene a Isarayeli yiira awehaka okathi mooro waakhurunwe aya wiirimu ni ovuwa wa Yehova waasareyale aya mpaani, nto awo yaahikokhora yuurama mpakha vathi, vaalukamasani a maluku anamuxukhurela Yehova, “okhala wiira owo tooreera murima, nave ophenta wawe woororomeleya onikhala mahiku ootheene”.
4 Vano mwene ni atthu ootheene yaahivaha mikuttho ohoolo wa Yehova.+ 5 Mwene Salomooni aahivaha mukuttho wa ipooyi 22.000 ni ipwittipwitthi 120.000. Siiso mwene ni atthu ootheene yaahitthapela omalihiwa empa ya Muluku eekeekhai.+ 6 Anamukuttho yaaheemela opuro yaathanleliwe aya ovara muteko. Nave-tho alevi yaaheemela opuro aya akunxe ene ikaruma sa isipo saarumeeliwa wiira iipeliweke isipo Yehova.+ (Mwene Davidi aahipaka ikaruma iyo wiira oxukhureliweke Yehova oriki: “Ophenta wawe woororomeleya onikhala mahiku ootheene”, okathi Davidi iipawe isipo vamosa naawo.)* Vano anamukuttho yaanoopa malope voowiiwanyeya+ ohoolo wa alevi, aisarayeli ootheene yeemenle ene.
7 Moottharelana, Salomooni aahireeriha eriyari ya nivate naakhala ohoolo wa empa ya Yehova, okhala wiira aahivaha opuro ole soovaha para opahiwa+ ni ekortuura ya mikuttho sa opatthani, maana altaari a ekoopiri+ Salomooni ampake awe khaaphiyerya ovaha mikuttho para opahiwa, soovaha sa ipyo+ ni ekortuura.+ 8 Okathi ole, Salomooni aahipaka efesta ya mahiku 7+ ni atthu ootheene a Isarayeli, muloko muulupale waakhuma oLebo-Hamati mpakha muro mwaamukhaani wa wExiitu.+ 9 Masi nihiku na neethanu neeraru yaahipaka muthukumano muulupale,+ okhala wiira yaahimaliha mahiku 7 atthapelaka omalihiwa altaari ni mahiku 7 apakaka efesta. 10 Nto nihiku na namuloko miili ni mararu, na mweeri wa neethanu nenli, owo aahaamwarya atthu wiira atthikeleke owannyeya atteeliwe ene murima+ ni ahakalanle ene mwaha wa itthu sooreera Yehova aamwiirenle awe Davidi ni Salomooni ni aawiirenle awe atthu awe aisarayeli.+
11 Siiso Salomooni aahimaliha empa ya Yehova ni empa ya mwene.+ Nave itthu sootheene Salomooni aaphavela awe opaka para empa ya Yehova ni empa awe aahiwerya opaka oratteene.+ 12 Moottharelana, Yehova aahimukhumelela Salomooni+ ohiyu, omuhimeerya wiira: “Kihiiwa nivekelo nanyu, nave koothanla opuro ola ntoko empa enivahiwa mukuttho.+ 13 Kawala erimu, ehinarupa epula, kamuruma nasope wiira olye itthu sa mmatta, kakumiherya ekwerere eriyari ya atthu aka, 14 vano atthu aka yaawo arina nsina naka+ yiiyeviha,+ akivekela, akiphavela ni ahiya iphiro saya sootakhala,+ nto kinimwiiwa kiri ene wiirimu, kinoolevelela etampi aya ni kinooreeriha elapo aya.+ 15 Maitho aka anoowehaka ni maaru aka anoowiriyanaka mavekelo anipakiwa opuro ola.+ 16 Vano miyo koothanla ni kooreeriha empa ela wiira nsina naka nikhaleke muumu mahiku ootheene,+ nave maitho aka ni murima aka anrowa okhalaka muumu okathi wootheene.+
17 “Nave nyuwo, akhala wiira munimweetta ohoolo waka ntoko paapa anyu Davidi eettale awe, mpakaka itthu sootheene koorumalyaakani, mwiiwelelaka ikano saka ni malamulo aka,+ 18 nto kinoolipiha ehice ya omwene anyu,+ ntoko kaapanke aka nivarihano ni paapa anyu Davidi,+ kiiraka: ‘Okathi wootheene, osuulu anyu onrowa waalamulelaka atthu a Isarayeli’.+ 19 Masi akhala wiira nyuwo munoorukunuwa ni munoohiya weettela malamulo aka ni sooruma saka koovahalyaakani, munarowa waarumeela amuluku akina, mwaakokhorelaka yaawo,+ 20 kinimwaakumiha atthu a Isarayeli elapo kaavanhe aka.+ Nave kinookumiha ohoolo waka, empa ela kireerinhe aka erina nsina naka. Nave-tho, atthu a Isarayeli anoothanyiwaka ni anootheiwaka ni atthu ootheene.+ 21 Nave empa ela enoopwexakasiwa ni enoothatuwa milepe.* Khula mutthu onrowa oviraka opuro ola onoowehaka otikinihiwe ene+ ni onookohaka wiira: ‘Xeeni Yehova ohalaka wiiriha siisa elapo ela ni empa ela?+ 22 Awo animwaakhula wiira: ‘Mwaha woowi aamunyanyala Yehova,+ Muluku a amuhavinre aya, yoowo aakuminhe elapo ya wExiitu,+ anaweettela amuluku akina, anaakokhorela ni anaarumeela yaawo.+ Tivo aakumihenrye awe ehasara ela yootheene’”.+