Silempwale ni Luka
14 Okathi omosa, Yesu aahirowa olya vatthokoni va muhooleli mmosa a afarisi, esaabadu. Ale yaari vaavale yaaninwehexexa Yesu. 2 Vano, ohoolo wa Yesu, aahikhala mulopwana mmosa aarina eretta yaamwiiriha wiipelana miyoono ni metto. 3 Nto Yesu aahaakoha afarisi ni ale yaasuwela saana Nlamulo, oriki: “Niireke vanneemereriwa ompenuxa mutthu esaabadu aahiiso nnaari?”+ 4 Masi awo khiyaakhunle etthu. Nto Yesu ahinvara mulopwana ole, ompenuxa, onamwiirela wiira oroweke. 5 Vano aahaahimeerya wiira: “Ti pani a nyuwo, oniira mwanawe mwaamulopwana aahiiso epooyi awe, yamorela mweehimeni,+ ohinakumiha moowaakuveya mwaha wookhala nihiku na saabadu?”+ 6 Awo khiyaawenrye omwaakhula.
7 Okathi Yesu oonale awe wiira atthu yaalattuliwe yaathanla mapuro ootepa ottittimiheya,+ aahaaleela nlikanyiho nimosa, oriki: 8 “Okathi munilattuliwa anyu efesta ya ekasamento,* muhikilaathiki nipuro nootepa ottittimiheya.+ Woonasa wene, oolattuliwa mutthu mukina ootepa ottittimiheya woovikanani nyuwo. 9 Vano ole oolattunleni oowanli anyu, onimoorwa oohimeeryekeni wiira: ‘Mmuhiye mulopwana ola okilaathi opuro anyu’. Siiso, munimuuliwa muru, murowaka okilaathi nipuro noohittittimiheya. 10 Masi mwalattuliwa vale, mukilaathiki nipuro noohittittimiheya, wiira arwa ole oolattunleni, owiireeleni: ‘Mpatthani, murwe nipuro nla noottittimiheya’. Siiso, munoottittimiheya ohoolo wa atthu ootheene alattuliwe.+ 11 Ole oniixinnuwiha, onooyevihiwa, nave ole oniiyeviha, onimwinnuwihiwa”.+
12 Nuumala-vo, Yesu aahimuhimeerya ole aamulattunle, wiira: “Mwalokiherya yoolya ya othana aahiiso ya ohiyu, muhaalattuleke apatthani anyu, axinninyu, amusi anyu ni anamwaattamanani anyu* athaaciri. Mwiira siiso, awo anrowa owiihanelani-tho yoolya aya. Nto, vaarowa okhalaka ntoko animoolivani. 13 Masi mwalokiherya efesta, mwaalattuleke alipa-oohaawa, atthu oorakala, ootuthunya ni alipa-oohoona.+ 14 Siiso, munoohakalala, maana awo kharina etthu yoowoolivani. Tthiri, nyuwo munrowa oliviwa okathi anrowa aya ohihimuxiwa+ anaxariya”.
15 Nuumala wiiwa itthu iyo, mutthu mmosa aalattuliwe, aahimuhimeerya wiira: “Oohakalala tuule onilya* Moomweneni mwa Muluku”.
16 Yesu aahimuhimeerya wiira: “Mulopwana mmosa aahilokiherya efesta yuulupale,*+ aalattula atthu anceene. 17 Vaaphiyale aya ewoora ya yoolya ya ohiyu, aahimuruma namuteko awe wiira aaleele ale yaalattuliwe, wiira: ‘Murweeke, itthu sootheene soolikana’. 18 Masi aphavelaka okhootta orowa, yaahipacerya woothererya itthu sikina.+ Oopacerya aahimmye wiira: ‘Koothuma ematta aka, nto kihaana orowa oweha. Mukilevelele, nkiniwerya orwa’. 19 Mukina aahiira: ‘Koothuma ipooyi 10, kinrowa weererya wiira kiwehe moota sinivara aya muteko. Mukilevelele, nkiniwerya orwa’.+ 20 Mukina-tho, aahimmye wiira: ‘Kithenle niinaano, tivo nkiniwerya orwa’. 21 Vano, namuteko ole aahitthika, khimuhimeerya pwiya awe itthu sootheene. Nto, mwaneene etthoko aahinanariwa, onamuhimeerya namuteko awe wiira: ‘Mwaakuve, murowe iphiro suulupale ni iphiro saamukhaani, mwaaruuhe alipa-oohaawa, atthu oorakala, ale ahinoona ni anituthunya’. 22 Nuuvira okathi, namuteko owo aahimuhimeerya pwiya awe wiira: ‘Pwiya, koopaka yaakirumale anyu, masi nlelo woohala opuro’. 23 Vano, pwiya aahimuleela namuteko awe, oriki: ‘Murowe iphiro sikina ota wa epooma, mwaakhanyererye atthu orwa, wiira empa aka esareiwe.+ 24 Kinooleelani wiira, khuuvo wa atthu ale yaapacenrye olattuliwa onrowa olawiha yoolya aka ya ohiyu’”.+
25 Mittitthi suulupale sa atthu, saanimutthara Yesu, nto owo aahirukunuwa, aahimeerya wiira: 26 “Akhala mutthu onrwa okitthara miyo, ohinaanyokha* apapawe, amamawe, amwaarawe, anaawe, axinnawe ni axirokorawe, hata okumi awe,+ khoniwerya okhala mwiixutti aka.+ 27 Ole ohinikuxa mwiri awe wa nihaaxeryo,* onakitthara, khoniwerya okhala mwiixutti aka.+ 28 Mwa ntakiheryo, ti pani a nyuwo aaphavelaka oteka empa yoorakamela osulu, ohinikilaathi toko, onaweha aarina musurukhu oniphiyerya omaliha empa eyo? 29 Aahiire siiso, owo onoopacerya ompaka alisenso a empa eyo, ohiwerye omaliha oteka. Nto, ootheene ale yanweha, anoopacerya omutheya, 30 ariki: ‘Mulopwana ola aahipacerya oteka, masi ohiwerya omaliha’. 31 Aahiiso, akhala wiira mwene orina atoropa 10.000, oniphavela owana ekhotto ni mwene orina atoropa 20.000, niireke khonipacerya toko okilaathi ni waakoha miruku atthu akina wiira oone aaweryaka oxintta? 32 Owo oona wiira khoniwerya, onimwaaruma anamitthaka* awe orowa ovaanela murettele ni mwene owo, nlelo ori ene ottaiwene. 33 Siiso, khula mutthu a nyuwo ohinihiya sootheene sirina awe, khaniwerya okhala mwiixutti aka.+
34 “Maakha etthu yooreera tthiri. Masi, maakha yahiya osiva waya, anrowa ottikiheriwa sai osiva waya?+ 35 Maakha awo khanireerela nnakhala wiittheliwa vatthayani aahiiso okhala eturumu. Anooyiihiwa paahi. Ole oniphavela wiiwa, iiweke”.+