Miteko sa Arummwa
25 Nuuvira mahiku mararu, okhuma vaavale Festo+ aapacenrye awe olamulela eprovinsia ya oYudeya, aahikhuma oKesareya orowaka oYerusalemu. 2 Vano makhulupale a anamukuttho ni alopwana oottittimiheya a ayuda, yaahirowa omuleela Festo, mulattu wa Paulo.+ Nto yaahipacerya omuxonttela Festo, 3 wiira aawiriyane ni omuroihe Paulo oYerusalemu. Masi awo yampaka palano wiira amwiipithele Paulo ni amwiive mustaraatani.+ 4 Festo aahiwaakhula wiira Paulo aahaana otthukweliwa oKesareya ni wiira Festo owo aamutthikela weiwo voohipisa. 5 Festo aahihimya wiira: “Mwaathanle alopwana akina anoohoolelani wiira arowe ni miyo, yahimye mulattu orina awe, vakhala wiira tthiri oopaka etthu yootakhala”.+
6 Nuuvira mahiku 8 aahiiso 10 Festo ori ene naawo, aahikhuruwela oKesareya. Mmeeloni mwaya, aahikilaathi opuro waaphukiwa milattu, omwiihaniha Paulo. 7 Vaakenle awe Paulo, ayuda ale yaakhumme oYerusalemu yaaheemela, amurukurerya. Nto yaahimuhimyana itthu sinceene sootakhala, seiyo yahaawerya aya wooniherya wiira saari seekeekhai.+
8 Paulo aahiixaakiha ohimyaka wiira: “Miyo nkitthekenle nnakhala Nlamulo na ayuda, nnakhala etemplo, hata nkimutthekenle Seesari”.+ 9 Festo ophavelaka waasiveliha ayuda,+ aahimukoha Paulo oriki: “Niireke munniphavela orowa oYerusalemu wiira mwaphukeliwe ohoolo waka mwaha wa itthu iya?” 10 Paulo aahaakhula wiira: “Miyo keemenle ohoolo wa opuro Seesari onikilaathi awe aaphukaka milattu, nto kihaana ophukeliwa vaava. Khiivo etthu yoohiloka kiwiirenle aka ayuda, ntoko nyuwo munisuwela anyu oratteene. 11 Akhala wiira miyo ka mutthu ootakhala, nave akhala wiira kihaana wiiviwa+ mwaha wa etthu etthenke aka, weeso kiiviweke, nkinrowa oxonttela wiira kihiiviwe. Masi akhala wiira itthu anikihimyana aya atthu ala, khahiyo seekeekhai, khuuvo okhanle ookivahererya mmatatani mwaya wiira aasivelihe. Miyo kiniphavela orowa wa Seesari!”+ 12 Nuumala Festo olavula ni anamiruku, aahaakhula oriki: “Okhala wiira muniphavela ophukeliwa ni Seesari, nto munrowa ophukeliwa ni Seesari”.
13 Vaavirale aya mahiku vakhaani, mwene Agripa ni mwaarawe aihaniwa Berenisi, yaahiphiya oKesareya wiira amukhomase Festo. 14 Nto okhala wiira yaahiviriha weiwo mahiku manceene, Festo aahimuleela mwene owo mulattu wa Paulo, oriki:
“Ookhala-va mulopwana mmosa, yoowo Feelexi omuhiyale awe ootthukiwe ene. 15 Nto okathi kaaronwe aka oYerusalemu, makhulupale a anamukuttho ni makhulupale a ayuda, yaahimuhimyana itthu+ ni yaahikivekela wiira kimuhukhumu. 16 Masi miyo kaahiwaakhula wiira nlamulo na aroma khanneemererya onvahererya mutthu ohinatthi okumana ni atthu animuhimyana mulattu, wiira mutthu owo iixaakihe.+ 17 Nto okathi yaaphiyale aya ale yaamuhimyana mulattu, mmeeloni mwaya, kaahaakuvela okilaathi opuro oniphukiwa milattu, kiruma wiira oruuhiwe mulopwana owo. 18 Atthu awo yaaheemela, anapacerya omuhimyana itthu sinceene, masi khiyaahimmye etthu yootakhala kuupuwela aka wiira aahipaka.+ 19 Koonale wiira awo yaavaanyihana mwaha wa etiini aya ni mwaha wa mulopwana mmosa oniihaniwa Yesu, yoowo aakhwiiye,+ masi Paulo aathipelela awe ohimya wiira aari mukumi.+ 20 Okhala wiira nkaasuwela moota woophuka myaha iyo, kaahimukoha Paulo vakhala wiira aaniphavela orowa oYerusalemu, wiira aphukeliwe mwaha wa itthu iyo.+ 21 Masi okathi Paulo aavekenle awe wiira osukiwe olipelelaka yoolakela ya Augustu,*+ kaahiruma wiira osukiwe mpakha miyo omuroiha wa Seesari”.
22 Agripa aahimuhimeerya Festo wiira: “Miyo kiniphavela onwiriyana mulopwana owo mmansaka”.+ Vano Festo aahiira: “Munonwiriyana meelo”. 23 Siiso, mmeeloni mwaya, nuumala orwa Agripa ni Berenisi yiivuwihaka vaalupale, yaahikela opuro waaphukiwa milattu, vamosa ni makumantanti a atoropa ni alopwana oottittimiheya a epooma ele. Vano Festo aahaaruma anakhotto wiira amuruuhe Paulo opuro ole. 24 Festo aahiira: “Mwene Agripa ni nyuwo ootheene muri ni hiyo, mmooneke mulopwana ola, yoowo ayuda ootheene akivekenle aya oYerusalemu ni nno, akhuwelaka wiira ola khoniphwanela-tho okhala mukumi.+ 25 Masi kaahoona wiira mulopwana ola khopanke etthu enimwiiriha ophwanela wiiviwa.+ Nto okathi aavekenle awe wiira aaphavela ophukeliwa ni Augustu, miyo kaahilakela omuroiha. 26 Masi nkirina etthu yoosuwanyeya wiira kimulepele Pwiya aka, enimuhimya mulopwana ola. Tivo kimuruuhale aka ohoolo wa atthu ala ootheene, vanceenexa ohoolo wanyu nyuwo mwene Agripa, wiira mwamukoha vale, kikhalane etthu yoolepa. 27 Miyo kinoona wiira, okathi mutthu mmosa otthukiwe oniroihiwa awe oRoma, vannireerela-tho ohimya mulattu ene otthukweliwe awe”.