Yesaya
44 “Nyuwo murumeyi aka Yakobe, mwiiwe!
Nave nyuwo Isarayeli, koothanlalyaakani,+ mwiiwe!
2 Etthu onihimya awe Yehova,
Mpattuxa anyu, yoowo oopankeni,+
Ni ookhalihenryeni okhuma okathi muyariwe anyu, tiila:
3 Kinonvaha maasi ole ovoliwe ntthona,+
Nave kinookumiherya miro mapuro oowuuma.
Kinimwaavaha aniinyu, ikuru saka soowaarya,+
Nave kinooreeliha osuulu anyu.
5 Mutthu mmosa onrowa ohimyaka wiira: “Miyo kawawe Yehova”.+
Mukina onrowa wiixiihanela nsina na Yakobe,
Mukina-tho onrowa olepa vantatani vawe wiira: “Miyo kawawe Yehova”.
Nave owo onookuxa nsina na Isarayeli’.
‘Miyo ka oopacerya ni ookiserya.+
Khokhanle Muluku mukina, kihikhanle miyo paahi.+
7 Ti pani onilikana ni miyo?+
Mutthu owo aakhule voowiiwanyeya,
Ohimye etthu ni okooniherye etthu!+
Ohimye itthu sinirwa ni sinrowa wiiraneya,
Ntoko siniira aka okhuma okathi kaakhalinhe aka atthu a khalai.
8 Nyuwo atthu aka, muhoove,
Nave muhihiye woova owiirihakani ohipaka etthu.+
Kiira khula mmosa a nyuwo koomuleela ni koomulaleerya khalai ene etthu ela?
Nyuwo mwa anamoona aka.+
Niireke ookhala Muluku mukina, kihikhanle miyo?
Nnaari, khokhanle Mwala mukina onookhapelelani.+ Miyo nkinsuwela nnakhala mmosa’”.
9 Atthu ootheene anipaka ilatarato khahiyo etthu,
Nave ilatarato anipaka aya, seiyo sinaasivela vanceene, khasinrowa waakhaliherya.+
Ntoko anamoona aya, iyo* khasinoona nnakhala khasinisuwela etthu.+
Tivonto, ale apanke ilatarato iyo, animuuliwa muru.+
10 Kiireke ookhala mutthu aarowa ompaka muluku aahiiso opaka elatarato ya eyuuma,
Ehirowaka omukhaliherya?+
11 Mwiiwe! Ootheene yaale animukhaliherya, animuuliwa muru!+
Ale anaapaka amuluku eethiru, ti apinaatamu paahi.
Ootheene aya athukumane ni yeemele.
Ootheene aya animoova vanceene ni animuuliwa muru.
12 Mulipa onihana iyuuma, onnirumeela ekaruma awe wiira opake etthu ya eyuuma, opahaka vaikho.
Owo onnipaka etthu eyo omurumeelaka maritelo,
Onnipaka etthu eyo ni ikuru sawe.+
Nuumala-vo, onnivoliwa etala ni ikuru sinnimmalela;
Owo onnikhulumuwa mwaha woohiwurya maasi.
13 Mulipa-oopattha miri onniphima matera ni mukhoyi, onnilepela ni exiixi yooxeerya mapuro onrowa awe wiikittha.
Owo onniwaka matera awo ni epalaina, ni onnilepela orumeelaka ekaruma eniihaniwa kompaasu.
14 Ookhala mutthu muteko awe ori wiikittha miri sa eseeturu.
Owo onnithanla muthinto mmosa wa mwiri oniihaniwa karvaalyo,*
Nave onnikhapelela mwiri owo mpakha olipa eriyari ya miri siri mutakhwani.+
Onnaala mwiri wa elooru, nto epula enniiriha wunnuwa.
15 Nuumala-vo, owo onnikuxa mpantta mmosa wa mwiri owo onapaka ikhuni.
Nto onnikuxa mpantta mukina onapattiha mooro wiira oore;
Owo onnipattiha mooro, onooxa ephaawu.
Masi-tho onnimpaka muluku, onamukokhorela.
Onnikuxa mwiri onapaka elatarato, onakokhorela ohoolo waya.+
16 Epantte ekina ya mwiri owo, onnipattiha mooro.
Ni mpantta owo, onnooxa enama, onakhuura ni onavona.
Nave-tho, onnoora onahimya wiira:
“Ahee! Kinnoona oviha ni kinnoona mooro opattaka”.
17 Mpantta onihala wa mwiri owo, onnimpaka muluku, aayo, onnipattha elatarato.
Onnuurama ohoolo wa elatarato eyo, onakokhorela.
Onnivekela ohoolo waya, onahimya wiira:
“Mukoopole, okhala wiira nyuwo mwa muluku aka”.+
18 Atthu awo anipaka ilatarato iyo, khanisuwela etthu ni khanuupuwela saana,+
Okhala wiira maitho aya aatthukweya, ahinawerya woona,
Nave kharina ankhili mmuupuweloni mwaya.
19 Khuuvo onuupuwelela vamurimani vawe,
Nnakhala orina osuwela aahiiso ankhili, onahimya wiira:
“Mpantta mmosa wa mwiri owo koopattihana mooro,
Kihooxa ephaawu vamakhalani vaya, nave kihooxa enama wiira kikhuure.
Nto, kiireke mpantta ohanle wa mwiri owo kihaana opaka etthu yoonanara?+
Kiireke kihaana okokhorela epetaaso yoowuuma ya matera ya mwiri owo?
20 Mutthu owo onlikana ni mutthu onilya ettuurwa.
Murima awe woowokeya ni woomuthweeleliha.
Khoniwerya wiixoopola, nnakhala khonihimya wiira:
“Etthu ela eri ntata naka noolopwana ti yeethiru”.
21 “Nyuwo Yakobe ni nyuwo Isarayeli, muupuweleke itthu iya,
Okhala wiira mwa murumeyi aka.
Ti miyo koopankeni, nave nyuwo mwa murumeyi aka.+
Nyuwo Isarayeli, miyo nkinooliyalani.+
22 Kinoottipiha soottheka sanyu, okhalaka ntoko sikhuneeliwe ni neeku,+
Nave kinoottipiha itampi sanyu, sikhaleke ntoko sikhuneeliwe ni neeku nooriipa.
Mutthikele wa miyo, okhala wiira miyo kinoowoopolani.+
23 Nyuwo erimu, mutthapeke,
Okhala wiira Yehova oopaka etthu!
Nyuwo mapuro ootepa wiixa a mulaponi,
Mutthapeke mutteeliwe ene murima!
Nave-tho nyuwo miyaako,+ nyuwo etakhwa, ni nyuwo miri sootheene, mutthapeke,
Okhala wiira Yehova oomoopola Yakobe,
Nave ohooniherya ovuwa wawe ni Isarayeli”.+
24 Etthu onihimya awe Yehova, Moopoli anyu,+
Yoowo oopankeni okhuma okathi mwaari anyu mmirimani mwa amaminyu, tiila:
“Miyo ka Yehova, kipanke itthu sootheene.
Ti pani aari ni miyo?
25 Kinnooniherya wiira isinaale sinipaka aya maprofeta oowootha ti seethiru.
Ti miyo kiniwiiriha anahako okhalaka ntoko alolo;+
Ti miyo kiniwaakanyerya asuweli,
Nave kinniiriha osuwela waya okhala etthu ya ololo.+
26 Ti miyo kiniiriha nuulumo na murumeyi aka wiiraneya,
Nave kiniiriha wiiraneya itthu anihimya aya anamitthaka aka.+
Ti miyo kinlavula kihimyaka muttetthe wa oYerusalemu, wiira: ‘Anookhala-wo atthu’,+
Nave kinlavula kihimyaka ipooma sa oYuda, wiira: ‘Sinootthikela otekiwa,+
Kinoolokiherya muttetthe wa oYerusalemu waahononiwe’.+
28 Ti miyo kinimuhimya Kiiru,+ wiira: ‘Owo murumeyi aka,
Nave onimwiira itthu sootheene kiniphavela aka’.+
Ti miyo kinlavula kihimyaka muttetthe wa oYerusalemu, wiira: ‘Onootthikela otekiwa’.
Nave ti miyo kinlavula kihimyaka etemplo, wiira: ‘Alisenso anyu anootekiwa’”.+