Yesaya
58 “Mukhuweleke ni ikuru sanyu sootheene. Muhihiyererye!
Mukhuweleke ntoko nlope.
Mwaaleele atthu aka soottheka saya,+
Mwaaleele atthu a Yakobe itampi saya.
2 Nihiku ti nihiku, awo annikaavya,
Nave anihimya wiira anniphavela osuwela itthu sinikisivela,
Okhalaka ntoko wiira ta nloko nneettela exariya,
Ni khiyaatonko okhootta exariya ya Muluku aya.+
Awo anikivekela wiira kiphukeleke mwa xariya,
Okhalaka ntoko vanimwaasivela omwaattamela Muluku.+
3 Vano anihimya wiira: ‘Xeeni muhinniweha anyu okathi nintthukwa ahu?+
Nave xeeni muhiniweha anyu okathi nniixooniha ahu owereya?’+
Mwaha woowi nihiku munitthukwa anyu, muniphavela itthu sinoosivelani paahi,
Nave munnaahaaxa anamuteko anyu.+
4 Okathi munitthukwa anyu, munninyakulihana ni owana,
Nave munnimanana vanceene.
Moota munitthukwa anyu olelo-va, muhilipelele wiira ovekela wanyu onoophiya wiirimu.
5 Kiireke otthukwa onikisivela onikhala siisa?
Kiireke nihiku munitthukwa anyu, muniirela paahi wiixooniha owereya,
Ni weetta muuramme ene ntoko malaxi oorakama,
Ni wumpaathela isaakho ni wummaathi vattuurwani?
Munuupuwela wiira mahiku awo munitthukwa anyu annimusivela Yehova?
6 Nnaari! Enamuna ya otthukwa enikisivela, tiila:
Okumiha ikwirinti sa otakhala,
Otaphula mikhoyi sa mwiri oniteexaniwa miritti soolemela,+
Waataphula ale yaahaaxiwa,+
Ni wunta eriyari mwiri oniteexaniwa miritti soolemela;
7 Okawana eyoolya* anyu ni atthu avoliwe etala,+
Owaakhela vate vanyu atthu oohaawa ni ale ahirina opuro wookhala,
Waavaha ikuwo ale ahirina etthu yoowara,+
Ni ohihiya omuthokorerya mukhwiinyu.
8 Mwiira siiso, waarya wanyu onookokola ntoko oxa.+
Munoopenuxiwa voowaakuveya.
Exariya enrowa weettaka ohoolo wanyu,
Nave ovuwa wa Yehova onrowa okhala ottuli wanyu.+
9 Nyuwo munimwiihanaka, nto Yehova onimwaakhulaka;
Munimwiihana nvekelaka okhaliheriwa, owo onoohimya wiira: ‘Miyo kiri va!’
Akhala wiira munoovenxa miritti sinaalemela atthu,
Ni ottharuwa omuhimyana itthu ni omulavulela mutthu moolumo ootakhala,+
10 Akhala wiira munonvaha mutthu ovoliwe etala etthu yeeyo nyuwo-tho muniphavela anyu,+
Ni munimwaavaha eyoolya enaaphiyerya atthu oohaawa,
Nto muthuko anyu onimwaaryaka hata veepiphini.
Nave epiphi anyu, enrowa okhalaka ntoko othana eriyari.+
11 Okathi wootheene, Yehova onrowa oweettihakani,
Nave onimookhapelelakani, hata muri ene opuro woowuuma.+
Owo onoolipiha makhuva anyu,
Ni munrowa olikanaka ni exarti enikhuwariwa saana,+
Ntoko ehime* ehiniwelela maasi.
12 Mwaha wa nyuwo, milepe sa* khalai sinootthikela-tho otekiwa,+
Nave munootthikela waateka alisenso yaaphweeyale okhuma khalai.+
Nyuwo munrowa wiihaniwaka okhala namalokiherya a ixiri soophweeya,*+
Nave atthu anootthikela okhala mukerekhere mwa istaraata munrowa anyu olokiherya.
13 Akhala wiira munoottittimiha nihiku na saabadu, munakhootta ophavela itthu sinoosivelani, nihiku naka nooreerihiwa,+
Mwathokorerya nihiku na saabadu okhala nihiku na ohakalala vanceene, nihiku nooreerihiwa na Yehova, nihiku nuulupale para nyuwo,+
Nave mwattittimiha nihiku nno, ohiya ophavela itthu sinoosivelani ni olavula moolumo eethiru,
14 Nto nyuwo munoohakalalaka vanceene mwaha wa Yehova,
Nave kinoowiirihani weettaka vasulu va miyaako.+
Kinoowiirihani opuha itthu ohiyeriwe awe muhavinre anyu Yakobe.+
Yehova tonihimya siiso”.