Amoosi
7 Etthu Pwiya Muulupalexa Yehova aakoonihenrye awe, tiila: Owo aahikumiherya muttitthi wa nasope okathi ipyo sookiserya* waaliwa saapacerya aya wunnuwa. Eyo yiiraneyale nuumala wiikitthiwa malaxi a mwene. 2 Okathi nasope owo aamalinhe awe okhuura malaxi valaponi, kaahihimya wiira: “Khoo Pwiya Muulupalexa Yehova, xontte, mwaalevelele!+ Atthu a osuulu wa Yakobe anrowa woopowa sai?* Awo kharina owerya!”+
3 Nto Yehova aahithokorerya mwaha owo.+ “Eyo kheniiraneya”, onihimya Yehova.
4 Etthu Pwiya Muulupalexa Yehova aakoonihenrye awe, tiila: Pwiya Muulupalexa Yehova aahikumiherya ehukhumu orumeelaka mooro. Mooro owo waahiweleliha maasi oowiixa ni aahipaha mpantta mmosa wa elapo. 5 Moottharelana, kaahihimya wiira: “Khoo Pwiya Muulupalexa Yehova, xontte, muhiire siiso!+ Atthu a osuulu wa Yakobe anrowa woopowa sai? Awo kharina owerya!”+
6 Nto Yehova aahithokorerya mwaha owo.+ “Nave eyo kheniiraneya”, onihimya Pwiya Muulupalexa Yehova.
7 Etthu aakoonihenrye awe, tiila: Kaahinweha Yehova eemenle ene vaxirini yaatekiwe orumeeliwaka mukhoyi wa epurumu, nave owo aahikuxa mukhoyi wa epurumu mmatatani. 8 Moottharelana, Yehova aahikikoha oriki: “Amoosi, exeeni muniweha anyu?” Miyo kaahaakhula wiira: “Kiniweha mukhoyi wa epurumu”. Nto, Yehova aahihimya wiira: “Kinoohela mukhoyi wa epurumu eriyari ya atthu aka aisarayeli. Nkinkhala-khala kaalevelelaka.+ 9 Mapuro oorakamela osulu a Isaakhi+ anoopwexakasiwa, nave mapuro oowaarya a Isarayeli anoohononiwa.+ Nto, miyo kinimoorwa ni espaata wiira kipwetexe etthoko ya Yerobowamu”.+
10 Namukuttho Amaziya a oBeteli,+ aahimuroihela Yerobowamu+ mwene a Isarayeli, moolumo ala: “Amoosi onnoorukunuwelani eriyari ya atthu a nloko na Isarayeli.+ Atthu a elapo ela khaniwerya ovilela moolumo+ ootheene a Amoosi. 11 Enihimya awe Amoosi, tiila: ‘Yerobowamu onimwiiviwa ni espaata, nave atthu a Isarayeli anookumihiwa elapo aya aroihiwaka weepotthani’”.+
12 Vano Amaziya aahimuhimeerya Amoosi wiira: “Nyuwo mulipa onisuwela otaphulela itthu ooniheriwe awe ni Muluku, mukhume va, muroweke elapo ya oYuda mwakhaleke* weiwo, nave mwalavuleke eprofesia weiwo.+ 13 Masi muhitthikele olavula eprofesia oBeteli,+ okhala wiira opuro woowaarya wa mwene,+ nave etemplo nloko nootheene ninthukumana aya”.
14 Moottharelana, Amoosi aahimwaakhula Amaziya wiira: “Miyo khahiyo kaari profeta nnakhala mwaana a profeta, kaari makampusi,+ nave kaakhapelela miri sa ifiiku. 15 Masi Yehova aahikikuxa kaakhapelela aka inama. Siiso Yehova aahikileela wiira: ‘Murowe mwaaleeleke eprofesia atthu aka aisarayeli’.+ 16 Vano, mwiiwe moolumo a Yehova: ‘Nyuwo munihimya wiira “muhilavule eprofesia mwaavirikanyaka atthu a Isarayeli,+ nave muhilaleye+ mwaavirikanyaka atthu a etthoko ya Isaakhi”. 17 Masi, etthu onihimya awe Yehova, tiila: “Amwaarinyu anrowa okhala namararuwa a opooma, aniinyu axilopwana ni aniinyu axithiyana animwiiviwa ni espaata. Elapo anyu enookawanyiwa ni enoophimmwa ni mukhoyi, nave nyuwo munrowa okhwa elapo yoohireerihiwa. Nto, atthu a Isarayeli anookumihiwa elapo aya aroihiwaka weepotthani”’”.+