Zakariya
12 Moolumo a Muluku:
“Ala moolumo a Yehova anaahimya aisarayeli.
2 Kinoomwiiriha Yerusalemu okhala ekaalisi* ya eviinyu eniwiiriha atthu amurukurenrye ohapaliwa. Nave oYuda ni oYerusalemu onoorukureriwa.+ 3 Nihiku nlo, kinoomwiiriha Yerusalemu okhala ntoko nluku noolemela para atthu ootheene. Mweekeekhai, atthu ootheene anrowa oteexa nluku nlo anoovulala vanceene,+ nave maloko ootheene a mulaponi anoothukumanyiwa wiira awane ni nluku nlo”.+ 4 Yehova onihimya wiira: “Nihiku nlo, kinimwiiriha ikhavalo sootheene woova ni kinoowiiriha alipa-ooweettiha ikhavalo iyo okhwa anepa.* Kinoowehaka oratteene etthoko ya Yuda, masi kinimwiiriha ohoona ikhavalo sootheene sa atthu. 5 Nave maxeefi a oYuda anrowa ohimyaka vamurimani vaya wiira: ‘Atthu anikhala oYerusalemu tari ikuru sahu, mwaha wa Muluku aya, Yehova a anakhotto’.+ 6 Nihiku nlo, kinoowiiriha maxeefi a Yuda okhala ntoko makhala a mooro eriyari ya ikhuni, ni ntoko muthuko onivarela eriyari ya mavisi a ipyo,+ nto awo animwaapaha atthu ootheene yaarukurenrye, ari moono woolopwana ni moono woothiyana.+ Atthu a oYerusalemu anootthikela okhala opuro aya, oYerusalemu.+
7 Yehova onrowa opacerya woopola itenta* sa Yuda, wiira oreera wa empa ya Davidi ni oreera wa atthu a oYerusalemu ohikhale wuulupalexa ovikana oYuda. 8 Nihiku nlo, Yehova onoowaakiherya atthu anikhala oYerusalemu.+ Nihiku nlo, ole ohanle omora eriyari aya, onrowa okhalaka ntoko Davidi, nave empa ya Davidi enrowa okhalaka ntoko Muluku, ntoko nlaikha na Yehova nnaahoolela.+ 9 Mweekeekhai, nihiku nlo kinoopwetexa maloko ootheene anrowa otuphela oYerusalemu.+
10 “Miyo kinimwaavaha ikuru saka atthu a etthoko ya Davidi, ni atthu anikhala oYerusalemu. Nave kinooweemererya ni kinimwaawiriyana okathi anikixonttela aya. Awo anonweha ole amuhomme aya,+ nto animwiikhupanyerya mwaha wa yoowo ntoko yaarowa aya wiikhupanyerya mwaha wa mwanaya mmoseene. Anoomunlela vanceene ntoko yaarowa aya omunlela mwanaya oopacerya oyariwa. 11 Nihiku nlo, wiikhupanyerya oYerusalemu onrowa okhala wuulupale, ntoko wiikhupanyerya wiiraneyale oHadadirimoni, opuro woowaataleya wa oMegido.+ 12 Elapo ela enimwiikhupanyerya, khula emusi enimwiikhupanyerya mekhaya: emusi ya Davidi enimwiikhupanyerya mekhaya, nave axaaraya animwiikhupanyerya mekhaya; emusi ya Natani+ enimwiikhupanyerya mekhaya, nave axaaraya animwiikhupanyerya mekhaya. 13 Emusi ya Levi+ enimwiikhupanyerya mekhaya, nave axaaraya animwiikhupanyerya mekhaya; emusi ya aximeyi+ enimwiikhupanyerya mekhaya nave axaaraya animwiikhupanyerya mekhaya; 14 imusi sootheene sihanle, khula emusi enimwiikhupanyerya mekhaya, nave axaaraya animwiikhupanyerya mekhaya.