Silempwale ni Marko
2 Nuuvira mahiku vakhaani, Yesu aahitthikela oKafarnawu, nto atthu yaahiiwa wiira owo aari owaani.+ 2 Siiso, yaahithukumana weiwo atthu anceene, mpakha ohiphwanyaneya opuro nnakhala vamukhora. Nto, Yesu aahipacerya waalaleerya atthu awo masu a Muluku.+ 3 Aahiruuhiwa mulopwana oorakala, aateexiwe ni alopwana axexe.+ 4 Masi okhala wiira khiyaawerya ompixa opuro aari awe Yesu, mwaha wa muttitthi wa atthu, yaahiwela vampani avenula nipatho, eluluwanyaka vaavale vaari awe Yesu. Nto yaahikuruxa nrepa naataleliwe awe* mulopwana owo. 5 Okathi Yesu oonale awe waamini waya,+ aahimuhimeerya mulopwana ole oorakala wiira: “Mwanaka, itampi sanyu sooleveleliwa”.+ 6 Vano, yaahikhala weiwo alipa-oowiixuttiha nlamulo akina, yaawo yaakilanthi anuupuwela vamurimani vaya, yiiraka:+ 7 “Xeeni mutthu ola onilavula awe siiso? Ola onninveeha Muluku. Ti pani oniwerya olevelela itampi, ohikhanle Muluku paahi?”+ 8 Niinaano-ru, Yesu aahisuwela vamurimani vawe itthu yuupuwela aya. Nto, aahaakoha wiira: “Xeeni munuupuwela anyu itthu iya vamurimani vanyu?+ 9 Yookhweya tiivi? Niireke omwiirela mulopwana ola oorakala wiira: ‘Itampi sanyu sooleveleliwa’, aahiiso ohimya wiira: ‘Mweemele, mukuxe nrepa nanyu,* mweetteke’? 10 Masi wiira musuwele wiira Mwaana a Mutthu+ ookhalana owerya woolevelela itampi valaponi . . .”.+ Yesu aahimuhimeerya mulopwana ole oorakala, wiira: 11 “Kinooleelani wiira: Mweemele, mukuxe nrepa nanyu,* muroweke owaani”. 12 Niinaano-ru aaheemela, okuxa nrepa nawe,* onarowa ooniwaka ni atthu ootheene. Nto atthu awo, yaahitikinihiwa vanceene, anapacerya onvuwiha Muluku, yiiraka: “Khanitonko woona etthu siisa”.+
13 Okathi mukina Yesu aahirowa okerekhere wa ephareya. Muttitthi wootheene waanirowa vaari awe, nto owo aaniwiixuttiha. 14 Aviraka, Yesu aahimoona Levi, mwaana a Alfeyo, okilanthi ene opuro waaliviwa mpoosito, omwiirela: “Mukhale mwiixutti aka”. Nto Levi aahivenya, onamutthara Yesu.+ 15 Ohoolo waya, okathi Yesu aalya awe* vatthokoni va Levi, alipa-ooliviha mpoosito anceene ni anatampi, yaahirwa analya* vamosa ni Yesu ni awiixutti awe. Vano atthu anceene yaahikhala awiixutti awe.+ 16 Masi, nuumala alipa-oowiixuttiha nlamulo a afarisi, woona wiira Yesu aalya ni anatampi ni alipa-ooliviha mpoosito, yaahaakoha awiixutti awe wiira: “Xeeni mwiixuttihi anyu onilya awe ni alipa-ooliviha mpoosito ni anatampi?” 17 Nuumala Yesu wiiwa eyo, aahiwaakhula oriki: “Atthu akumi khanirowa wa meetiku, masi aretta tanirowa. Miyo nkirwenle owiitthana anaxariya, masi kirwenle owiitthana anatampi”.+
18 Vano, awiixutti a Yohani ni afarisi yaanitthukwa. Nto yaahimwaattamela Yesu, anamukoha ariki: “Xeeni awiixutti a Yohani ni awiixutti a afarisi anitthukwa aya, masi awiixutti anyu ahinatthukwa?”+ 19 Yesu aahaakoha wiira: “Niireke apatthani awe mutheli+ annitthukwa, nlelo ari ene ni mutheli? Awo khanitthukwa akhala wiira mutheli ori naawo. 20 Masi anoophiya mahiku aniira aya yaakhiwe mutheli,+ nto nihiku nenlo tanrowa aya otthukwaka. 21 Khuuvo onikuxa ekuwo esya onattotthela vakuwoni ya khalai. Apaka eyo, ekuwo eyo esya enootthikelana mpakha okhera ekuwo ya khalai. Vano nipuro nlo naakhereyale, nnimuncerereya.+ 22 Nave-tho, khuuvo mutthu onihela eviinyu ya niinaano mirupa sa khalai sa eviinyu.* Apaka eyo, eviinyu enoophula mirupa iyo, vano eviinyu ni mirupa, sinoohononeya. Masi eviinyu ya niinaano, eniheliwa mirupa isya”.
23 Nto, okathi Yesu aavira awe imatta sa etiriku esaabadu, awiixutti awe yaahipacerya ovurula makala a etiriku, yeettaka.+ 24 Vano afarisi yaahimukoha Yesu wiira: “Mooneke! Xeeni awiixutti anyu anipaka aya etthu enikhoottihiwa ni nlamulo ovara esaabadu?” 25 Yesu aahiwaakhula wiira: “Khamunasome ele Davidi ni atthu aarina awe, yaapanke aya okathi yahaarina aya etthu ni yaavoliwe aya etala?+ 26 Khamunasome yoowiiraneya enimuromola Abiyatari,+ mukhulupale a anamukuttho, okathi Davidi aakenle awe mpaani mwa Muluku, okhuura iphaawu saavahiwa Muluku, nave aavaha alopwana aarina awe? Awo khiyeemereriwa okhuura iphaawu iyo, maana anamukuttho paahi ti yeemereriwa”.+ 27 Vano Yesu aahaahimeerya wiira: “Esaabadu ekhumelenle mwaha wa mutthu,+ ohiya mutthu mwaha wa esaabadu. 28 Tivonto, Mwaana a Mutthu, nave-tho tori Mwaneene esaabadu”.+