Yesaya
27 Nihiku nno, Yehova onoorumeela espaata awe yoowiitha, yuulupale ni yoolipa,*+
Wiira ommane Leviyataani,*
Enowa yoowaakuva weetta ni eninyokolowa.
Owo onimwiiva, enowa yuulupale yeeyo enikhala mphareya.
2 Nihiku nlo, mmwiipele nsipo nni:
“Ematta ya ewuuva, eniruwerya vanceene!+
3 Miyo Yehova, kinnikhapelela eyo.+
Khula okathi kinnihela maasi.+
Kinnikhapelela ohiyu ni othana,
Wiira ohikhale mutthu onrowa ohonona.+
4 Miyo nkinanariwe.+
Akhala nwanani onrowa ottiyelela ephiro aka ni miiwa ni malaxi,
Miyo kinoonyakela iyo sootheene ni kinoopaha ni mooro.
5 Ohiya-vo, nwanani owo otthyawele empa aka yoolipihiwa.
Ophavele okhalana murettele ni miyo;
Aayo, okhalane murettele ni miyo”.
6 Mahiku anirwa, Yakobe onookhalana mitathaari,
Isarayeli onoophuwa ni onookhalana ifilori,+
Osuulu wa Isarayeli, onimwaatta mpakha osareya mulaponi.+
7 Niireke nave-tho owo ohaana omaniwa vanceene?
Aahiiso ohaana wiiviwa siiso mwa enamuna yootakhala?
8 Munimwaakumiherya ehukhumu atthu a elapo ela, munoowoomola mwaakhuwelelaka ni nwoopopihaka.
Nave nihiku enoopa aya epheyo ya mpantta onikhuma nsuwa,+ owo onoowoomola ni iphumu sawe sinceene.
9 Siiso, etampi ya Yakobe enooleveleliwa.+
Etthu enrowa okhumelela nuumala okumihiwa etampi awe, tiila:
Onimwiiriha maluku ootheene a valtaari,
Okhala ntoko maluku ooxiliwa a ekaali,
Nave khasinrowa okhala miri soowuuma sinikokhoreliwa* aahiiso mapuro anipahiwa nsenso.*+
10 Epooma yoolipihiwa, khenrowa okhaliwaka;
Opuro onilyihiwa inama, onoonyanyaliwa ni onrowa okhalaka ntoko othako.+
Mwaaxaana a epooyi onrowa olyaaka ni wumpaathi memmo,
Nave onrowa okhuuraka iritta sa miri.+
11 Okathi iritta iyo saamukhaani sinrowa aya wuuma,
Animoorwa athiyana yintakaseke,
Wiira yapattiheke mooro.
Atthu ala khanisuwela etthu.+
Tivonto Mpattuxa aya, khonrowa waamorela ikharari,
Nave Ole owuupale, khonrowa waareerela murima.+
12 Nihiku nlo, Yehova onootatha mihokorokho siri mmwirini, waattamela muro Eufrate mpakha nxepa na wExiitu.+ Nave nyuwo atthu a Isarayeli, munoothukumanyiwa, muttotteliwaka mmosa-mmosa.+ 13 Nto nihiku nno, nnimoopiwa nlope nuulupale.+ Vano ale anihala okhwa ari elapo ya wAsiiria+ ni ale amwarenle elapo ya wExiitu,+ animoorwa amukokhoreleke Yehova, vamwaako vawe voowaarya oYerusalemu.+