Obadiya
1 Etthu ooniheriwa awe Obadiya* tiila:
Etthu Pwiya Muulupalexa Yehova onilavula awe aahimyaka atthu a wEdomi,+ tiila:
“Nihiiwa ihapari sinikhuma wa Yehova,
Oorummwa namuhupi ohimeerya maloko wiira:
‘Nvenye, niilokiherye wiira nawane ekhotto naawo’”.+
2 “Moone! Kihookhalihani etthu yoohisuwanyeya eriyari ya maloko.
Nyuwo munnithanyiwa vanceene.+
3 Wiisoona wa murima anyu ohoowokani,+
Nyuwo munikhala munikhukuni mwa mwala,
Ni munikhala mapuro oorakamela osulu, muhimyaka vamurimani vanyu wiira:
‘Ti pani onrowa okikuruxela vathi?’
4 Hata mwaatenke empa anyu opuro woorakamela osulu ntoko murumaasi,
Aahiiso mwaapwenhe epuru anyu eriyari ya itheneeri,
Miyo kaamookuruxani”. Yehova tonihimya.
5 “Vaakhanle wiira alatarau ni atakhali yaamoorweelani ohiyu,
Kiira yaarowa okuxa paahi etthu aniphavela aya?
Aahiiso vakhanle wiira alipa-oowuurula ewuuva yaamoorweelani,
Niireke khiyaarowa woohiyeryani iwuuva sikina wiira muttotteke?+
(Nyuwo munoopwetexiwa voomalela!)
6 Tthiri awo aamwaavya vanceene Esawu!
Awo ahaavya oratteene mihakhu sawe soovithiwa!
7 Awo ahookhanyereryani orowa omukanoni.
Ootheene ale yaapanke nivarihano ni nyuwo ahoowokani.
Ale yaapanke murettele ni nyuwo ahooweryani.
Ale anikhuura ephaawu ni nyuwo animooreyani ntthavi,
Masi nyuwo khamunrowa osuwela eyo”.
8 Yehova onihimya wiira: “Kiireke nihiku nlo,
Nkinrowa waapwetexa atthu a miruku a wEdomi?+
Nave kiireke nkinrowa waapwetexa atthu a ankhili muttetthe wa omiyaakoni wa Esawu?
9 Nyuwo atthu a oTemaani,+ anakhotto anyu ootupa animoova,+
Okhala wiira khula mmosa a yaawo onoopwetexiwa muttetthe wa omiyaakoni wa Esawu.+
10 Mwaha wa etthu yootakhala iireliwa awe munninyu Yakobe,+
Nyuwo munimuuliwa muru,+
Nave munoopwetexiwa mahiku ootheene.+
11 Nihiku mweemenle anyu,
Nihiku atthu a elapo ekina yaakunxe aya anakhotto awe yaaroiha weepotthani,+
Okathi amalapo yaakenle aya vamukhora vawe ni avonya isoorti+ oYerusalemu,
Nyuwo mwaalikana ni atthu awo.
12 Muhitteeliweke murima ni axinninyu nihiku anihaawa aya,+
Muhitteeliweke murima ni atthu a oYuda nihiku na otakhaliwa waya,+
Nave muhilavuleke ni wiisoona nihiku nnaaphwanya aya maxakha.
13 Muhiroweke vamukhora wa atthu aka nihiku nnaakhumelela aya ehasara,+
Muhitteeliweke murima ni ohaawa waya nihiku nnaakhumelela aya ehasara,
Nave muhikuxeke mihakhu saya nihiku nnaakhumelela aya ehasara.+
14 Muheemeleke mapuro anikumana aya iphiro wiira nwiive ale yooponwe,+
Nave muhaavahereryeke ale yooponwe nihiku na maxakha.+
15 Tthiri nihiku na Yehova nenlo ninrowa waakhumelela atthu a maloko ootheene, nri vakhiviru.+
Itthu mpanke anyu, ti seiyo munrowa anyu wiireliwa.+
Nave, atthu anoowiirelani itthu simosa-ru nwiirenle anyu atthu akina.
16 Ntoko siisaale mwaawurya anyu eviinyu vamwaako vaka voowaarya,
Ti siiso atthu a maloko ootheene anrowa aya owurya onanariwa waka ntoko eviinyu voohihiyererya.+
Tthiri awo anoowurya ni anoomirya onanariwa waka.
Nto anoolakaseya okhalaka ntoko khanakhale.
Osuulu wa Yakobe onootthikela okuxa itthu saavahiwa aya ntoko yoohiyeriwa.+
18 Etthoko ya Yakobe enrowa okhalaka ntoko mooro,
Etthoko ya Yosefe enrowa olikanaka ni nlumi na mooro,
Nave etthoko ya Esawu enrowa okhalaka ntoko malaxi.
Awo anoopattiha ni anoopaha malaxi awo,
Khuuvo onrowa woopowa a etthoko ya Esawu,+
Okhala wiira Yehova mwaneene tohimmye.
Awo anookuxa muttetthe wa wEfrayimi ni muttetthe wa oSamariya,+
Atthu a oBeniyamini anookuxa oXileyaadi.
20 Ale a opuro ola woolipihiwa yaawo aroihiwe weepotthani,+ eyo piiyo, atthu a Isarayeli,
Anrowa okuxa elapo ya akanaani mpakha oSarefati.+
Nave atthu ari oYerusalemu yaawo aroihiwe weepotthani ni ari oSefaradi, anrowa okuxa ipooma sa oNegebi.+