Mikeya
3 Miyo koohimya wiira: “Xontte, nwiriyane, nyuwo ahooleli a etthoko ya Yakobe,
Ni nyuwo, makhulupale a atthu a Isarayeli.+
Khimwaakhanle oosuwela etthu ya xariya?
2 Masi nyuwo munninyokha etthu yooloka+ ni munniphenta etthu yoohiloka,+
Munnipera esapala ya atthu aka ni munnikumiha ethayi mmakhuvani mwaya.+
3 Nave-tho munnikhuura ethayi ya atthu aka,+
Ni munnaapera esapala.
Munnipwexa makhuva aya ni munnipaka ipetaaso,+
Ntoko etthu yaapeiwale mpanelani, nave ntoko enama enaapeiwa mpanelani.
4 Okathi owo, awo anoomukhuwelela Yehova anvekelaka nikhaliheryo,
Masi owo khonrowa owaakhula.
5 Etthu Yehova onaaleela awe maprofeta anaahapuxa atthu aka,+
Yaawo anilaleya murettele,+ atthu aka ahirina etthu yoolya,+
Nave animukumiherya ekhotto ole ohirina etthu yoohela mwaano, tiila:
6 ‘Ohiyu onookhalaka,+ masi khamunrowa wooniheriwaka itthu ni Muluku.+
Munrowa okhalaka mweepiphini paahi, khamuntthikela-tho waaxerya ehako.
Maprofeta khanrowa woonaka nsuwa,
Nave othana vanrowa oriipaka para awo.+
7 Alipa anisuwela otaphulela itthu anooniheriwa aya ni Muluku aanimuuliwa muru,+
Nave anahako anoonyoonyiwa.
Ootheene aya anoowala eyano,
Okhala wiira khanrowa waakhuliwaka ni Muluku’”.
8 Vano miyo, koosareya ikuru mwaha wa Yehova,
Nave-tho koosareya exariya ni owerya,
Wiira kimuleele Yakobe ikirime sawe, ni kaaleele atthu a Isarayeli yoottheka aya.
9 Xontte, nwiriyane etthu ela, nyuwo ahooleli a etthoko ya Yakobe,
Ni nyuwo anamalamulela a atthu a Isarayeli,+
Muninyokha exariya ni munihonona itthu sootheene sooloka.+
10 Nyuwo munimuteka Siyoni nwiivaka atthu ni munimuteka Yerusalemu ni ohixariya.+
11 Makhulupale* aya aniphuka awehereryaka okunyariwa,+
Anamukuttho aya aniixuttiha awehereryaka oliviwa,+
Hata vari siiso, awo anihimya wiira anlipa ni Yehova, ariki:
“Kiira Yehova ori ni hiyo?+
Khiivo ehasara enrowa onikhumelela”.+