Aamulepenle Awe Tito
3 Muhihiye owuupuxerya axinna wiira emwiiweleleke kuvernu ni makhulupale,+ ekhaleke oolikana ene wiira avareke miteko sooreera, 2 ehinveeheke mutthu, ehinyakulihaneke, masi ekhaleke ooreera murima,+ yooniheryeke okhala oomaala ohoolo wa atthu ootheene.+ 3 Nave-tho, khalai hiyo khinaasuwela etthu, khinaamwiiwelela Muluku, naaniwokiwa ni atthu, naari ntoko ipottha sa itthu sinceene ni naaphavela itthu saanisivela paahi, naavara itthu sootakhala ni naari ananrima, naari atthu oothanyeya, nave naaninyokhana mukina ni mukhwaawe.
4 Masi Muluku, yoowo onnoopola,+ ohaareerela murima apinaatamu ni ohaaphenta. 5 Owo oonoopola mwaha wa omoriwa wawe ikharari,+ ohiya mwaha wa miteko sa xariya nivanre ahu.+ Nave oonoopola okathi aanireerinhe awe, khunikhaliha akumi+ orumeelaka ikuru sawe soowaarya, wiira onikhalihe atthu asya.+ 6 Muluku oomurumeela Yesu Kristu, yoowo onnoopola,+ wiira onivahe voowaatta* ikuru sawe soowaarya. 7 Oopaka eyo wiira nikhale atthu arina nlipelelo na waakhela okumi woohimala oleihenrye awe.+ Hiyo nnoowerya ophwanya okumi owo, mwaha wa onireerela wawe murima vaalupale,+ weiwo onimwiiriha onithokorerya okhala anaxariya.+
8 Moolumo ala ahimmwale, teekeekhai. Nave kiniphavela wiira muthipeleleke wiixuttiha myaha iya, wiira ale animwaamini Muluku, yuupuweleleke ovara miteko sooreera. Itthu iya ti sooreera ni sinnaaphwanyiha mureerelo atthu.
9 Masi muhiye onyakulihana mwaha wa itthu sihirina efaita ni mwaha wa masina a amuhavinre. Nave muhiye owana-wana mwaha wa Nlamulo, okhala wiira itthu iyo ti seethiru ni khasimphwanyiha etthu.+ 10 Akhala mutthu onitumererya soowiixuttiha soowoothiwa,+ musyakeke waataana nuuwo.+ Masi aahiphavele owiiwani nuumala omulopola ekwaha ya nenli,+ muhaana omukumiha mutthu owo mmulokoni, 11 okhala wiira mulopwana owo oohiya waamini ni onnipaka etampi, nave owo oophukeliwa mwaha wa miteko sawe.
12 Okathi kinrowa aka omuruma Artema aahiiso Tiikhiko+ orwa iwo, mwiimananihe wiira nakumane oNikoopoli, maana ti weiwo kilakenle aka oviriha eyiita. 13 Mpake sootheene muniwerya anyu wiira mmukhaliherye Zena, yoowo onisuwela saana Nlamulo, vamosa ni Apolo, wiira ehikhale etthu enrowa waathowa okathi anrowa aya weettaka mukwaha aya.+ 14 Masi mwaatumererye axinna wiira yiixutteke ovara miteko sooreera ni nthiti, wiira yaakhaliheryeke akina anithoiwa.+ Siiso, awo khanrowa woolowelaka muteko wa Muluku.+
15 Ootheene ale ari ni miyo annookhomasani. Mwaavahe makhomaso aka ale anniphenta ni anaamini.
Oreera murima wuulupale wa Muluku okhale ni nyuwo ootheene.