Wahala a Nenli
21 Yosafati aahirowa omumula vamosa ni amuhavinre awe, ovithiwa ni amuhavinre awe epooma ya Davidi. Vano mwanawe, Yorami, aahikhala mwene nipuro nawe.+ 2 Axinnawe, anamwane a Yosafati, yaari ala: Azariya, Yehiyeli, Zakariya, Azariya, Mikhayeli ni Xefatiya. Ootheene ala yaari anamwane a Yosafati, mwene a wIsarayeli. 3 Paapa aya aahaavaha mireerelo sinceene sa eparatha ni sa eweero ni itthu sa efaita yinceene, vamosa ni ipooma soolipihiwa oYuda.+ Masi aahinvaha omwene Yorami,+ okhala wiira aari mwaana oopacerya oyariwa.
4 Okathi Yorami aakunxe awe omwene wa paapa awe, owo aahilipiha omwene awe owiivaka axinnawe ootheene+ ni espaata,* vamosa ni makhulupale makina a wIsarayeli. 5 Yorami aarina iyaakha 32 okathi aakhanle awe mwene, nave aahilamulela iyaakha 8 oYerusalemu.+ 6 Yorami aaneetta ephiro ya mamwene a wIsarayeli,+ ntoko yiirale aya atthu a etthoko ya Akhabi, okhala wiira aahimuthela mwaana mwaamuthiyana a Akhabi.+ Owo aanipaka itthu sootakhala vamaithoni va Yehova. 7 Masi Yehova khaaphavenle opwetexa etthoko ya Davidi, mwaha wa nivarihano aapanke awe ni Davidi,+ okhala wiira aahimuleiherya wiira aamunvaha muthuko, vamosa ni anaawe mahiku ootheene.+
8 Mahiku a Yorami, atthu a wEdomi yaahaarukunuwela atthu a oYuda,+ nave yaahiithanlela mwene aya.+ 9 Tivonto, Yorami ni makumantanti awe yaahilapuwa ni ikaaro saya sootheene sa ekhotto. Vano yaahivenya ohiyu, yaahaatuphela ni yaaxintta atthu a wEdomi yaamurukurenrye ni maxeefi a ikaaro sa ekhotto. 10 Masi atthu a wEdomi annithipelela waarukunuwela atthu a oYuda mpakha olelo-va. Nave-tho okathi ole, atthu a oLibina+ yaahaarukunuwela atthu a oYuda, okhala wiira yaahimunyanyala Yehova, Muluku a amuhavinre aya.+ 11 Nave-tho, owo aahipaka mapuro oorakamela osulu yaakokhoreliwa amuluku eethiru+ omiyakoni wa oYuda wiira owiirihe atthu a oYerusalemu oraruwa ni amuluku akina,* nave aahaathweeleliha atthu a oYuda.
12 Nuuvira okathi, owo aahaakhela moolumo yaalempwale ni profeta Eliya,+ yaahimya wiira: “Etthu onihimya awe Yehova, Muluku a Davidi, muhavinre anyu, tiila: ‘Nyuwo khimweettenle iphiro sa paapa anyu Yosafati,+ nnakhala khimweettenle iphiro sa mwene Asa,+ a oYuda. 13 Masi nyuwo munneettela ephiro ya mamwene a wIsarayeli,+ nave munniwiiriha atthu a oYuda ni atthu anikhala oYerusalemu oraruwa ni amuluku akina+ ntoko atthu a etthoko ya Akhabi ararunwe aya.+ Nave moowiiva axinninyu,+ atthu a etthoko ya paapa anyu, yaawo yaari oolokexa woovikanani nyuwo. 14 Tivo, Yehova onimwaakumiherya maxakha maalupale atthu anyu, aniinyu, axaarinyu ni mireerelo sanyu sootheene. 15 Nave munoophwanya iretta, ohela muhina eretta enrowa woowereyani marupo, yeeyo enrowa wootepelakani khula nihiku, mpakha marupo anyu okhumela ota’”.
16 Vano Yehova aahiwiiriha+ afilisti+ ni atthu a wArabia,+ yaawo yaakhala waattamela wEthiyopia, ophavela omutuphela Yorami. 17 Nto awo yaahituphela oYuda, nave yaahikuxa mireerelo sootheene saari mpaani* mwa mwene,+ vamosa ni anaawe ni axaarawe. Ooponwe paahi aari Yowakhazi,*+ yoowo aari mwanawe mwaamukhaani. 18 Nuumala itthu iya sootheene, Yehova aahimwiiriha Yorami owereiwa eretta ya mmaruponi, ehimpenuuwa.*+ 19 Nuuvira okathi vakhaani, sivinre ene iyaakha piili, marupo awe yaahikhumela ota mwaha wa eretta awe, nto owo aahikhwa ohaawaka vanceene mwaha wa eretta eyo. Nave, atthu khiyaapattinhe mooro munceene omasikhoni wawe, ntoko yaawiirenle aya amuhavinre awe.+ 20 Yorami aarina iyaakha 32 okathi aakhanle awe mwene, nave aahilamulela iyaakha 8 oYerusalemu. Okathi aakhwiiye awe khuuvo aamunlenle. Nto aahivithiwa epooma ya Davidi,+ masi ohiya mahiye yaavithiwa aya mamwene.+