Wahala a Nenli
1 Omwene wa Salomooni mwaana a Davidi waanitepa olipa, nave Yehova Muluku awe aari ni yena ni aanimukhaliha oowerya vanceene.+
2 Salomooni aahiruma wiihaniwa atthu ootheene a Isarayeli: maxeefi a atthu 1.000, maxeefi a atthu 100, alipa-oophuka, makhulupale ootheene a atthu a Isarayeli ni ahooleli a imusi saya. 3 Nuumala-vo, Salomooni ni nloko nootheene naahirowa opuro woorakamela osulu waakokhoreliwa Muluku, oXibeyoni.+ Ti weiwo yaari aya etenta* ya muthukumano ya Muluku eekeekhai, etenta yeeyo Moise murumeyi a Yehova, aapanke awe woothakoni. 4 Masi, Davidi aahikumiha Nivuku na Muluku eekeekhai oKiriyathi-Yarimi,+ oroiha opuro aalokihenrye awe, okhala wiira aaheemexa etenta wiira opwehe nivuku nlo oYerusalemu.+ 5 Vano altaari a ekoopiri+ yoowo aapakiwe ni Besaleli,+ mwaana a Uri, mwaana a Huri, yaapwehiwe ohoolo wa etapernaakulu ya Yehova. Nto Salomooni ni nloko nootheene naanivekela ohoolo waya.* 6 Salomooni aahinvaha Yehova soovaha para opahiwa 1.000 valtaari a ekoopiri,+ yoowo aari ohoolo wa etenta ya muthukumano.
7 Ohiyu ene yoole, Muluku aahimukhumelela Salomooni onamuhimeerya wiira: “Mukivekele etthu muniphavela anyu wiira koovaheeni”.+ 8 Nto Salomooni aahimuhimeerya Muluku oriki: “Nyuwo moomooniherya ophenta wuulupale woororomeleya paapa aka, Davidi,+ nave mookikhaliha mwene nipuro nawe.+ 9 Vano, khoo Yehova Muluku, etthu mmuleihenrye anyu paapa aka Davidi, ekhale etthu yoororomeleya,+ okhala wiira mookikhaliha mwene a atthu ala ahireere waatta, anlikana ni ntthupi niri vatthayani.+ 10 Tivo, mukivahe miruku ni osuwela+ wiira kiwerye waahoolela atthu ala. Tani oniwerya waaphukela atthu anyu ala ahireere waatta?”+
11 Vano Muluku aahimuhimeerya Salomooni wiira: “Okhala wiira eyo ti etthu eniphavela murima anyu ni khamukivekenle mihakhu, mireerelo, ottittimiheya, okhwa ale anoonyokhani nnakhala khamukivekenle okumi munceene, masi nvekenle miruku ni osuwela wiira nwerye waaphukela atthu aka, yaawo kookhalinhaakani mwene aya,+ 12 kinimoovahani miruku ni osuwela, masi-tho kinimoovahani mihakhu, mireerelo ni ottittimiheya, waavikana mamwene ootheene mwaaranttenle anyu, ni ale anrowa okhumelela muhoolo”.+
13 Vano Salomooni aahihokolowa opuro woorakamela osulu waakokhoreliwa Muluku oXibeyoni,+ ohoolo wa etenta ya muthukumano onarowa oYerusalemu, weiwo aalamulela awe aisarayeli. 14 Salomooni aanitepa wiithukumanyerya ikaaro sa ekhotto ni ikhavalo. Owo aahikhalana ikaaro sa ekhotto 1.400 ni ikhavalo* 12.000.+ Nave aanipweha ikaaro iyo sa ekhotto ni ikhavalo mpooma+ ni oYerusalemu waattamela wa mwene.+ 15 Mwene aahisariha eparatha ni eweero oYerusalemu, ntoko maluku,+ nave aahisariha matera a eseeturu, ntoko miri sa ifiiku sa oXefela.+ 16 Ikhavalo sa Salomooni saakumihiwa wExiitu.+ Ekurupu ya alipa a nakoso a mwene, yaanithuma makoto a ikhavalo* ni eperesu yaakhala aya.+ 17 Khula ekaaro ya ekhotto yaakumihiwa wExiitu, yaakhala musurukhu 600 wa eparatha, nave ekhavalo yaakhala musurukhu 150 wa eparatha. Nuumala-vo, yaanaaroihela mamwene ootheene a ahiti ni mamwene a oSiiria.