Yoobi
11 Sofaari+ a oNaama aahimwaakhula wiira:
2 “Munoona wiira moolumo ala ootheene khamunrowa waakhuliwa,
Aahiiso munoona wiira olavula vanceene onnimwiiriha mutthu okhalana erasau?*
3 Munuupuwela wiira moolumo anyu eethiru animwaamaaliha atthu?
Niireke khuuvo onrowa woopwapwelani mwaha wa moolumo anyu ooveeha?+
4 Nyuwo munihimya wiira: ‘Etthu kiniixuttiha aka ti yooloka,+
Nave ka mutthu ooreera vamaithoni vanyu’.+
5 Vaakhanle wiira Muluku oolavula ni nyuwo,
Nave oohula eyano awe wiira olavule ni nyuwo!+
6 Nto owo aamooleelani esiiri ya ankhili,
Okhala wiira ankhili eekeekhai khahiyo tookhweya.
Nave nyuwo mwaamusuwela wiira Muluku onniliyala itampi sanyu sikina.
7 Niireke munniwerya osuwela itthu soovila sa Muluku,
Aahiiso osuwela itthu sootheene sa Muluku Oowerya Sootheene?
8 Awo toorakama ovikana erimu. Etthu xeeni mukhanle anyu oopaka?
Awo toowiixa ovikana mahiye.* Etthu xeeni mukhanle anyu oosuwela?
9 Awo toowunnuwa ovikana elapo,
Nave toowaatta ovikana ephareya.
10 Akhala wiira Muluku onnoorwa wiira omutthukwe mutthu ni omuroihe otripunaale,
Ti pani okhanle oomukhoottiherya?
11 Okhala wiira owo onnaasuwela atthu oowootha.
Okathi oniweha awe itthu sootakhala, niireke owo khonisuwela?
12 Mulolo onoowerya okhalana ankhili,
Vakhala wiira puuru onoowerya omutothola mutthu.
13 Vaakhanle wiira nyuwo moolokiherya murima anyu,
Ni muhookolela matata anyu wa Muluku.
14 Vakhala wiira ntata nanyu ninnivara etthu yootakhala, murihele etthu eyo ottaiwene,
Nave muheemererye etthu yootakhala ekelaka mutentani* mwanyu.
15 Mwiirale siiso, mwanwerya weemexa muru anyu, muhuuliwaka muru;
Mwanwerya weemela muhoovaka etthu.
16 Nto munrowa oliyala mixankiho sanyu,
Munrowa wuupuwelaka mixankiho iyo ntoko maasi avinre.
17 Okumi anyu onrowa waaryaka ovikana nsuwa na othana eriyari;
Hata ekhalaka epiphi, vanrowa okhalaka ntoko voosiisu.
18 Nyuwo munoororomelaka, maana mookhalana nlipelelo,
Nave munoowehaka ipantta sootheene ni munoorupaka ni murettele.
19 Munimumpaathiki ohikhanle mutthu onrowa owoopopihakani,
Nave atthu anceene animoophavelakani wiira mwaareerele murima.
20 Masi maitho a atakhali khanrowa woonaka;
Awo khanrowa ophwanya opuro wootthyawela,
Anrowa olipelelaka okhwa paahi”.+