Yoobi
22 Elifaazi+ a oTemaani aahaakhula wiira:
2 “Niireke pinaatamu onnivareleya muteko para Muluku?
Niireke mutthu orina miruku, onniwerya omukhaliherya Muluku?+
3 Niireke Muluku Oowerya Sootheene onnixikha vakhala wiira mwa naxariya,
Aahiiso ororomeleya wanyu onnimphwanyiha mureerelo?+
4 Niireke Muluku onimoovahani ehukhumu
Ni onimooroihani otripunaale mwaha woowi munnimuttittimiha?
5 Kiira ohoovahani ehukhumu mwaha wa otakhala wanyu wuulupale,
Ni mwaha wa itampi sanyu okhala soowaatta?+
6 Munnikuxa neemexeryo na mukhwiinyu vahikhanle nthowa,
Nave munniwaakha atthu akina malaya aya, munaahiya ahiwanre etthu.+
7 Nyuwo khamunaavaha maasi atthu ootemwa,
Nave munnikhootta waavaha yoolya atthu avoliwe etala.+
8 Elapo ti ya atthu oowerya,+
Ni anikhala-mo ti yaale anooniwa okhala a faita.
9 Masi nyuwo moowoomola athiyana anaamukhweli matata-ru,
Nave muhintakasa miyoono sa anamwane ahirina apapaya.*
10 Tivo murukureriwe anyu ni miraakho,*+
Nave munoopopihiwa anyu ni itthu soowoopiha;
11 Tivonto eri aya epiphi yuulupale mpakha muhinawerya woona,
Nave maasi manceene anookhuneelaayani.
12 Muluku ori osulu, wiirimu,
Nave nwehe moota itheneeri sirakamenle aya musulu.
13 Masi nyuwo munihimya wiira: ‘Niireke Muluku onnisuwela etthu apinaatamu anivara aya?
Niireke wiira owo onoowerya ophukela ottiyeleliwe ene ni meeku ooriipela?
14 Meeku annimuttiyelela, ohinawerya woona,
Okathi oneetta awe vasulu va erimu’.*
15 Niireke wiira nyuwo munootthara iphiro sa khalai,
Seiyo atthu ootakhala yeetta aya?
16 Atthu awo ti yaale okumi aya waavukuliwe,
Ti yaawo yaakhumpwale ni maasi,*+
17 Awo yaanimwiirela Muluku eekeekhai wiira: ‘Munihiye mekhihu!’
Nave-tho yaaniira: ‘Muluku Oowerya Sootheene onrowa oniiriha exeeni?’
18 Masi, ti yoowo aasariha ipa saya ni itthu sooreera.
Miyo nkirina muupuwelo owo wootakhala.
19 Anaxariya anooweha opwetexiwa wa atthu awo ni anootthapa,
Nave atthu ahirina mulattu animwaatheya, yiiraka:
20 ‘Awanani ahu aapwetexiwa,
Nave mooro onoopaha itthu saya sihanle’.
21 Mmusuwele Muluku, nto nyuwo munookhala ni murettele;
Nave sinimookhumelelani itthu sooreera.
22 Mweemererye nlamulo ninkhuma mwaano mwawe,
Nave musuke moolumo awe vamurimani vanyu.+
23 Mwahokolowela wa Muluku Oowerya Sootheene, munoottikiheriwa mukhalelo anyu wa khalai;+
Mwamaliha ohikhala exariya mutentani* mwanyu,
24 Mwarihela eweero anyu vatthayani,
Ni mwarihela eweero ya wOfiri+ muxepani,
25 Nto Muluku Oowerya Sootheene onrowa okhala eweero anyu,
Ni onrowa okhala eparatha anyu yooreerexa.
26 Nave munrowa ohakalalaka mwaha wa Muluku Oowerya Sootheene,
Munrowa omwaattamela Muluku muhoovaka etthu.
27 Nyuwo munrowa omuxonttelaka, nto owo onrowa owiiwakani;
Munimwaataphula anatiri anyu.
28 Khula etthu munrowa anyu opakaka, enrowa oweettelakani saana,
Nave ephiro anyu enrowa omwaleeliwaka ni muthuko.
29 Nyuwo mwaixinnuwiha, munooyevihiwa,
Masi owo onoomoopola mutthu oowiiyeviha.
30 Owo onoowoopola ale ahirina mulattu;
Tivonto mwaahipake etthu yootakhala,* nyuwo munimoopoliwa tthiri”.