Yoobi
8 Vano, Bilidaadi+ a oXuuwa,+ aahaakhula wiira:
2 “Munrowa olavulaka siisa mpakha silini?+
Moolumo a mwaano mwanyu anikhala mwa epheyo yootupa!
3 Niireke Muluku onoophuka mulattu ohittharaka exariya,
Aahiiso Muluku Oowerya Sootheene, onoohonona exariya?
4 Akhala wiira aniinyu aamutthekela,
Nto owo ohaahiya wiira aphwanye ehukhumu mwaha wa yeeyo;
5 Masi vaakhanle wiira munoomwaavya Muluku,+
Mmuxonttelaka Muluku Oowerya Sootheene wiira oomoreleni ikharari,
6 Nave vaakhanle wiira mookhalana mweettelo wooloka ni wa xariya,+
Owo aamookhapelelani,
Ni aamoottikiheryani makhalelo mwaarina anyu khalai.
7 Nnaamwi mukhalelo anyu woopacerya waari wooyeva,
Masi ohoolo waya onrowa okhala muulupale.+
8 Xontte, mwaakohe atthu a khalai,
Nave, nvahe ephoole itthu amuhavinre aya aphwannye aya.+
9 Okhala wiira hiyo niyariwe nsana, ni khaninsuwela etthu,
Mahiku ahu mulaponi-mu ari ntoko eruku.
10 Niireke awo khanrowa owiixuttihani,
Ni wooleelani etthu anisuwela aya?*
11 Niireke wiira nammese* onninnuwa nipuro nihikhanle maasi?
Nave malaxi a mmuro anninnuwa vahikhanle maasi?
12 Nlelo ahinatthi ophuwa ni ahinatthi opheliwa,
Annuuma ahinatthi okhumelela makina.
13 Ela teri emalelo* ya mutthu onimuliyala Muluku,
Okhala wiira nlipelelo na mutthu ootakhala murima* nnoomala.
14 Ororomela wawe ti weethiru,
Nave nroromelo nawe ti noohilipa ntoko rattaasi.*
15 Owo onrowa ohaamela empa awe, masi eyo enoomora;
Onrowa weererya ovarelela, masi eyo enoomora.
16 Owo onlikana ni muraapela onoopeliwa nsuwa,
Nave iritta saya sinnimwara-mwareya muxarti.+
17 Nuumala-vo, mitathaari saya sinnitthavelelana vasulu va maluku,
Owo onniphavela empa eriyari ya maluku.
18 Masi wapheliwa* opuro waamenle aya,
Opuro owo onnikhootta ohimyaka wiira: ‘Miyo nkitonko owoonani’.+
19 Ti siiso anrowa aya orimeela atthu animuliyala Muluku;+
Akina anookhumelela ntoko miri sinikhumelela vatthayani.
20 Nto Muluku khonrowa waakhootta atthu oororomeleya;*
Nnakhala khonrowa waakhaliherya* atthu ootakhala,
21 Owo onoowiirihani otheya ni okhuwela vootteeliwa murima,
Nave eyano anyu enookhuwela voohakalala.
22 Ale anoonyokhani animuuliwa muru,
Nave itenta* sa atakhali khasinrowa-tho okhala.