Yesaya
62 Mwaha wa wuupuwela oSiyoni, miyo nkinrowa omaala,+
Mwaha wa wuupuwela oYerusalemu, nkinrowa ophumurya,
Mpakha exariya aya waarya ntoko muthuko onipatta vanceene,+
Nave woopoliwa waya, opatta ntoko muthuko.+
Nyuwo munimwiihaneliwa nsina nisya,+
Nenlo mwaneene Yehova onrowa awe woovahani.
3 Munrowa okhala ekhara yooreera mmatatani mwa Yehova,
Ni nleeso na omwene mmatatani mwa Muluku anyu.
4 Khamunrowa-tho wiihaniwa okhala muthiyana onyanyaliwe,+
Nave elapo anyu, khenrowa-tho wiihaniwa okhala elapo ehinikhaliwa.+
Masi munrowa wiihaniwaka okhala Owo Onnikisivela,+
Nave elapo anyu, enrowa wiihaniwaka okhala Muthiyana Ootheliwa.
Yehova onoosiveliwa ni nyuwo,
Nave elapo anyu enrowa okhala ntoko muthiyana ootheliwa.
5 Siisaale ntoko mmiravo onimuthela awe mwali ohinarupe ni mulopwana,
Aniinyu animoothelani.
Siisaale ntoko noivu onitteeliwa awe murima ni noiva awe,
Muluku anyu onootteeliwa murima ni nyuwo.+
6 Nyuwo Yerusalemu, miyo kihaapweha alipa-oowehaweha vasulu va ixiri sanyu.
Nto mahiku ootheene, othana ni ohiyu, awo ahimaaleke.
Nyuwo munimuttottopela Yehova,
Muhiphumuryeke,
7 Nnakhala muhihiye onvekela, mpakha olokiha muttetthe wa oYerusalemu,
Aayo, mpakha atthu a mulaponi ottottopela muttetthe owo”.+
8 Yehova oovenxa ntata nawe noolopwana, aayo, moono awe woolipa, onalapha iiraka:
“Ipyo sanyu, nkinrowa-tho waavaha awanani anyu wiira alyeeke,
Nnakhala eviinyu anyu ya niinaano, yeeyo muhaawenle anyu, khenrowa owuriwa ni amalapo.+
9 Masi ale anittottela ipyo iyo, tanrowa olyaaka ni anrowa omuttottopelaka Yehova;
Nave ale anittottela ewuuva, tanrowa owuryaka eviinyu eyo vate vaka voowaarya”.+
10 Nvireke, nvireke mmikhora.
Mureerihe ephiro para atthu.+
Mpake estaraata, mpake estaraata.
Nvenxe maluku mustaraatani-mmo.+
Mweemexe esinaale para atthu.+
11 Mwiiwe! Yehova oolaleya mpakha omalenle elapo ohimyaka wiira:
“Muhimeerye epooma ya oSiyoni wiira:
‘Mwiiwe! Woopoliwa wanyu ori vakhiviru.+
Mwiiwe! Owo ookuxa etthu onrowa awe waatthuvela.
Nave etthu eyo onrowa awe waaliva atthu, eri nuuwo’”.+