Nahumi
2 Ohoorwa wa nyuwo* ole onrowa woomwara-mwaryani.+
Mukhapelele mapuro anyu oolipihiwa.
Nwehaweheke istaraata sanyu.
Mwiilokiherye owana ekhotto* ni mwiilipihe ni ikuru sanyu sootheene.
2 Tthiri Yehova onoottikiherya ovuwa wa Yakobe,
Ni onoottikiherya ovuwa wa Isarayeli,
Okhala wiira alipa-oopwetexa ahaapwetexa,+
Nave aahonona iritta saya isya.
3 Makula a wiixaakihana a alopwana awe oowerya, aaxeerihiwa,*
Anakhotto awe ootupa aawarihiwa ekuwo yooxeerya.
Ipantte sa eyuuma sa ekaaro awe ya ekhotto sinaarya ntoko mooro,
Nihiku oniilokiherya awe wiira orowe okhottoni,
Nave mavaka awe a xuniiperu annithukumela.
4 Ikaaro sa ekhotto sinnitthimaka mphironi.
Iyo sinnitthimaka ni sinnikhuruwela mapuro oowaatta atthu.
Sinnaarya ntoko mithuko sinivarela ni sinnaarya ntoko etari.
5 Owo* onoowiihana makhulupale awe.
Awo anoomora okathi onirowa aya
Anootthimaka mpakha vaxirini vawe;
Nto awo anoolipiha exiri eyo.
6 Mikhora sa miro sinoohuliwa,
Nave epalaasio enoopwexakasiwa.
7 Vaahimmwa wiira: epooma ela enlikana ni pwiyamwene uulihihiwe muru.
Owo onookuxiwa, nave ipottha sawe soothiyana sinimunla.
Awo anrowa wunlaka ntoko ipompa, nave anoomana vapeeto vaya.
8 Niinive+ aalikana ni opuro waasukiwa maasi manceene,
Masi vano atthu annitthyawa.
Onnikhuweliwa wiira: “Mweemele vaavo! Mweemele vaavo!”
Masi khuuvo oniweha ottuli.+
9 Mwiiye eparatha, mwiiye eweero!
Mihakhu khasinimala.
Owo oosareya mithinto sootheene sa itthu sa efaita.
10 Epooma yoomwareiwa, khenikhaliwa, yoopwetexiwa!+
Mirima sa atthu sinnithukumela ni woova, makutha aya annittettemela nave iyuunu saya sinnittettemela.
Owiitho waya ohaariipa.
11 Ori woowi opuro oniipitha aya akharamu,+
Opuro yoowo akharamu acikhaani anilya aya, weiwo kharamu onikhuma awe ni mwaaxaana awe,
Ohikhalaka mutthu oniwoopopiha?
12 Kharamu aanivara inama sinceene para axaana awe,
Nave aniiva inama sinceene para akharamu oothiyana.
Owo aanisariha mittupha sawe ni inama.
Nave aanisariha opuro aipitha awe ni inama aavara awe.
13 Yehova a anakhotto onihimya wiira:+ “Mwiiwe! Miyo kinimoovirikanyani.
Kinoopaha ikaaro sanyu sa ekhotto,+
Nave kinoowiiva akharamu anyu acikhaani ni espaata.
Kinoomaliha mapuro anyu ooxaya valaponi,
Nave anamitthaka anyu khantthikela wiiwanyeya”.+