Silempwale ni Luka
16 Nuumala-vo, Yesu aahaaleela awiixutti awe wiira: “Aahikhala mulopwana mmosa thaaciri. Vano owo aahileeliwa wiira: ‘Murumeyi oneettiha etthoko anyu, onnihonona mireerelo sanyu’. 2 Mulopwana owo, aahimwiihana murumeyi awe onamuhimeerya wiira: ‘Etthu eniiwaaka enoohimyani nyuwo, khelonke. Murowe mwalepe erelatoorio ya moota murumenle anyu musurukhu aka, okhala wiira nkiniweemereryani-tho weettiha etthoko aka’. 3 Nto murumeyi ole aahihimya vamurimani vawe oriki: ‘Kipake exeeni, okhala wiira pwiya aka onrowa okihiiha weettiha etthoko awe? Miyo nkinwerya olima, nave okuuliha muru oveka esimola. 4 Ahee! Koosuwela enrowaka opaka, wiira kahiihiwa weettiha etthoko, atthu akaakhele mmaitthokoni mwaya’. 5 Owo aahiwiitthana atthu ootheene yaamukophenle pwiya awe, onamukoha oopacerya wiira: ‘Mmukophenle kavi pwiya aka?’ 6 Owo aahaakhula oriki: ‘Iliituru 2.200* sa makhura’. Murumeyi owo aahimuleela wiira: ‘Mukuxe etukumento anyu ela, mukilaathi, mwaakuveke, mulepe 1.100’.* 7 Nuumala-vo, aahimukoha mukina wiira: ‘Ankhi nyuwo, mmukophenle kavi?’ Owo aahaakhula oriki: ‘Isaakho 100* sa etiriku’. Murumeyi aahimuleela wiira: ‘Mukuxe etukumento anyu ela, mulepe 80’. 8 Pwiya aahimuttottopela murumeyi awe ole, maana nnaamwi aari oohiroromeleya, aahipaka itthu mwa miruku. Tthiri atthu a olumwenku ola,* tootepa okhalana miruku waavikana arumeyi a Muluku.*+
9 “Nave-tho, kinooleelani wiira: Mwaapakeke apatthani murumeelaka mihakhu+ sa olumwenku ola wootakhala,* wiira samala, apatthani awo awaakheleni mapuro oohimala.+ 10 Mutthu oniroromeleya ni itthu saamukhaani, nave onniroromeleya ni itthu suulupale. Masi mutthu ohiniroromeleya ni itthu saamukhaani, nave khoniroromeleya ni itthu suulupale. 11 Tivonto, mwahoonihenrye okhala oororomeleya ni mihakhu sa olumwenku ola wootakhala,* ti pani onrowa woororomelani ni mihakhu seekeekhai? 12 Nave, mwaahiroromeleye ni itthu sa atthu akina, ti pani onrowa woovahani etthu ehiyeriwa anyu?+ 13 Khaavo namuteko oniwerya waavarela muteko mapatarau manli, maana onoomunyokha mmosa, omphenteke mukina, aahiiso ononvarexexa mmosa, omuthanyeke mukina. Nyuwo khamunwerya onvarela muteko Muluku, vamosa ni Mihakhu”.+
14 Vano afarisi, yaawo yaasiveliwa vanceene musurukhu, nuumala wiiwa itthu iya sootheene, yaahipacerya onveeha.+ 15 Yesu aahaahimeerya wiira: “Nyuwo munniixooniherya okhala anaxariya ohoolo wa atthu,+ masi Muluku, onnisuwela mirima sanyu.+ Tthiri itthu sinittittimihiwa ni atthu, ti soothanyeya vamaithoni va Muluku.+
16 “Nlamulo ni soolempwa sa Maprofeta saahilaleiwa mpakha Yohani orwa. Okhuma okathi owo, ihapari sooreera sa Omwene wa Muluku, sinnilaleiwa. Nave atthu a makhalelo ootheene annimananiha okela Moomweneni-mmo.+ 17 Tthiri, vanookhweya erimu ni elapo omala. Masi, khivaniweryaneya omala mpantta mwaamukhaanixa wa eleetera ya Nlamulo, itthu sootheene sihiiraneyale.+
18 “Ole onimwalana* ni mwaarawe onamuthela mukina, onooraruwa. Nave ole onimuthela muthiyana oomwalaniwa,* onooraruwa.+
19 “Aahikhala mulopwana mmosa thaaciri, yoowo aawara malaya a musurukhu munceene. Nave aanihakalala ni opuha khula nihiku. 20 Masi aahikhala nasimola mmosa aihaniwa Laazaro, aasareyale makhwatta, yoowo aamakela oroihiwa vamukhora va thaaciri owo. 21 Laazaro owo aaniphavela olya itthu saamora vameesa va thaaciri ole. Nave alapwa yaanirwa analata makhwatta awe. 22 Nuuvira okathi, nasimola owo aahikhwa, okuxiwa ni malaikha, amuroiha vakhiviru va Abrahamu.*
“Nave-tho, thaaciri ole aahikhwa, khuvithiwa. 23 Mmahiye* mwaari awe, aanihaawa vanceene. Vano owehaka osulu, aahinweha Abrahamu ottaiwene ori ene vamosa ni Laazaro. 24 Nto aahimwiitthana Abrahamu, oriki: ‘Tiithi Abrahamu, mukimorele ikharari, nave mmurume Laazaro owo okwate maasi ni oponta wa ekatha awe, wiira oriirihe nlumi naka, okhala wiira kinoohaawa omooroni nno ohinittipha’. 25 Masi Abrahamu aahihimya wiira: ‘Mwanaka, muupuwele saana wiira, muri ene mukumi mwaahaakhela sooreera sanyu, masi Laazaro aakhenle itthu sootakhala paahi. Vano, owo onoohakalala, nyuwo muhaawaka. 26 Ohiya-vo, eriyari ya hiyo ni nyuwo, nookhala nlitti nuulupale noowiixa. Tivo, khivaniweryaneya atthu okhuma nno alapuwelaka iwo, nnakhala khivaniweryaneya atthu okhuma iwo alapuwelaka nno’. 27 Vano thaaciri owo aahiira: ‘Vakhala wiira ti siiso, weeso kinoovekelani nyuwo tiithi, wiira mmurume Laazaro owo orowa owannyeya apaapa, 28 maana kookhalana axinnaka athanu. Mmurume aalopole saana wiira nave awo ahirwe nipuro nna noohaawiwa’. 29 Masi Abrahamu aahimwaakhula wiira: ‘Awo aakhalana soolempwa sa Moise ni sa Maprofeta. Yiiweleleke seiyo’.+ 30 Nto thaaciri owo aahihimya wiira: ‘Nnaari, tiithi Abrahamu. Tthiri, akhuma mutthu mwa alipa-ookhwa, onarowa waalopola, awo anoorukunuxa mirima saya’. 31 Masi Abrahamu aahimuleela wiira: ‘Vakhala wiira khanrowa wiiwelela soolempwa sa Moise+ ni sa Maprofeta, hata okhumaka mutthu mwa alipa-ookhwa, awo khanrowa okupali’”.