Yesaya
3 Mwiiwe! Pwiya eekeekhai, Yehova a anakhotto,
Onoohiya waakhaliherya ni waavaha itthu, atthu a oYerusalemu ni a oYuda,
2 Onimwaakumiha mittetthe iyo atthu oowerya ni anakhotto,
Alipa-oophuka milattu ni maprofeta,+ anahako ni axitokweene,
3 Maxeefi a atthu 50,+ makhulupale ni alipa-oovaha miruku,
Ni anisuwela saana opaka maxintta ni anisuwela saana weepesa* inowa.+
4 Kinoowiiriha amiravo acikhaani okhala makhulupale aya,
Nave atthu oohiroromeleya, tanrowa waalamulelaka.
5 Atthu anrowa ohaaxanaka yaawo-ru,
Khula mmosa onrowa omuhaaxaka mukhwaawe.+
Mmiravo mwaamukhaani onrowa omutuphelaka mulopwana oowuuluvala,
Nave mutthu ohinooneliwa vatthu, onrowa onvaanyihaka ole oottittimihiwa.+
6 Khula mutthu ononvaraka moono munnawe vatthokoni va apapawe, omuleeleke wiira:
“Nyuwo mookhalana mukhumi, weeso mukhale namalamulela ahu.
Mulamuleleke opuro ola ohononiwe”.
7 Masi nihiku nlo, owo onookhootta ohimyaka wiira:
“Miyo nkinrowa otthukwaka makhwatta anyu;*
Owaani nkirina eyoolya nnakhala ikuwo.
Muhikikhalihe namalamulela a atthu”.
8 Yerusalemu oomora,
Nave Yuda oomora,
Okhala wiira moolumo aya ni miteko saya, sinninvirikanya Yehova;
Awo aamurukunuwela Muluku oowaarya, vamaithoni vawe.+
9 Owiitho waya onnaavaanyiha,
Nave annilaleya itampi saya ohoolo wa atthu ootheene, ntoko aniira aya atthu a oSodoma;+
Awo khaneererya ovitha.
Aatakhaliwa atthu awo, okhala wiira anniikumiherya maxakha!
10 Mwaaleele anaxariya wiira itthu sinooweettela saana;
11 Aatakhaliwa, atthu ootakhala murima!
Maxakha animwaakhumelela atthu awo,
Okhala wiira sinoowiiraneela itthu apanke aya ni matata aya!
12 Atthu aka, annihaaxiwa ni ale anaavarela aya muteko,
Nave annilamuleliwa ni athiyana.
Nyuwo atthu aka, ahooleli anyu anniweettakasihani,
Awo annoothweelelihani.+
13 Yehova onniilokiherya ntoko mulipa-oophuka milattu;
Owo onneemela wiira ohukhumu maloko.
14 Yehova onimwaaphukela axitokweene ni makhulupale a atthu awe.
Owo onihimya wiira: “Nyuwo moopaha ematta ya ewuuva,
Nave mpa mwanyu,+ soosareya itthu nwiiyenrye anyu amasikhini.
15 Yehova a anakhotto, Pwiya Muulupalexa, onihimya wiira:
Xeeni munaanyakatta anyu atthu aka, ni munitepa anyu waahaaxa alipa-oohaawa?”+
16 Yehova onihimya wiira: “Okhala wiira axithiyana a oSiyoni toowiixinnuwiha,
Awo aneetta yeemenxe ene muru,*
Annaasamula alopwana ni moota anaaweha aya, ni anneetta attakalaka,
Yeettaka, annirumiha ipulseera awanre aya mukosani mwaya.
18 Yehova onoovenxa itthu sinaaphwaneliha: ipulseera aniwara aya mukosani,
Maleeso anitthukwana aya muru, ni itthu sikina saaphwaneliha.*+
19 Ni ipirinku, ipulseera, iveewu,
20 Maleeso ni ikwirinti* yaiphwaneliha aya mukosani, ni musako yaatthukwana aya vapeeto,
Ni ifrasku sa iperfuume ni ihirisi sa ikhoropa sa mphareya.
21 Ni anela a mukathani ni ipirinku sa vaphulani,
22 Ni ikuwo sa ofestani, malaya, mikhumi, ni mirupa sa mmatatani,
23 Ni ixipelyu+ saavareliwa mmatatani ni malaya a eliinyu,*
Ni maleeso ni iveewu.
24 Ohiya wunkhelaka makhura a baalsamu,+ awo anrowa wunkhaka etthu yoowuntta;
Ohiya owaraka esintu, anrowa owaraka mukhoyi;
Ikharari saya sooreera sinoomora, ni anookhuma ntari;+
Ohiya owaraka malaya a musurukhu munceene, anrowa owaraka malaya a isaakho;+
Nave ohiya okhalana erutthu yooreera, anrowa okhalana murala.*