Wahala a Nenli
4 Moottharelana, owo aahaapaka altaari a ekoopiri,+ orakama waya waari imeeturu 9, okhuveya waya waari imeeturu 9, nave orakamela waya osulu waari etthu yoowiiraka imeeturu thanu.
2 Owo aahipaka epasiya yuulupale ya maasi yaihaniwa ephareya+ ya ekoopiri. Epasiya eyo yaari yoovilikeya, okhuma mpantta mmosa wa eyano aya mpakha mpantta mukina, waarina imeeturu thanu, orakamela waya osulu waari imeeturu piili ni orukurerya waya waari etthu yoowiiraka imeeturu 13.+ 3 Mukerekhere mwa vathi wa epasiya eyo ya maasi, saahikhala ilatarato saareeriha saalikana ni ikahi.+ Nto wa khula nimeya na emeeturu saahikhala ilatarato 10. Iyo saari mukerekhere mwa epasiya eyo yootheene ni iliinya piili sa ilatarato sa ekahi. 4 Epasiya eyo, yaari vasulu va ipooyi 12,+ tthaaru saaweha onorti, tthaaru saaweha mpantta onikela nsuwa, tthaaru saaweha osuuli, nave tthaaru saaweha mpantta onikhuma nsuwa. Epasiya eyo ya maasi, yaari vasulu va ipooyi iyo. Epantte ya ottuli ya ipooyi iyo, yaari eriyari ya epasiya eyo. 5 Mwiitti aya, waalikana ni wunnuwa wa ntata.* Nave eyano aya, yaari ntoko eyano ya ekaalisi, yaalikana ni efilori ya mmatta. Epasiya eyo, yaanikela iliituru 66.000* sa maasi.
6 Ohiya-vo, owo aahipaka ipasiya 10, opweha thanu moono woolopwana nave thanu moono woothiyana.+ Itthu sootheene saarumeeliwa okathi waavahiwa aya yoovaha para opahiwa, yaarapihiwa memmo.+ Nave, epasiya yuulupale ya ekoopiri yaaheliwa maasi, anamukuttho ti yaarumeela wiira yiirapihaseke.+
7 Moottharelana owo aahipaka mithuko 10 sa eweero,+ moovarihana ni eteseenyu aavahiwe awe,+ nave aahipweha mithuko iyo mutemplo, mithanu moono woolopwana, vano mithanu moono woothiyana.+
8 Nave-tho aahipaka meesa 10 opweha mutemplo, mathanu moono woolopwana, mathanu moono woothiyana.+ Nave-tho aahipaka itixela 100 sa eweero.
9 Moottharelana aahipaka nivate+ na anamukuttho+ ni nivate nuulupale,+ vamosa ni mikhora sa nivate nuulupale. Nto aahisirika mikhora iyo ni ekoopiri. 10 Aahipweha epasiya yuulupale ya ekoopiri yaaheliwa maasi moono woolopwana, eriyari ya osuuli ni mpantta onikhuma nsuwa.+
11 Nave-tho, Hirami aahipaka ikaruma sootheene saarumeeliwa, ipoxolo ni itixela.+
Siiso, Hirami aahimaliha muteko wootheene anvarela awe mwene Salomooni, empa ya Muluku eekeekhai:+ 12 Ipilaari piili+ ni malipiheryo manli yaalikana ni itixela, yaari vasulu va ipilaari iyo piili. Areeti anli+ yaari vasulu va malipiheryo awo manli, yaawo yaari vasulu va ipilaari; 13 mihokorokho 400 siniihaniwa roma+ sa areeti anli, eyo piiyo, iliinya piili sa mihokorokho siniihaniwa roma khula reeti, wiira sikhuneele malipiheryo manli yaalikana ni itixela, yaari vasulu va ipilaari;+ 14 ikarinyu 10 ni ipasiya 10 saari mukarinyuni;+ 15 epasiya yuulupale ya ekoopiri yaaheliwa maasi ni ipooyi 12 saari vathi vaya;+ 16 ikaruma sootheene saarumeeliwa, ipoxolo, ikarfu,+ ni ikaruma sikina, Hirami-Abivi+ aahimpakela mwene Salomooni ni ekoopiri yooreerihiwa, wiira sirumeeliweke empa ya Yehova. 17 Mwene Salomooni aahiruma ototoxiwa ekoopiri eyo, edistritu ya oYordani, opuro waapakiwa mireerelo sa oloko, eriyari ya oSukothi+ ni oSereda. 18 Salomooni aahipaka mireerelo iya sootheene sahaareere waatta. Nto khivaasuweliwa olemela wa ekoopiri yootheene.+
19 Salomooni aahipaka ikaruma iyo sootheene+ wiira sirumeeliweke empa ya Muluku eekeekhai: Altaari a eweero;+ meesa+ yaapwehiwa iphaawu saavahiwa Muluku;+ 20 mithuko ni ixamaniya saya sa eweero yooreerexa,+ wiira sipattihiweke ohoolo wa esaala ya muhina, ntoko yaavekeliwa aya; 21 ni ifilori soothapuluwa, mithuko ni ipanelo saattipihaniwa ntthampo sa eweero, eyo piiyo, eweero yooreera; 22 itisora saathikilaniwa ntthampo noovya, itixela, ikoopho ni ekaruma ya eweero yooreerexa yaaheliwa mooro, mukhora wa empa, mikhora sa muhina wa Nipuro Noowaaryexa+ ni mikhora sa empa ya etemplo, sootheene saari sa eweero.+