Miteko sa Arummwa
9 Masi Saulo aahilakela waahaaxa ni owiiva awiixutti a Pwiya.+ Tivo, aahirowa wa namukuttho muulupale, 2 onvekela ipaphelo wiira ooniherye musinagoga,* ni oDamaasiko. Ipaphelo iyo, saaninvaha owerya wiira aatthukwe ni aaroihe oYerusalemu, alopwana aahiiso athiyana, yaatthara Ephiro ya Apwiya.+
3 Vano, okathi Saulo eetta awe mustaraatani, aattamelaka oDamaasiko, niinaano-ru, waarya waakhuma wiirimu waahimmwaleela.+ 4 Nto owo aahimorela vathi, onaiwa nsu naahimya wiira: “Saulo, Saulo, xeeni munikilupattha anyu?” 5 Saulo aahikoha oriki: “Atokweene, nyuwo mwa pani?” Nsu nlo, naahimwaakhula wiira: “Miyo ka Yesu,+ yoowo munimulupattha anyu.+ 6 Mweemele, mukele mpooma, nto weiwo munooleeliwa etthu yoopaka”. 7 Alopwana yeetta mukwaha ni Saulo, yaaheemela atikinihiwe ene, ahiweryaka ohimya etthu, okhala wiira yaaniiwa nsu, masi khiyaamoona mutthu ene.+ 8 Nto Saulo aaheemela. Nnaamwi maitho awe yaatthukunwe, owo khaawerya woona etthu. Tivo, alopwana ale yaahinvarela ntata, anamuroiha oDamaasiko. 9 Siiso, yaahivira mahiku mararu ohiweryaka woona,+ nave khaalya nnakhala owurya etthu.
10 Aahikhala mwiixutti mmosa oDamaasiko, aihaniwa Ananiya.+ Nto Apwiya yaahimwiihana moolohani, yiiraka: “Ananiya!” Owo aahaakhula oriki: “Miyo-va, Pwiya”. 11 Vano, Apwiya yaahimuleela wiira: “Nvenye, murowe ephiro eniihaniwa Yoowookowa, mwamphavele vatthokoni va Yuda, mulopwana mmosa oniihaniwa Saulo, a elapo ya oTarso.+ Okathi ene yoola, owo onoovekela. 12 Nave moolohani, owo oomoona mulopwana oniihaniwa Ananiya, ophiyaka ni omwiixaatheryaka matata, wiira otthikele woona”.+ 13 Masi Ananiya aahaakhula iiraka: “Pwiya, koowiiwa atthu anceene amulavulaka mulopwana owo ni ahimyaka itthu sootheene sootakhala owiirenle awe awiixutti anyu* oYerusalemu. 14 Nave ohoorwa nno orummwale ene ni makhulupale a anamukuttho, wiira aavare* ootheene ale anromola nsina nanyu”.+ 15 Masi Apwiya yaahimuhimeerya wiira: “Murowe, okhala wiira miyo koomuthanla+ mulopwana owo ntoko evaasu wiira aalaleerye nsina naka, atthu a maloko ootheene,+ vamosa ni mamwene+ ni aisarayeli. 16 Tthiri, miyo kinoomooniherya oratteene itthu sootheene onrowa awe ohaawa, mwaha wa nsina naka”.+
17 Tivo, Ananiya aahirowa, aahikela mpaani, ni aahimwiixaatherya matata Saulo, onahimya wiira: “Saulo, munnaka! Pwiya Yesu, yoowo ookhumelenleni mustaraatani mweetta anyu murwaaka nno, ookiruma wiira mutthikele woona ni musareye ikuru soowaarya”.+ 18 Okathi ene yoowo, saahimora mmaithoni mwawe, itthu saakhala ntoko maapaliwe* a ihopa, onatthikela woona. Nto aahivenya, opatisiwa. 19 Nave aahilya, nuumala-vo aahiphwanya ikuru.
Owo aahikhala mahiku vakhaani ni awiixutti oDamaasiko.+ 20 Moohipisa, aahipacerya omulaleya Yesu musinagoga,* ohimyaka wiira Yesu owo, Mwaana a Muluku. 21 Vano, atthu ootheene yanwiriyana, yaahitikinihiwa vanceene, anahimya wiira: “Ola khahiyo mulopwana yoole oYerusalemu, aalupattha vanceene atthu yaaromola nsina nla?+ Kiira ti yoola orwenle waavara awiixutti a Yesu wiira aaroihe* wa makhulupale a anamukuttho?”+ 22 Masi Saulo, aamutepa osuwela olaleerya saana ni aanaatikiniha ayuda yaakhala oDamaasiko, okathi aawooniherya awe oratteene wiira Yesu ti Kristu.+
23 Nuuvira mahiku manceene, ayuda yaahithukumana, ampaka palano wiira amwiive.+ 24 Masi Saulo aahimusuwela palano owo. Nave-tho, othana ni ohiyu, yaaniwehaweha saana mikhora sa epooma, wiira amwiive. 25 Siiso, ohiyu, awiixutti awe Saulo yaahimuhela muttankani,* ananviriha vaxanelani ya exiri, amukuruxelaka vathi.+
26 Nuumala ophiya oYerusalemu,+ Saulo aaheererya okhala vamosa ni awiixutti, masi ootheene aya yaanimoova, maana khiyaakupali wiira owo aari mwiixutti a Yesu. 27 Siiso, Baarnaba+ aahirwa omukhaliherya Saulo, ni aahimuroiha wa arummwa. Nave aahaahimeerya arummwa moota Saulo aawehale awe Apwiya mustaraatani, ni moota Apwiya+ yaalavunle aya ni Saulo. Aahaaleela-tho moota Saulo aalalenrye awe oDamaasiko, mwa nsina na Yesu, ohoovaka etthu.+ 28 Nto, Saulo aahikhala naawo, nave aaneetta mootaphuwa oYerusalemu, olaleyaka nsina na Pwiya, ohoovaka etthu. 29 Owo aanilavula ni ovaanyihana ni ayuda yaalavula ekereku. Masi awo yaaneererya omwiiva.+ 30 Okathi axinna yaasuwenle aya eyo, yaahimuroiha oKesareya, amuruma orowa oTarso.+
31 Nave, awiixutti ootheene a oYudeya ni oGalileya ni oSamariya,+ yaanikhala ni murettele ni yaanilipihiwa. Okathi yooniherya aya omoova Yehova,* ni yaakhala aya alipihiwaka ni ikuru soowaarya,+ awo yaanitepa wuncerereya.
32 Okathi Pedru eetteetta awe mittetthe sootheene, aahiphiya wa awiixutti* yaakhala oLida.+ 33 Aahimphwanya weiwo, mulopwana mmosa aihaniwa Eneya, yoowo ahaakhuma vakhaamani mwa iyaakha 8, mwaha woowi aari oorakala. 34 Vano Pedru aahimuleela wiira: “Eneya, Yesu Kristu onnoopenuxani.+ Nvenye, mulokiherye ekhaama anyu”.+ Siiso, owo aahivenya moowaakuveya. 35 Okathi atthu ootheene anikhala oLida ni oSaroni yanwenhe aya mulopwana ole, yaahiwaamini Apwiya.
36 Muttetthe wa oYope, aahikhala mwiixutti muthiyana, aihaniwa Tabitha, nsina nenlo nintaphulela “Dorka”.* Owo aanivara miteko sinceene sooreera ni aanaakhaliherya alipa-oohaawa. 37 Okathi Pedru aari awe oLida, Dorka aahiwereiwa ni aahikhwa. Nto murutthu awe waahirapihiwa, waataleliwa ekwartu ya osulu. 38 Muttetthe wa oLida waahaattamela oYope. Nto okathi awiixutti yaiwale aya wiira Pedru aari oLida, yaahaaruma alopwana anli orowa omwiihana, ariki: “Xontte murwe nno, voohipisa”. 39 Vano Pedru aahivenya onarowa ni alopwana ale. Nuumala ophiya, awo yaahimuroiha ekwartu ya osulu. Nto, anaamukhweli ootheene, yaahimurukurerya Pedru, yinlaka. Nave yaanimooniherya malaya ni ikuwo sinceene Dorka aapanke* awe, ori ene mukumi. 40 Nto Pedru aahaaruma atthu ootheene okhumela vate.+ Owo aahikokhora, onavekela. Vano aahirukunuwa onaweha murutthu ole, onahimya wiira: “Tabitha, nvenye!” Siiso, Tabitha aahihula maitho awe, onanweha Pedru. Amoonaka-ru, aahikilaathi.+ 41 Pedru aahinvarelela ntata, khimweemexa. Nuumala-vo, aahiwiihana awiixutti* ni anaamukhweli, onawooniherya Tabitha ori ene mukumi.+ 42 Etthu ela yaahisuweliwa muttetthe wootheene wa oYope. Nto atthu anceene yaahiwaamini Apwiya.+ 43 Pedru aahikhala oYope mahiku manceene ni mulopwana mmosa aavara muteko ni isapala, yoowo aihaniwa Simoni.+