Yesaya
22 Muhupi woophukela oniroiheliwa nxepa, tuula:+
Exeeni yiiraneyale, atthu anyu ootheene awenle aya vampani?
2 Epooma anyu enoosareya onyakuleleya,
Okhuweliwa ni enrowa okhala yoowiixinnuwiha.
3 Makhulupale anyu ootheene anrowa otthyawa hoothe.+
Atthu anyu anoovariwa, hata ohirumeeliwe muura.
Hata atthyawelaka ottaiwene,
Atthu awo ootheene anoovariwa, wiira akhale aperesu.+
4 Tivonto kihimmye aka wiira: “Muhikiwehexexeke,
Kinimunla mwaha wa oriipiwa murima.+
Muheererye okimaaliha,
Mwaha wa opwetexiwa wa atthu aka.+
5 Nlo nihiku na onyakuleleya, oxinttiwa ni oxanka, oxepani,+
Nenlo ninkhuma wa Pwiya Muulupalexa, Yehova a anakhotto.
6 Anakhotto a wElami,+ aakuxa mirupa soosareya mattheere,*
Nave aawela ikhavalo ni ikaaro sa ekhotto sinipuruliwa ni inama,
Nave-tho anakhotto a oKiri+ aalokiherya nikula naya na wiixaakihana.*
7 Maxepa anyu* ooreerexa,
Sinoosareya ikaaro sa ekhotto sinipuruliwa ni inama,
Nave ikhavalo* sinrowa weemela vamukhora.
8 Exiri yaattiyelela oYuda, enoovenxiwa.
“Nihiku nlo, munooweha ikaruma sa ekhotto siri empa eri etakhwa ya oLiibano.+ 9 Nave munooweha iphaka sinceene siri epooma ya Davidi.+ Munoosuka maasi a ehime yaamukhaani.+ 10 Munookontari ipa sa oYerusalemu, nto munoopwexa sikina wiira mulipihe exiri. 11 Nave, eriyari ya ixiri piili, munoopaka epasiya wiira muthukumanyeke maasi a ehime ya khalai. Masi khamunrowa omuroromela Muluku Muulupalexa opanke, nnakhala khamunrowa omuupuwela Muluku, yoowo olakenle opaka, okhuma khalai.
12 Nihiku nlo, Pwiya Muulupalexa, Yehova a anakhotto,
Onimwaaruma atthu wunla ni wiikhupanyerya,+
Omettha mputu ni owara isaakho.
13 Ohiya-vo, atthu anrowa otthapaka ni otteeliwa murima,
Anrowa wiivaka ipooyi ni ipwittipwitthi,
Anrowa okhuuraka enama ni owurya eviinyu.+
Awo anoohimyaka wiira: ‘Weeso nilyeeke ni niwuryeke, okhala wiira meelo ninrowa okhwa’”.+
14 Nuumala-vo, Yehova a anakhotto, aayo, Pwiya Muulupalexa, Yehova a anakhotto, aahikileela owaruni waka, wiira: “‘Nyuwo atthu, etampi ela khamunrowa oleveleliwa mpakha okhwa’”.+
15 Etthu onihimya awe Pwiya Muulupalexa, Yehova a anakhotto, tiila: “Murowe mwakumane ni Xebena,+ yoowo oniweherya etthoko* ya mwene, mmuleele wiira: 16 ‘Exeeni munaavya anyu-va? Nave ti pani oweemerenryeni wiithipela mahiye opuro ola?’ Xebena owo onniithipela mahiye opuro woottukhuwa. Owo onnithipa mahiye awe vamwala. 17 ‘Nyuwo mulopwana, moone! Yehova onimoovarani ooriheleni vathi ni ikuru. 18 Muluku onoowuupaanyani saana ni onimoorihelani nipuro nuulupale, ntoko oniirihiwa awe poola. Nyuwo munrowa okhwa weiwo, nave ikaaro sanyu sa ekhotto sooreera, sinrowa ohala weiwo. Eyo enrowa okhala etthu yoowuuliha muru vatthokoni va pwiya anyu. 19 Nave kinoowaakhani okhulupale anyu ni kinoowoomolani omutekoni wanyu.
20 “‘Mahiku awo, kinoomwiihana murumeyi aka Eliyakiimi,+ mwaana a Hilikiya. 21 Kinonwariha nlaya nanyu ni kinoomutthukwelela oratteene musako anyu,+ ni kinonvaha okhulupale anyu mmatatani mwawe. Owo onrowa okhala paapa a atthu anikhala oYerusalemu ni a nihimo na Yuda. 22 Kinoohela mmakhatani mwawe, exaavi ya empa ya Davidi.+ Owo ahula, khuuvo onrowa owala. Nave awala, khuuvo onrowa ohula. 23 Kinoomukhomakela ntoko epereku ekhomeliwe nipuro noolipa. Onrowa okhala ntoko ehice yoovuwa, munlokoni mwa apapawe. 24 Ovuwa wootheene wa nloko na apapawe, onrowa olipa nuuwo. Anaawe ni osuulu awe, anrowa olipaka nuuwo, siisaale mihasa sootheene saamukhaani, itixela ni mirinki sootheene suulupale sinlipa aya ni epereku sithomeiwe aya.
25 “Yehova a anakhotto onihimya wiira: ‘Epereku yaakhomakeliwe nipuro noolipa enookumihiwa.+ Eyo enimwiikitthiwa ni enoomora, nto itthu sootheene saathomeiwe vaavo, sinoomorela vathi sihononeye, okhala wiira Yehova mwaneene, tolavunle siiso’”.