Yoobi
18 Bilidaadi+ a oXuuwa, aahaakhula wiira:
2 “Munrowa ohimya itthu iya mpakha silini?
Mukooniherye wiira mookhalana ankhili, nuumala-vo nivaaneleke.
4 Hata mwiixoonihaka owereya mwaha wa onanariwa wanyu,
Niireke elapo enoonyanyaliwa mwaha wa mulattu anyu,
Aahiiso myala sinoothaama opuro aya?
5 Aayo, muthuko wa mutakhali onoottipihiwa,
Nave mooro awe onoohiya opatta.+
6 Muthuko wa mutentani* mwawe onoottipha,
Ni muthuko onimmwaleela onoottipihiwa.
7 Owo khoneetta-tho iilipihaka,
Nave apalano awe, anoomukumiherya ehasara.+
8 Inawu sawe sinnimuroiha opuro ori ntthavi,
Nto owo onneetta orowaka muntthavini-mmo.
9 Muraakho onoomutthukwa nnawu nawe;
Nave ntapha nnonvara.+
10 Vathi ohiipithihiwa mukhoyi wiira omukweye,
Nave ephiro awe yooreiwa muraakho.
11 Khula opuro onirowa awe sookhala itthu sinimoopopiha,+
Nave sinnimutthimakela vakhiviru vene.
12 Ikuru sawe sinnimmalela,
Nave ehasara+ enoomwiirihaka otuthunya.
13 Erutthu awe yoosareya makhwatta;
Nave eyo yoophwanyiwa ni eretta yuulupale.
14 Owo onnikumihiwa mutentani mwawe moovareleleya,+
Ni onneetta orowaka okhwa mwa enamuna yootakhala.
15 Atthu ohinaasuwela awe, anookhala mutentani mwawe;
Enxoofere enoomwara-mwareya owannyawe.+
16 Mitathaari sawe sinoonyaala vathi vawe,
Nave iritta sawe sinimuuma vasulu vawe.
17 Mulaponi, atthu anoomuliyala,
Nave mphironi atthu khanrowa osuwelaka* nsina nawe.
18 Owo onimoomoliwa opuro wookokola para mweepiphini,
Nave onimoomoliwa mulaponi mooruwerya.
19 Khonrowa okhalana anamwane nnakhala osuulu eriyari ya atthu awe,
Opuro onikhala awe khonrowa ohala mutthu mukumi.
20 Waphiya okathi awe, atthu a mpantta onikela nsuwa anootikinihiwa,
Nave atthu a mpantta onikhuma nsuwa animoova.
21 Eyo ti etthu eniiraneya ni itenta sa atakhali,
Ni opuro wa ole ohinimusuwela Muluku”.