Silempwale ni Yohani
4 Nuumala-vo, awo yaahaahimeerya afarisi wiira Yesu aahikhalana awiixutti anceene ni aanaapatisa atthu anceene+ onvikana Yohani. Okathi Yesu* aasuwenle awe eyo, 2 (nnaamwi Yesu mwaneene, ahaapatisa atthu, masi awiixutti awe ti yaapatisa) 3 aahikhuma oYudeya, onarowa-tho oGalileya. 4 Masi Yesu aahaana ovira oSamariya. 5 Owo aahiphiya epooma ya oSamariya, yaihaniwa Sikari, waattamela ematta Yakobe anvahale awe mwanawe, Yosefe.+ 6 Yaahikhala weiwo ehime ya Yakobe.+ Vano Yesu, okhulumunwe ene mwaha wa mukwaha eettale awe, aahikilaathi veehimeni* vaavo. Yaari etthu yoowiiraka 12 oora.*
7 Muthiyana mmosa a oSamariya aahirwa orika maasi. Nto Yesu aahinvekela wiira: “Mukivahe maasi oowurya”. 8 (Awiixutti awe yiira aronwe ene opooma, othuma yoolya.) 9 Vano muthiyana ole musamariya, aahimukoha Yesu wiira: “Vaniiraneya sai nyuwo, muri ene muyuda, munakivekela maasi miyo, muthiyana musamariya?” (Okhala wiira ayuda ni asamariya khiyaiwanana.)+ 10 Yesu aahimwaakhula wiira: “Nyuwo khamunisuwela yoovaha Muluku+ onoovahaaweni, nave khamunimusuwela ole oniwiirelani wiira, ‘Mukivahe maasi oowurya’. Mwaamusuwenle, mwaamunvekela, nto owo aamoovahani maasi a okumi”.+ 11 Muthiyana ole aahimwiirela Yesu wiira: “Pwiya, ehime ela khereere wiixa, nave nyuwo khamurina epalti yoorikana maasi. Nto munikumiha vai maasi awo a okumi? 12 Niireke nyuwo ti muulupale onvikana muhavinre ahu Yakobe? Owo tonihiyenrye ehime ela. Nave, owo vamosa ni anaawe ni inama sawe, yaawurya vaava”. 13 Yesu aahimwaakhula oriki: “Ootheene ale anrowa owurya maasi ala, anoovoliwa-tho ntthona. 14 Nto ole onrowa owurya maasi kinrowa aka onvaha, khonivoliwa-tho ntthona.+ Vano maasi kinrowa aka onvaha, anrowa olikanaka ni nipuro nimphattuwa maasi mwa yoowo, aninvaha okumi woohimala”.+ 15 Muthiyana ole aahimuhimeerya Yesu wiira: “Pwiya, mukivahe maasi awo, wiira kihivoliwe-tho ntthona, nnakhala kihitthikele-tho orwa opuro ola, orika maasi”.
16 Yesu aahimuleela wiira: “Murowe, mwawiihane aiyanyu, murwaane vaava”. 17 Muthiyana ole aahimuhimeerya wiira: “Miyo nkirina iyaka”. Yesu aahimuleela wiira: “Moohimya saana muriki, ‘Miyo nkirina iyaka’. 18 Tthiri, nyuwo mwaahitheliwa ni alopwana athanu, vano mulopwana onikhalana anyu, khahiyo iyanyu. Tivo, moohimya ekeekhai”. 19 Muthiyana ole aahimuhimeerya Yesu wiira: “Pwiya, kinoona wiira mwa profeta.+ 20 Amuhavinre ahu, yaamukokhorela Muluku vamwaako vaava, masi nyuwo ayuda munihimya wiira atthu ahaana omukokhorela Muluku oYerusalemu”.+ 21 Yesu aahimuhimeerya wiira: “Nyuwo muthiyana, mukikupali. Enoophiya ewoora ehinrowa anyu omukokhorela Muluku vamwaako vaava, nnakhala oYerusalemu. 22 Nyuwo khamunimusuwela ole onimukokhorela anyu.+ Masi hiyo ninnimusuwela ole onimukokhorela ahu, okhala wiira woopowa onikhuma wa* ayuda.+ 23 Masi, enoophiya ewoora, tthiri ewoora ene yoophiya, ale animukokhorela Muluku mwa enamuna yooloka, anrowa aya omukokhorelaka Muluku yeettihiwaka ni ikuru soowaarya ni ekeekhai. Muluku onnaaphavela atthu siisa wiira amukokhoreleke.+ 24 Muluku khonooneya+ ni onikhala wiirimu,* ale animukokhorela, ahaana omukokhorela yeettihiwaka ni ikuru ni ekeekhai”.+ 25 Muthiyana ole aahimuhimeerya wiira: “Koosuwela wiira Mesiya onimoorwa, yoowo oniihaniwa Kristu. Arwa vale, onoonileela itthu sootheene”. 26 Yesu aahimuleela wiira: “Ti yoomi, kinilavula ni nyuwo”.+
27 Okathi ene yoole, awiixutti yaahiphiya. Nto awo yaahitikinihiwa, maana Yesu aalavula ni muthiyana. Masi, khuuvo aamukonhe wiira: “Exeeni muniphavela anyu ni muthiyana owo?” aahiiso “Xeeni munilavula anyu ni muthiyana owo?” 28 Nto muthiyana ole aahihiya muno awe wa maasi, onarowa opooma waahimeerya atthu wiira: 29 “Nrowe mwamoone mulopwana okilenle itthu sootheene kiirale aka. Khino yoowo khahiyo Kristu?” 30 Atthu awo yaahikhuma opooma, anarowa okumana ni Yesu.
31 Okathi ene yoowo, awiixutti yaanimuthipelela Yesu ariki: “Rabi,*+ mulyeeke”. 32 Masi Yesu aahaahimeerya wiira: “Kookhalana etthu yoolya, nyuwo muhinisuwela anyu”. 33 Siiso, awiixutti yaahikohana ariki: “Niireke toko ookhala omuruhenle etthu yoolya?” 34 Yesu aahaaleela wiira: “Yoolya aka opaka ele eniphavela awe ole okirumme,+ ni omaliherya muteko awe.+ 35 Nyuwo munihimya wiira, sihanle miyeeri mixexe wiira ophiye okathi woohepha. Nto miyo kinooleelani wiira, nwehe imatta, maana ipyo soolikana wiira sihemphwe.+ Vano, 36 mulipa-oohepha onniliviwa ni onnithukumanya mihokorokho. Nto mihokorokho sene, taale anrowa waakhela okumi woohimala, wiira mulipa-oowaala ni mulipa-oohepha atteeliweke murima vamosa.+ 37 Tthiri, masu ala teekeekhai, yaawo ani: Mmosa mulipa-oowaala, mukina, mulipa-oohepha. 38 Miyo kihoorumani ohepha etthu muhaalale anyu. Nave muhaakhela itthu sooreera sa muteko wa atthu akina”.
39 Asamariya anceene a epooma ele yaahimwaamini Yesu, mwaha wa moolumo muthiyana ole aahimmye awe wiira: “Owo ookileela itthu sootheene kiirale aka”.+ 40 Vano asamariya awo yaaronwe okumana ni Yesu, yaahinvekela wiira okhale ni yaawo. Nto Yesu aahikhala weiwo mahiku manli. 41 Siiso, atthu anceene yaahimukupali Yesu mwaha wa masu awe. 42 Nave yaahimuhimeerya muthiyana ole wiira: “Hiyo khahiyo ninkupali mwaha wa masu anyu paahi, maana noomwiiwa mmansihu. Nave noosuwela tthiri, wiira owo ti moopoli a olumwenku”.+
43 Nuuvira mahiku manli, aahikhuma opuro ole onarowa oGalileya. 44 Vano Yesu mwaneene aahikhalela onamoona wiira profeta khonittittimihiwa muttetthe awe.+ 45 Okathi Yesu aaphiyale awe oGalileya, atthu a oGalileya yaahimwaakhela, okhala wiira yaahoona itthu sootheene Yesu aapanke awe oYerusalemu okathi wa efesta.+ Tthiri, atthu awo yaahirowa efesta eyo.+
46 Yesu aahirowa-tho oKana wa oGalileya, weiwo aatatunxe awe maasi, khukhala eviinyu.+ Muttetthe owo, aahikhala namakhaliherya a mwene, aarina mwanawe mwaamulopwana oKafarnawu, yoowo aawereiwa. 47 Okathi aiwale awe wiira Yesu aahikhuma oYudeya orowaka oGalileya, aahirowa okumana nuuwo, onvekela wiira okhuruwele oKafarnawu wiira ampenuxe mwanawe, maana aahanle okhwa. 48 Yesu aahimuleela wiira: “Vahikhanle wiira moonale miiriirya* ni sootikiniha, nyuwosa khamunikhala-khala mukupaliki”.+ 49 Namakhaliherya ole a mwene, aahimuhimeerya Yesu wiira: “Pwiya, nrowe, mwanaka ohinatthi okhwa”. 50 Yesu aahimuleela wiira: “Muroweke. Mwaninyu mukumi”.+ Mulopwana ole aahikupali moolumo Yesu aamulenle awe, onarowa. 51 Nto eettaka mphironi, arumeyi awe yaahirwa okumana nuuwo, anamuleela wiira mwanawe aahikhala mukumi. 52 Nto owo aahaakoha ewoora ene mwanawe aakhanle awe saana. Awo yaahimwaakhula ariki: “Efeepere* emuhiyale nsana, 13 oora”.* 53 Paapa ole aahisuwela wiira, yaari ewoora ene yeele Yesu aamulenle awe oriki: “Mwaninyu mukumi”.+ Siiso, owo ni atthu ootheene a vatthokoni vawe, yaahimwaamini Yesu. 54 Ola waari mwiiriirya wa nenli+ Yesu aapanke awe, okathi aatthika awe oYudeya orowaka oGalileya.