Ruti
1 Okathi makhulupale+ yaalamulela aya, yaahikhumelela etala mulaponi. Vano, mulopwana mmosa aahikhuma oBetelehemu+ wa oYuda, onarowa okhala ntoko muletto muttetthe wa oMowabi.+ Owo aari ni amwaarawe, ni anaawe axilopwana anli. 2 Mulopwana owo aihaniwa Elimeleeki,* vano amwaarawe yaihaniwa Nowemi,* nave anaawe axilopwana, yaihaniwa Mahaloni* ni Kiliyoni.* Ootheene aya yaari a wEfrata, eyo piiyo, oBetelehemu wa oYuda. Nto yaahiphiya muttetthe wa oMowabi, anakhala weiwo.
3 Nuuvira okathi, Elimeleeki, iyawe Nowemi, aahikhwa. Nto Nowemi aahanle ni anaawe anli axilopwana. 4 Muhoolo mwaya alopwana awo yaahaathela axithiyana a oMowabi. Muthiyana mmosa aihaniwa Orpa, vano mukina aihaniwa Ruti.+ Awo yaahikhala oMowabi iwo, iyaakha soowiiraka 10. 5 Nuuvira okathi, anamwane awo oowanli, Mahaloni ni Kiliyoni, yaahikhwa. Siiso Nowemi aahanle mekhawe, okhweliwe ene ni iyawe ni anaawe anli. 6 Ori ene oMowabi, Nowemi aahiiwa wiira Yehova aahiwuupuwela atthu awe, aavahaka yoolya. Siiso, Nowemi aahuupuwela okhuma muttetthe wa oMowabi, vamosa ni athiyana yaatheliwe ni anaawe, wiira otthikele elapo awe.
7 Nowemi ni axithiyana ale anli yaatheliwe ni anaawe, yaahivenya opuro waakhala aya. Okathi yeetta aya mustaraatani arowaka elapo ya oYuda, 8 Nowemi aahaahimeerya axithiyana ale wiira: “Khula mmosa a nyuwo otthikeleke vatthokoni va amamawe. Yehova owooniheryeni ophenta woororomeleya,+ siisaale nwoonihenrye anyu axiiyanyu akhwiiye, vamosa ni miyo. 9 Yehova onvahe khula mmosa a nyuwo opuro woomumula, vatthokoni va iyanyu”.+ Vano Nowemi aahaavaha epeexo oowanli aya, nto awo yaahinla vanceene. 10 Axithiyana awo yaanimuleela Nowemi wiira: “Nnaari, nnimoottharani wiira nakhaleke ni atthu anyu”. 11 Masi, Nowemi aahihimya wiira: “Mutthike, anaaka. Xeeni muniphavela anyu okitthara? Kiireke nlelo kinoowerya waayara alopwana wiira akhale axiiyanyu?+ 12 Mutthike, anaaka. Muroweke, okhala wiira miyo kootepa wuuluvala ni nkinwerya-tho otheliwa. Hata kaalipelela omphwanya mulopwana ohiyu ola, ni waayara anamwane axilopwana, 13 niireke mwaamwaalipelela anamwane awo mpakha wunnuwa? Niireke mwaamukhootta otheliwa mwaalipelelaka anamwane awo? Nnaari, anaaka. Miyo kinniriipiwa murima vanceene mwaha wa nyuwo, okhala wiira ntata na Yehova nookivirikanya”.+
14 Axithiyana awo yaahitthikela-tho wunla vanceene. Nuumala-vo, Orpa aahinvaha epeexo maathi awe, onarowa. Masi Ruti aahithipelela okhala ni maathi awe. 15 Vano Nowemi aahihimya wiira: “Mooneke! Pirima anyu naamukhweli, ohaatthikela atthu awe ni amuluku awe. Nave nyuwo mutthikeke nuuwo”.
16 Masi Ruti aahihimya wiira: “Muhikikhanyererye woohiyani, wiira kihiye woottharani. Tthiri, opuro onrowa anyu ni miyo kinrowa weiwo, nave opuro onrowa anyu oviriha ohiyu, ni miyo kinrowa oviriha ohiyu weiwo. Atthu anyu anrowa okhala atthu aka, nave Muluku anyu onrowa okhala Muluku aka.+ 17 Opuro onrowa anyu okhwa ni miyo kinrowa okhwa weiwo, nave kinrowa ovithiwa weiwo. Yehova okitakhalihe, ni otepe okitakhaliha, akhala wiira kinimoohiyani ohikhanle mwaha wa okhwa”.
18 Okathi Nowemi oonale awe wiira Ruti aanikhanyererya omutthara, aahihiya omukhoottiherya. 19 Oowanli aya yaahitthikela weetta mukwaha aya mpakha ophiya oBetelehemu.+ Nuumala ophiya oBetelehemu, atthu ootheene a mpooma-mme yaahitikinihiwa mwaha wa yaawo. Nto athiyana yaanikohana wiira: “Ola khahiyo Nowemi?” 20 Nowemi aaniwaakhula athiyana awo oriki: “Muhikiihaneke Nowemi.* Mukiihaneke Maara,* okhala wiira Muluku* ohiiriha okumi aka okhala wootepexa oriipiha murima.+ 21 Kikhumaka-mu kaahikhalana itthu sootheene, masi Yehova ookittikiha matata-ru. Nto muhikiihaneke Nowemi, okhala wiira Yehova ookivirikanya, ni Muluku Oowerya sootheene ookikumiherya ehasara”.+
22 Ti siiso Nowemi aatthinke awe muttetthe wa oMowabi,+ hoothe ni Ruti, yoowo aatheliwe ni mwanawe. Awo yaahiphiya oBetelehemu okathi waapacerya aya ohemphwa esevaata.*+