Zakariya
7 Eyaakha ya neexexe ya mwene Dario, Zakariya,+ aahisuwelihiwa moolumo a Yehova, nihiku na neexexe na mweeri wa neethanu neexexe, eyo piiyo, mweeri wa Kisilevi.* 2 Atthu a oBeteli, yaahimuruma Sareseri ni Rekhemi-Melekhi ni alopwana awe, wiira amuxonttele Yehova, 3 yaahimeeryaka anamukuttho a empa* ya Yehova a anakhotto ni maprofeta, wiira: “Niireke kihaana wunla mweeri wa neethanu ni otthukwa,+ ntoko kiniiraaka mwa iyaakha sinceene?”
4 Kaahisuwelihiwa-tho moolumo a Yehova a anakhotto, yaahimya wiira: 5 “Mwaakohe atthu ootheene a elapo ela ni anamukuttho, wiira: ‘Okathi mwaatthukwa anyu ni mwaikhupanyerya anyu, mweeri wa neethanu ni wa neethanu nenli,+ iyaakha 70,+ niireke tthiri mwaatthukwa mwaha wa miyo? 6 Okathi mwaalya anyu ni mwaawurya anyu, kiira mwaalya ni mwaawurya mwaha wa nyuwo? 7 Niireke khimwaakhanle oowiiwelela moolumo a Yehova alavunle awe aarumeelaka maprofeta awe a khalai,+ okathi oYerusalemu ni ipooma saarukurenrye saakhaliwa aya ni murettele, ni okathi oNegebi ni oXefela waakhaliwa aya?’”
8 Zakariya aahisuwelihiwa-tho moolumo a Yehova, yaahimya wiira: 9 “Etthu onihimya awe Yehova a anakhotto, tiila: ‘Mphukeke ni exariya,+ nave-tho nwooniheryeke ophenta woororomeleya atthu akina+ ni mwaamoreleke ikharari. 10 Muhimwiiyerye naamukhweli, nnaakhala mwaana ohirina apapawe,*+ nnaakhala namurwa,+ aahiiso mulipa-oohaawa.+ Nave muuhupuwele owiirela itthu sootakhala atthu akina’.+ 11 Masi, awo yaahikhootta onwiriyana Muluku,+ yaahimurukunuwela+ ni yaahittiyela maaru aya wiira ahiiweke etthu.+ 12 Yaahumiha murima aya ntoko nluku nniihaniwa etiyamanti,*+ khiyaiwelenle nlamulo,* ni khiyaiwelenle moolumo Yehova a anakhotto aarumme awe orumeelaka ikuru sawe soowaarya, aarumeelaka maprofeta awe a khalai.+ Tivonto, Yehova a anakhotto aahinanariwa vanceene”.+
13 “‘Ntoko siisaale awo yahaakiwiriyana aya, okathi kaawiihanaaka,+ nave miyo* nkaawiiriyanne okathi yaakiihana aya’,+ onihimya Yehova a anakhotto. 14 ‘Kirumeelaka epheyo kaahiwiiriha atthu omwareela elapo yaahasuwela aya,+ nto elapo yaahiyale aya khiyaakhaliwa, nave khuuvo aavira nnakhala khuuvo aatthikela.+ Awo yaahiiriha elapo eyo okhala yoowoopiha’”.