Ruti
2 Nowemi aahikhalana mmusi oothaaciri vanceene, aihaniwa Bowazi.+ Bowazi owo, aari a emusi ya Elimeleeki, iyawe Nowemi.
2 Ruti, muthiyana a oMowabi, aahimuhimeerya Nowemi wiira: “Xontte, mukihiye kirowe omatta, wiira kattotte+ soolya sinihala mmatta. Kinoona wiira kinomphwanya mutthu onrowa okireerela murima”. Nto, Nowemi aahimuleela wiira: “Muroweke, mwanaka”. 3 Siiso, owo aahirowa onapacerya ottotta ipyo saahiiwale mmatta ni alipa-oohepha. Voohisuwela, aahirowa ematta ya Bowazi,+ yoowo aari a emusi ya Elimeleeki.+ 4 Vano, Bowazi aahirwa okhumaka epooma ya oBetelehemu, aahimeerya alipa-oohepha wiira: “Yehova okhale ni nyuwo”. Nto awo yaahaakhula ariki: “Yehova ooreeliheni”.
5 Bowazi aahimukoha murumeyi awe aahoolela alipa-oohepha oriki: “Mwali ole ta emusi xeeni?” 6 Vano murumeyi aahoolela alipa-oohepha, aahaakhula wiira: “Mwali ole ta oMowabi,+ yoowo orwiiye ni Nowemi muttetthe wa oMowabi.+ 7 Owo okivekenle wiira ottotteke+ soolya sinihiiwa mmatta ni alipa-oohepha. Okhuma voosiisu ophiyale awe onvara muteko mpakha vano. Niinaano-va tokilanthi awe mmuxaxani wiira omumule vakhaani”.
8 Vano Bowazi aahimuleela Ruti wiira: “Mukiiweke, mwanaka. Muhirowe ottotta ematta ekina, nave muhirowe opuro mukina. Mukhaleke vakhiviru ni arumeyi aka axithiyana.+ 9 Nweheke ematta anrowa aya ohepha, mwaatthareke yaawo. Kihaaruma arumeyi aka axilopwana wiira ahooxankiheni. Mwavoliwa ntthona, murowe mwawuryeke maasi arumeyi aka anrowa aya orikelela mmurinkini”.
10 Siiso, muthiyana owo aahikokhora, uurama mpakha vathi, onamukoha wiira: “Xeeni munikireerela anyu murima? Nave xeeni munikithokorerya anyu siisa, kiri ene namurya?”+ 11 Bowazi aahimwaakhula wiira: “Miyo kooleeliwa oratteene itthu sootheene mmwiirenle anyu maathi anyu, nuumala okhwa iyanyu. Nave kooleeliwa wiira muhaahiya apapinyu, amaminyu, ni elapo ya amusi anyu munarwa okhala ni atthu mwahaasuwela anyu khalai.+ 12 Yehova, ooreeliheni mwaha wa etthu mpanke anyu.+ Nave-tho, Yehova, Muluku a Isarayeli, ootthuveleni voowaatta, okhala wiira mootthyawela mmapuphani mwawe”.+ 13 Siiso Ruti aahihimya wiira: “Kooxukhurela okireerela murima, pwiyaka, okhala wiira mookimaaliha ni mookilavulela moolumo ooreera, nnaamwi kihikhanle murumeyi anyu”.
14 Okathi woolya, Bowazi aahimuleela Ruti wiira: “Murwe-va, mukhuureke iphaawu iya, mureryeke evinaakere ela”. Siiso Ruti aahikilaathi vamosa ni alipa-oohepha. Vano Bowazi aahinvaha Ruti ipyo soowaarikiwa, nto owo aahilya khuvona, mpakha ohala ipyo sikina. 15 Okathi Ruti aatthikenle awe ottotta,+ Bowazi aahaaruma arumeyi awe axilopwana wiira: “Mmuhiye ottotteke soolya sinihala mmatta, nave muhimuhasuleke.+ 16 Nave-tho, mmuhiyereke moolakela soolya sikina muhemphe anyu, mmuhiyeke attotteke, muhimukhoottiheryeke”.
17 Siiso owo aahithipelela ottotta mmatta-mme mpakha wiila.+ Nuumala weepettha ele aattontte awe, yaahiphiya etthu yoowiiraka ikiilu 13* sa esevaata.* 18 Nuumala-vo, Ruti aahikuxa ele aattontte awe, ni aahitthikela opooma. Nave maathi awe aahoona ele aattontte awe. Vano, Ruti aahiruuha yoolya yaahanle+ nuumala olya mpakha ovona, onvaha maathi awe.
19 Maathi awe aahimukoha Ruti wiira: “Olelo mwaattotta woowi? Mwaavara muteko woowi? Oreelihiwe ole oothokorenryeni”.+ Ruti aahimuleela maathi awe mutthu anvarenle awe muteko, oriki: “Nsina na mulopwana kinvarenle aka muteko olelo ti Bowazi”. 20 Nowemi aahimuhimeerya muthiyana aatheliwe ni mwanawe wiira: “Mulopwana owo oreelihiwe ni Yehova, yoowo ohihiyale owooniherya ophenta woororomeleya atthu akumi ni alipa-ookhwa”.+ Nowemi aahihimya-tho wiira: “Mulopwana owo, mmusi ahu.+ Owo mmusi ahu orina ehakhi ya onoopola mixankiho sahu”.+ 21 Vano Ruti muthiyana a oMowabi, aahihimya wiira: “Owo aahikihimeerya-tho wiira: ‘Mukhaleke vakhiviru ni arumeyi aka mpakha omaliha ohepha’”.+ 22 Nowemi aahimuleela Ruti, muthiyana aatheliwe ni mwanawe, wiira: “Mwanaka, fataari okhala ni arumeyi awe axithiyana, ohiya orowa ohaaxiwa ematta ekina”.
23 Nto Ruti aahikhala ni arumeyi axithiyana a Bowazi, ni aahittotta soolya mpakha omala okathi woohepha esevaata+ ni etiriku. Nave owo nlelo aanikhala ni amaathi awe.+