Samuweli a Nenli
8 Nuuvira okathi vakhaani, Davidi aahiwana ni afilisti+ ni aahaaxintta.+ Nto Davidi aahiwaakha afilisti awo epooma ya oMetegi-Ama.
2 Owo aahaawerya atthu a oMowabi,+ ni aahaaruma wummaathi vathi, aakawanya ipantta tthaaru:* Ipantta piili wiira yiiviwe, ni epantta emosa wiira ahale ari ene akumi.+ Nto atthu a oMowabi yaahikhala arumeyi a Davidi, nave yaanimuliva mpoosito.+
3 Davidi aahimuxintta-tho Hadadezeri, mwaana a Rehobi, mwene a oSoba,+ okathi aarowa awe muttetthe wa muro Eufrate+ wiira atthikele olamulela. 4 Davidi aahaavara anakhavalo 1.700 a Hadadezeri, ni anakhotto 20.000 yeetta mwentto. Nto, Davidi aahiikittha mitika* sa ikhavalo seettiha ikaaro sa ekhotto, ohiya ikhavalo 100.+
5 Okathi atthu a oSiiria a oDamaasiko+ yaarwaale aya wiira amukhaliherye mwene Hadadezeri a oSoba, Davidi aahiwiiva atthu 22.000 a oSiiria.+ 6 Davidi aahaakhaliha atoropa oSiiria wa oDamaasiko. Nave atthu a oSiiria yaahikhala arumeyi a Davidi ni yaanimuliva mpoosito. Yehova aanimwiiriha Davidi oxintta* khula opuro aarowa awe.+ 7 Ohiya-vo, Davidi aahikuxa makula a wiixaakihana a eweero,* a arumeyi a Hadadezeri, oroiha oYerusalemu.+ 8 Nave mwene Davidi aahiruuha ekoopiri yinceene aakunxe awe oBeta ni oBerotayi. Iyo saari ipooma sa Hadadezeri.
9 Mwene Toyi a oHamati,+ aahiiwa wiira Davidi aahaaxintta anakhotto ootheene a Hadadezeri.+ 10 Toyi aahimuruma mwanawe Yorami orowa wa mwene Davidi, wiira amukohe ihaali ni amuxukhurele mwaha wa omuxintta Hadadezeri (okhala wiira Hadadezeri aamakela owana ni Toyi). Nto owo aahimuroihela Davidi mireerelo sa eparatha, sa eweero ni sa ekoopiri. 11 Mwene Davidi aahinvaha* Yehova itthu iye, ntoko anvanhe awe eparatha ni eweero aawaakhale awe atthu a maloko ootheene aaxinttale awe,+ 12 okhuma oSiiria ni oMowabi,+ atthu a wAmoni, afilisti,+ atthu a wAmaleki+ ni itthu aamwaakhale awe Hadadezeri,+ mwaana a Rehobi, mwene a oSoba. 13 Davidi aahitepa ovuwa nuumala owiiva atthu a wEdomi 18.000 oxepani wa Maakha.+ 14 Davidi aahaahiya atoropa wEdomi. WEdomi wootheene aahikhalana atoropa, nave atthu ootheene a wEdomi yaahikhala arumeyi a Davidi.+ Yehova aanimwiiriha Davidi oxintta* mapuro ootheene aarowa awe.+
15 Davidi aanaalamulela aisarayeli ootheene,+ nave owo aanaaphukela atthu ootheene+ mwa xariya.+ 16 Yowabi,+ mwaana a Seruwiya, aari xeefi a anakhotto, vano Yosafati,+ mwaana a Ahiludi, aari mulipa-oolepa. 17 Sadoki+ mwaana a Ahitubi, ni Ahimeleki mwaana a Abiyatari yaari anamukuttho, nave Seraya aari sekretaario. 18 Benaya+ mwaana a Yehoyada, taahoolela akereti ni apeleti.+ Vano anamwane a Davidi, yaari makhulupale.*