Nahumi
3 Yootakhaliwa epooma ya ale aniwiiva atthu!
Yoosareya wootha ni wiiya.
Khenikhala ehiivale enama.
2 Kinniiwa oruma wa murepettho ni oruma wa maroota,
Nave kinnoona ikhavalo ni ikaaro sa ekhotto seettihiwaka.
3 Ikhavalo soolokiheriwa, ispaata ni mavaka sinnaarya,
Aakhala atthu anceene ookhwa, nave sihuukeliwa mirutthu sinceene.
Khula opuro sookhala mirutthu.
Atthu annimora mwaha wa mirutthu iyo.
4 Eyo enniiraneya mwaha wa oraruwa vanceene wa namararuwa owo.
Owo tooreera ni tookuxa murima, nave nookhwiri.
Onniwoka maloko ni oraruwa wawe, nave onniwoka mahimo ni okhwiri awe.
5 Yehova a anakhotto onihimya wiira:+ “Mwiiwe! Miyo kinimoovirikanyani”,*
Kinookhunula esaaya anyu mpakha okhuneela owiitho wanyu.
Kinimwiiriha maloko woowehani muhiwanre etthu,
Nave ilapo sootheene sinooweha wuuliwa wanyu muru.
6 Kinimoorihelani itthu soonanara,
Wiira muthanyiweke.
Nave kinoowiirihani okhala etthu yoothanyiwa.+
7 Atthu ootheene anrowa woowehani anotthyawa+ ni anoohimya wiira:
‘Niinive oopwetexiwa!
Ti pani onrowa ommorela ikharari?’
Kinrowa omphwanya woowi mutthu wiira oomaaliheni?
8 Niireke ti moolokexa onvikana No-Amoni,*+ yoowo aakhala waattamela muro Niilo?+
Yaahikhala maasi yaamurukurenrye, muhakhu awe waari ephareya,
Nave exiri awe yaari ephareya.
9 WEthiyopia waari opuro saakhuma aya ikuru soowaatta, vamosa ni wExiitu.
Puthi+ ni atthu awe a oLiibia, tiyookhaliheryani.+
10 Masi hata yena, aahikuxiwa
Oroihiwa weepotthani.+
Nave-tho anaawe yaahinyakattiwa mapuro ootheene sinikumana iphiro.
Awo yaahivonya isoorti wiira yaathanle alopwana awe oottittimiheya,
Vano makhulupale awe ootheene yaahitthukiwa ni ikwirinti.
11 Nave nyuwo munookhala namuhapaliwa,+
Ni munrowa wiipithaka.
Munophavelaka opuro wootthyawela mwaha wa awanani anyu.
12 Mapuro anyu ootheene oolipihiwa anlikana ni mwiri wa efiiku, yoowo orina mihokorokho soopacerya ottokotha.
Mwaatatha vale, mihokorokho sinoomorela mwaano mwa mulipa onikhuura.
13 Mooneke! Atoropa anyu anlikana ni athiyana ari eriyari anyu.
Mikhora sa elapo anyu sinoohuliwa para awanani anyu.
Mooro onoopaha itaranka sa mikhora sanyu.
14 Murike maasi para okathi muttetthe anyu onrowa awe orukureriwa.+
Mulipihe mapuro anyu oolipihiwa.
Mukele munttopheni ni munyakele oloko,
Wiira mpake itixolu.
15 Masi hata vari siiso, mooro onimoopahani.
Espaata enimoomala-malihani.+
Eyo enimoomala-malihani ntoko oniirawe nasope.+
Mukhale oowaatta ntoko nasope munceene!
Aayo, mukhale oowaatta ntoko nasope munceene!
16 Nyuwo mowuncererya alipa a nakoso anyu, nwiiriha okhala oowaatta ovikana itheneeri sa wiirimu.
Nasope onnuuhuuwa, onavavela ottaiwene.
17 Makwarta anyu anlikana ni nasope,
Nave makhulupale anyu anlikana ni nasope munceene.
Nihiku nooriirya, owo onnitthyawela mapuro oophweeya a ixiri.
Masi okathi nsuwa nnoopa aya, owo onnivavela ottaiwene.
Khuuvo onisuwela opuro ori awe.
18 Nyuwo mwene a wAsiiria, amakampusi anyu animooseela.
Makhulupale anyu khanikhuma owannyeya.
Atthu anyu aamwarexeliwa omiyaakoni,
Nto khuuvo mutthu onaathukumanya.+
19 Khuuvo onrowa wookhaliheriyani okathi enrowa aya wookhumelelani ehasara.
Nikhwatta nanyu khaninvola.
Atthu ootheene anrowa wiiwa ihapari sinoohimyani nyuwo, animoopa makuphi.+
Ti pani ohihaawale vanceene mwaha wa otakhala wanyu?”+