Wahala Oopacerya
10 Vano afilisti yaahiwana ni atthu a Isarayeli. Nto atthu a Isarayeli yaahaatthyawa afilisti, nave atthu anceene yaahikhwa omwaako Xilibowa.+ 2 Afilisti yaahimutthimakela Sawuli ni anaawe. Afilisti awo yahimwiiva Yonathani, Abinadabi ni Malikixuwa,+ anamwane a Sawuli. 3 Ekhotto yaahinviherya vanceene Sawuli. Ale yaavonya mattheere* yaahimulukama, nto owo aahivulalihiwa.+ 4 Moottharelana, Sawuli aahimuhimeerya mulipa-aamukhaliherya oteexa nikula nawe na wiixaakihana, wiira: “Mukumihe espaata* anyu,+ mukiive wiira atthu ale oohinnuwihiwa ahikiirihe etthu yootakhala”. Masi mulipa-aamukhaliherya oteexa nikula na wiixaakihana khaaphavenle, okhala wiira anoova vanceene. Vano Sawuli aahikuxa espaata iimorihela vasulu vaya.+ 5 Okathi mulipa-aamukhaliherya oteexa nikula na wiixaakihana oonale awe wiira Sawuli aahikhwa, owo nave aahitholola espaata awe iimorihela vasulu vaya, okhwa. 6 Siiso, Sawuli, anaawe araru ni atthu ootheene a etthoko awe yaahikhwa.+ 7 Okathi atthu ootheene a Isarayeli, yaakhala opuro woowaataleya yaasuwenle aya wiira atthu ootheene yaahitthyawa ni wiira Sawuli vamosa ni anaawe yaahikhwa, awo yaahipacerya ohiya ipooma saya anatthyawa. Nto afilisti yaanikuxa ipooma iyo anakhala memmo.
8 Mmeeloni mwaya, okathi afilisti yaarwiiye aya wiira akuxe itthu sa atthu ale yaawiivale aya, yaahimphwanya Sawuli ni anaawe ookhwa ene omwaako Xilibowa.+ 9 Vano, awo yaahimurula ikuwo sawe, amwiikittha muru ni akuxa ikaruma sawe sa ekhotto. Nave yaahaaruma atthu orowa elapo yootheene ya afilisti olaleya ihapari iyo wa amuluku aya+ ni eriyari ya atthu. 10 Moottharelana yaahipweha ikaruma sawe sa ekhotto mpaani mwa muluku aya, nave yaahithomeya muru awe mpaani* mwa Dagoni.+
11 Okathi atthu ootheene a oYabexi,+ oXileyaadi, yaiwale aya itthu sootheene afilisti yaamwiirinhe aya Sawuli,+ 12 anakhotto ootheene yaahivenya, akuxa murutthu wa Sawuli ni mirutthu sa anaawe. Awo yaahiroiha mirutthu iyo oYabexi, avitha makhuva aya vathi va mwiri muulupale waari oYabexi.+ Nave yaahitthukwa mahiku 7.
13 Siiso, Sawuli aahikhwa mwaha wa ohimuroromela Yehova,+ okhala wiira khaiwelenle moolumo a Yehova ni aahaaxerya ehako,+ 14 ohiya omukoha Yehova. Tivo, Muluku aahinvahererya wiira iiviwe, nave aahimwaakha omwene onvahererya Davidi mwaana a Yese.+