Wahala a Nenli
33 Manase+ aarina iyaakha 12 okathi aakhanle awe mwene, nave aahilamulela iyaakha 55 oYerusalemu.+
2 Owo aahipaka itthu soohiloka vamaithoni va Yehova, ottharaka soolema soohiloka, sa maloko yaawo Yehova oomonle awe ohoolo wa atthu a Isarayeli.+ 3 Manase aahiteka-tho mapuro oorakamela osulu yaakokhoreliwa amuluku eethiru, yaawo paapa awe, Ezekiya aapwexakanse awe.+ Nave aahaateka altaari a Bayaali, ni aahipaka miri soowuuma wiira sikokhoreliweke.* Nave aanikokhorela itheneeri sootheene sa osulu ni aanuuramela seiyo.+ 4 Manase aahaateka-tho altaari mpaani mwa Yehova,+ memmo Yehova aahimmye awe wiira: “Nsina naka ninrowa okhala oYerusalemu mahiku ootheene”.+ 5 Nave aahaateka-tho altaari a itheneeri sootheene sa osulu, nivate na muhina ni nivate na ota wa empa ya Yehova.+ 6 Manase aahaapaha anaawe vamooroni+ oxepani wa Mwaana a Hinomi,+ aahipaka maxintta,+ aahaaxerya ehako, aahirumeela olowa, aahaathanla anahako ni atthu yaakoha malaikha ootakhala.+ Nave aahipaka itthu sootepa otakhala vamaithoni va Yehova, wiira onveehe.
7 Owo aahipaka elatarato yoopatthiwa opweha empa ya Muluku eekeekhai,+ yeeyo Muluku aamulenle awe Davidi ni mwanawe Salomooni wiira: “Eriyari ya mahimo ootheene a wIsarayeli, miyo koothanla empa ela ni oYerusalemu, wiira nsina naka nikhaleke memmo mahiku ootheene.+ 8 Nkinrowa-tho owoomola atthu a Isarayeli elapo kaavanhe aka amuhavinre aya, yaiwelela-ru oratteene itthu sootheene kaarumme aka, eyo piiyo, Nlamulo nootheene, ikano ni ophukela kaavanhe aka kimurumeelaka Moise”. 9 Manase aanithipelela waahapuxa atthu a oYuda ni ale yaakhala oYerusalemu, owiirihaka opaka itthu sootepa otakhala, ovikana iye saapakiwa ni maloko Yehova aamala-malinhe awe ohoolo wa aisarayeli.+
10 Yehova khaahiyale olavula ni Manase ni atthu awe, masi awo khiyanwiriyana.+ 11 Nto Yehova aahaaruuhela maxeefi a anakhotto a mwene a wAsiiria, awo yaahinvara Manase amutthukwa ni onyoolo ni ikwirinti piili sa ekoopiri amuroiha oBabiloonia. 12 Oxankale ene siiso, Manase aahimuxonttela Yehova Muluku awe, nave aahiiyeviha vaalupale ohoolo wa Muluku a amuhavinre awe. 13 Manase khaahiyale onvekela Muluku, nto owo aahimmorela ikharari ni aahiwiriyana mavekelo awe ooxonttela, omuttikiherya oYerusalemu wiira atthikele omwene awe.+ Nto Manase aahisuwela wiira Yehova, Muluku eekeekhai.+
14 Nuumala itthu iya, owo aahiteka exiri ya ota wa Epooma ya Davidi+ mpantta onikela nsuwa wa oXihoni+ oxepani, mpakha Mukhora wa Ihopa,+ orukureriha ixiri iyo mpakha wOfeli,+ nave ixiri iyo saari soorakamexa. Ohiya-vo, aahaathanla maxeefi a anakhotto, aapweha ipooma sootheene soolipihiwa sa oYuda. 15 Moottharelana, aahaakumiha amuluku a amalapo ni elatarato yaari mpaani mwa Yehova,+ vamosa ni altaari ootheene aatenke awe vasulu va mwaako va empa ya Yehova+ ni oYerusalemu. Nuumala-vo aahiruma orowa oriheliwa ota wa epooma. 16 Aahaalokiherya altaari a Yehova,+ onapacerya ovaha mikuttho sa opatthani+ ni mikuttho sa oxukhurela,+ aaleela atthu a oYuda wiira amurumeeleke Yehova, Muluku a Isarayeli. 17 Nave-tho atthu, nlelo yaanivaha mukuttho mapuro oorakamela osulu, nnaamwi yanvaha paahi Yehova Muluku aya.
18 Itthu sikina siiraneyale ni Manase, onvekela wawe Muluku, ni moolumo aaleeliwe awe ni atthu anisuwela otaphulela itthu yooniheriwa aya ni Muluku arummwaka ni Yehova Muluku a Isarayeli, soolempwa eriyari ya soowiiraneya sa mamwene a wIsarayeli. 19 Nave-tho, nivekelo nawe+ ni moota aakhuliwe awe, itampi sawe sootheene, ohiroromeleya wawe,+ mapuro aatenke awe oorakamela osulu anikokhoreliwa amuluku eethiru, aapwenhe awe miri soowuuma saakokhoreliwa*+ ni ilatarato soopatthiwa ohinatthi wiiyeviha, soolempwa eriyari ya moolumo a atthu yaasuwela otaphulela itthu sooniheriwa aya ni Muluku. 20 Moottharelana, Manase aahirowa omumula ni amuhavinre awe, ovithiwa owannyawe. Vano mwanawe, Amoni, aahikhala mwene nipuro nawe.+
21 Amoni+ aarina iyaakha 22 okathi aakhanle awe mwene, nave aahilamulela iyaakha piili oYerusalemu.+ 22 Nave owo aanipaka itthu sootakhala vamaithoni va Yehova, ntoko iira awe paapa awe, Manase.+ Amoni aanivaha mukuttho ilatarato sootheene soopatthiwa seiyo paapa awe, Manase aapanke awe,+ ni aanithipelela orumeela seiyo. 23 Masi owo khaiyevihale ohoolo wa Yehova,+ ntoko paapa awe Manase, iiyevihale awe.+ Ohiya-vo, Amoni aamutepa wuncererya mulattu awe. 24 Muhoolo mwaya, arumeyi awe Amoni yaahimurukunuwela,+ amwiiva owannyawe. 25 Masi, atthu a elapo ele, yaahiwiiva atthu ootheene yaamurukunuwenle mwene Amoni.+ Nto yaahimukhaliha mwene, Yosiya,+ mwaana a Amoni, nipuro nawe.