Wahala Oopacerya

12 Ala yaari alopwana yaathukumanne ni Davidi oSikilaki,+ okathi yoowo Davidi ahaawerya awe weetta mootaphuwa mwaha wa Sawuli,+ mwaana a Kiixi. Awo yaari anakhotto ootupa, yaawo yaamukhaliherya okhottoni.+ 2 Alopwana awo yaahikuxa muura aya nave yaaniwerya orumeela moono woolopwana ni moono woothiyana+ wiira avonye maluku amurumeelaka fiska,+ mattheere* ni muura. Awo yaari axinnawe Sawuli, a nihimo na Beniyamini.+ 3 Muhooleli aya aari Ahiyezeri vamosa ni Yowaxi, oowanli aya yaari anamwane a Xemaya a oXibeya;+ Yeziyeli ni Peleti anamwane a Azimavethi,+ Beraka, Yehu a wAnatothi, 4 Iximaya a oXibeyoni,+ yoowo aari mmosa a anakhotto ootupa 30+ ni aari muhooleli a anakhotto awo; nave aahikhala-tho Yeremiya, Yahaziyeli, Yohanani, Yozabadi a oXedera, 5 Eluzayi, Yerimothi, Beyaliya, Xemariya, Xefatiya a oHarifi, 6 Elikana, Ixiya, Azareli, Yowezeri, ni Yaxobeyami a oKorathi,+ 7 Yowela ni Zebadiya anamwane a Yerohami a oGedori.

8 Atthu akina a oGadi yaahirowa mpantta wa Davidi opuro woolipihiwa, woothakoni.+ Awo yaari anakhotto ootupa, anakhotto yaixuttihiwe owana ekhotto yaakunxe makula maalupale a wiixaakihana ni mavaka. Owiitho waya waalikana ni akharamu, nave yaaneetta voowaakuveya ntoko anaahe mmiyaakoni. 9 Muhooleli aari Eseri, a nenli aari Obadiya, a neeraru aari Eliyabi, 10 a neexexe aari Miximana, a neethanu aari Yeremiya, 11 a neethanu namosa aari Atayi, a neethanu nenli aari Eliyeli, 12 a neethanu neeraru aari Yohanani, a neethanu neexexe aari Elizabadi, 13 a namuloko aari Yeremiya ni a namuloko namosa aari Makibanayi. 14 Ala yaari atthu a oGadi,+ yaawo yaari ahooleli a anakhotto. Mwaamukhaani aya aanaawerya anakhotto 100, nave muulupale aya aanaawerya anakhotto 1.000.+ 15 Alopwana ala yaahilapuwa muro Yordani mweeri woopacerya, okathi muro owo waarina aya maasi manceene ikhopela sootheene, nave yaahiwoomola atthu yaakhala opuro woowaataleya, mpantta onikhuma nsuwa ni mpantta onikela nsuwa.

16 Atthu akina a nihimo na Beniyamini ni na Yuda, nave yaahirowa wa Davidi opuro woolipihiwa.+ 17 Vano Davidi aahirowa okumana naawo onaahimeerya wiira: “Mwaarwenle ene murettele wiira mukikhaliherye, weeso nnookhala apatthani. Masi mwaarwenle ene okivahererya awanani aka kihipanke etthu yootakhala, Muluku aamuhavinre ahu owehe eyo ni ophuke mwa xariya”.+ 18 Vano ikuru sa Muluku saahimukela Amasayi,+ muhooleli a anakhotto 30, onahimya wiira:

“Nyuwo Davidi, hiyo naawinyu; nyuwo mwaana a Yese,+ hiyo nri ni nyuwo.

Siiso, Davidi aahiwaakhela, aathanla wiira akhale ahooleli atoropa.

19 Nave atthu akina a nihimo na Manase yaahitthyawela wa Davidi, okathi owo vamosa ni afilisti yaaronwe aya owana ekhotto ni Sawuli. Masi Davidi khaakhalihenrye afilisti,+ okhala wiira nuumala okohana miruku, anamalamulela afilisti yaahimuttikiha Davidi, ariki: “Owo onootthyawela wa pwiyawe Sawuli, nto eyo pooti oniiriha oyeleela okumi ahu”.+ 20 Alopwana yaatthyawenle wa Davidi a nihimo na Manase, okathi aaphiyale awe oSikilaki+ taala: Adinahi, Yozabadi, Yediyayeli, Mikhayeli, Yozabadi, Elihu ni Siletayi, yaawo yaari ahooleli a anakhotto 1.000 a nihimo na Manase.+ 21 Awo yaahimukhaliherya Davidi owana ni ekurupu emosa ya alavilavi, okhala wiira ootheene aya yaari alopwana ootupa, oolipa murima.+ Nto awo yaahikhalihiwa maxeefi a anakhotto. 22 Khula nihiku yaanirwa atthu wiira amukhaliherye Davidi+ mpakha opuro ole aamanke awe osareya anakhotto, ntoko anakhotto a Muluku.+

23 Nummeru na ahooleli yaari oolikana ene owana ekhotto, yaawo yaaronwe mpantta wa Davidi, oHebroni,+ wiira yamwaakhe omwene Sawuli ni anvahererye yena, ntoko Yehova aarumme awe, tinla:+ 24 Alopwana a oYuda yaakunxe makula maalupale a wiixaakihana ni mavaka yaari 6.800, yaawo yaari oolikana ene owana ekhotto. 25 Alopwana a nihimo na Simeyoni, yaawo yaari alopwana ootupa ni oolipa murima yaari 7.100.

26 Atthu a nihimo na Levi yaari 4.600. 27 Yehoyada+ aari muhooleli a anamwane a Aroni,+ nave alopwana 3.700 yaari ni owo, 28 vamosa ni Sadoki,+ mmiravo ootupa ni oolipa murima, ni maxeefi 22 a imusi saya.

29 Atthu a nihimo na Beniyamini, axinnawe Sawuli,+ yaari 3.000, anceene a yaawo khalai yaari oororomeleya wa Sawuli ni etthoko awe. 30 Atthu a nihimo na Efrayimi yaari 20.800 anakhotto ootupa, oolipa murima ni oovuwa a imusi saya.

31 Nimeya na atthu a nihimo na Manase yaari 18.000, yaawo yaathanliwe masina aya wiira yamukhalihe mwene, Davidi. 32 Atthu a nihimo na Isakari, yaawo yaasuwela okathi ni yaasuwela ele aisarayeli yaareerela aya opaka, yaari ahooleli 200, vamosa ni axinnaya yaawo yaaruma aya. 33 Atthu a nihimo na Zabuloni yaari alopwana 50.000, yaawo yaawerya orumeela okhottoni yiilokihenrye ene owana ekhotto, ni ikaruma saya sootheene sa ekhotto. Ootheene aya yaanimukhaliherya Davidi, aroromeleyaka ni murima aya wootheene. 34 Atthu a nihimo na Nefetali yaari maxeefi 1.000, vamosa ni alopwana 37.000 yaari naawo yaakunxe makula maalupale a wiixaakihana ni mavaka. 35 Atthu a nihimo na Dani, yaawo yailokiherya owana ekhotto yaari 28.600. 36 Atthu a nihimo na Axeri, yaawo yaawerya owana ekhotto yiilokihenrye ene owana ekhotto yaari 40.000.

37 Okhuma mpantta mukina wa muro Yordani,+ atthu a nihimo na Rubeni, na Gadi, ni nimeya na nihimo na Manase yaari anakhotto 120.000, yaakunxe inamuna soovirikana sa ikaruma sa ekhotto. 38 Alopwana ala ootheene yaari anakhotto, yaawo yiilokihenrye owana ekhotto. Awo yaahirowa ni murima aya wootheene oHebroni wiira yamukhalihe Davidi mwene a wIsarayeli wootheene. Nave-tho atthu akina a Isarayeli yaahanle yahiiraana* alipelelaka wiira Davidi okhalihiwe mwene.+ 39 Awo yaahikhala mahiku mararu ni Davidi, alyaaka ni awuryaka itthu axinnaya yaalokihenrye aya. 40 Ohiya-vo ale yawaattamenle, ni ale yaari ottaiwene ntoko atthu a nihimo na Isakari, na Zabuloni ni na Nefetali, yaahaaruuha apuuru, ikamelo, axinama aniihaniwa muula,* ni ipooyi saakunxe soolya iya: Otthu,* ipoolu sa ifiiku soonyakattiwa, eviinyu ni makhura. Nave yaahiruuha ipooyi ni ipwittipwitthi sinceene okhala wiira atthu a Isarayeli yaahiitteeliwa murima.