Yesaya
10 Aatakhaliwa atthu yaale anipaka malamulo ootakhala,+
Yaawo animakela olepa malamulo oohaaxa,
2 Wiira akhootte ophuka milattu sa alipa-oohaawa,
Ni akhootte owiirela exariya alipa-oohaawa,+
Awaakhaka athiyana anaamukhweli mireerelo saya,
3 Munrowa opaka exeeni nihiku ninrowa aya ophukiwaka milattu,+
Okathi onirwa awe ottaiwene, ole onrowa woopwetexani?+
Munrowa omutthyawelela aani wiira ookhaliheryeni?+
Nave munrowa opweha woowi mihakhu sanyu?*
4 Enihala paahi okokhora ohoolo wa aperesu,
Aahiiso okhala ekurupu ya atthu yiiviwe.
Mwaha wa itthu iya sootheene, onanariwa wa Muluku khomanle,
Masi nlelo ohookola ntata nawe wiira aamane.+
5 Owo onihimya wiira: “Nwooneke asiiria,+
Awo ti ekopo kinirumeela aka wiira kooniherye onanariwa waka,+
Kinnirumeela ekopo eyo eri mmatatani mwaya, wiira kooniherye onanariwa waka wuulupale.
6 Miyo kinimwaaruma wiira yatuphele nloko ninkivirikanya,+
Yaatuphele atthu ankinanariha;
Kinimwaaruma wiira yawiiyerye ni yawaakhe mihakhu sinceene,
Nave animwaanyakela ntoko nttophe niri mustaraatani.+
7 Masi asiiria khanrowa wuupuwela siiso,
Vamurimani vaya, khanrowa okhalana palano owo;
Okhala wiira vamurimani vaya, aniphavela opwetexa.
Aniphavela omaliha maloko manceene, ohiya maloko vakhaani.
8 Mwene a wAsiiria onihimya wiira:
‘Kiira makhulupale ootheene anikirumeela, nave-tho mamwene?+
9 Kiira muttetthe wa oKalino+ onlikana ni oKarkemixi?+
Nave oHamati+ onlikana ni wArpadi?+
Kiira oSamariya+ onlikana ni oDamaasiko?+
10 Koovara ilapo sinaakokhorela amuluku eethiru,
Seiyo ilatarato saya siri soowaatta, ovikana sa oYerusalemu ni oSamariya.+
11 Yerusalemu ni amuluku awe eethiru,
Kinoowiiriha etthu emosa-ru kimwiirinhe aka Samariya ni amuluku awe eethiru’.+
12 “Okathi miyo Yehova kinrowa aka omaliha miteko saka sootheene omwaako Siyoni ni oYerusalemu, nto kinoomuhukhumu mwene a wAsiiria, mwaha wa wuumiha wawe murima, wiixinnuwiha wawe ni wiisoona wawe.+ 13 Mwene a wAsiiria onihimya wiira:
‘Kinoopaka ela ni ntata naka noowerya,
Ni miruku saka, okhala wiira kookhalana ankhili.
Kinimwaaxintta atthu ntoko mutthu orina owerya.+
14 Siisaale mutthu onookola awe moono awe wiira ovare epuru,
Ntata naka nnookuxa mihakhu sa maloko.
Ntoko mutthu onittottela maace anyanyaliwe,
Miyo kinoothukumanya elapo yootheene.
Khuuvo onrowa omaniha mapupha awe aahiiso ohula eyano awe nnakhala onyakula’”.
15 Niireke wiira maxatto onniittottopa onvikana mutthu ommurumeela maxatto owo?
Niireke saroti onniittottopa onvikana mutthu onimurumeela seroti owo?
Niireke wiira ekopo+ enniwerya omuttikinya mutthu ovarenle ekopo eyo?
Aahiiso murepettho onniwerya omweemexa mutthu ovarenle?
16 Tivonto, Pwiya eekeekhai, Yehova a anakhotto,
Onoowiiriha atthu anyu ooneneva wootta,+
Nave onoopaha ovuwa waya.+
17 Muthuko* wa Isarayeli,+ onookhala mooro,+
Nave Muluku aya Oowaarya, onookhala nlumi na mooro;
Owo onoopatta ni onoopaha malaxi ni miiwa sa asiiria, nihiku nimosa-ru nenno.
18 Owo onoomala-maliha itakhwa saya ni ixarti saya sooreera;
Vanrowa okhalaka ntoko muretta onihala vakhaani okhwa.+
19 Miri sinrowa ohala mutakhwani mwaya, sinrowa okhala vakhaani,
Vaniweryaneya aya okontariwa ni mmiravo mwaamukhaani.
20 Nihiku nlo, atthu a Isarayeli ahanle,
Ni atthu a etthoko ya Yakobe yooponwe,
Khanrowa omulipanaka ole aatuphenle;+
Masi anrowa omulipanaka Yehova,
Muluku Oowaarya a Isarayeli, ni okhala oororomeleya wa yoowo.
21 Atthu vakhaani paahi ahanle tanrowa otthika,
Atthu vakhaani ahanle a Yakobe, tanrowa omutthikela Muluku Oowerya.+
22 Nyuwo Isarayeli, nnaamwi atthu anyu ari ene oowaatta
Ntoko mihaava sa ophareya,
Atthu vakhaani paahi ahanle tanrowa otthika.+
23 Aayo, olamuliwa iwo opwetexiwa, weiwo ohimmwale ni Pwiya Muulupalexa, Yehova a anakhotto,
Onrowa wiiraneya mulaponi mootheene.+
24 Tivonto, Pwiya Muulupalexa, Yehova a anakhotto, onihimya wiira: “Nyuwo atthu aka munikhala omwaako Siyoni, muhoove mwaha wa asiiria, yaawo yoomanani ni ekopo+ ni murepettho, ntoko yiira aya atthu a wExiitu.+ 25 Mwa okathi vakhaani, olamuliwa iwo onoomala. Onanariwa waka onrowa omala okathi anrowa aya opwetexiwa.+ 26 Yehova a anakhotto, onrowa oweepettha,+ ntoko aaxinttale awe oMidiyani, waattamela mwala wa Orebi.+ Owo onimookolela ekopo awe mphareya, ntoko aawiirinhe awe atthu a wExiitu.+
27 Nihiku nlo, muritti woolemela wa asiiria, onoovenxiwa mmakhatani mwanyu.+
Mwiri yaahenle aya mmakhatani mwanyu+ wiira muteexaneke miritti, onoovenxiwa.
Nave mwiri owo onimuntiwa+ mwaha wa makhura”.
29 Yaahilapuwa muro,
Yaahirupa ohiyu omosa oXeba;+
Muttetthe wa oRama waahittettemela, nave atthu yaakhala oXibeya,+ muttetthe wa Sawuli, yaahitthyawa.+
30 Nyuwo atthu a muttetthe wa oGalimi, mukhuweleke vanceene!
Nyuwo atthu a oLayixa, mwiiwe saana!
Nyuwo atthu a wAnatothi, munnooniha othunku!+
31 Atthu a oMadimena aatthyawa.
Atthu a oXebimi annaavya nipuro nootthyawela.
32 Nihiku nenno, owo onimweemela oNobi.+
Onnivenxa ntata nawe, owehihaka mwaako ori epooma ya oSiyoni,
Wiira owoopopihe atthu a epooma ya oYerusalemu, yeeyo eri vasulu va mwaako owo.
33 Moone! Pwiya eekeekhai, Yehova a anakhotto,
Onniikittha iritta, nto iyo sinnimora sirumaka vanceene;+
Miri soorekamexa sinniikitthiwa,
Nave miri siri opuro woorakamela musulu, sinnimoroxiwa.
34 Owo onnuuha ntakhwa ni maxatto,
Nave mutthu oowerya onoohonona muttetthe wa oLiibano.