Silempwale ni Marko
4 Yesu aahitthikela-tho owiixuttiha atthu mukerekhere mwa ephareya. Nto muttitthi muulupale wa atthu waahimuthukumanela. Tivo, Yesu aahikela mukalawani, okilaathi memmo, onasuserya mmaasini vakhaani. Masi, muttitthi owo wootheene waahanle mukerekhere mwa ephareya.+ 2 Siiso, aahipacerya owiixuttiha atthu awo itthu sinceene orumeelaka malikanyiho.+ Awiixuttihaka siisaale, aahaahimeerya wiira:+ 3 “Mwiiwe saana! Mulipa-oomisa aahirowa omisa ipyo.+ 4 Omisaka siisaale, ipyo sikina saahimorela mukerekhere mwa estaraata, nto axipalame* yaahirwa, akhuura.* 5 Ipyo sikina saahimorela vamalukuni, vaari etthaya vakhaani. Ipyo iyo saahimela voohipisa, okhala wiira etthaya yaari vakhaani.+ 6 Masi, nuumala woopa nsuwa, ipyo iyo saahipahiwa, sinyaala, maana khisaarina mitathaari. 7 Ipyo sikina saahimorela vamiiwani. Nto miiwa iyo saahivuvurya sinakhoottiherya ipyo iyo wunnuwa, khuhiima mihokorokho.+ 8 Masi ipyo sikina-tho, saahimorela etthaya yooreera ni saahipacerya wiima mihokorokho. Ekina yaimale mihokorokho 100, ovikana ele yaaliwe, ekina 60, nave-tho ekina 30”.+ 9 Nto aahincererya oriki: “Ole oniphavela wiiwa, iiweke”.+
10 Vano, okathi Yesu aahanle awe mekhawe, awiixutti akina vamosa ni arummwa 12, yaahimukoha malikanyiho ale.+ 11 Yesu aahaahimeerya wiira: “Nyuwo moosuwelihiwa esiiri+ ya Muluku ya Omwene awe. Masi atthu akina, aniixuttihiwa itthu sootheene orumeelaka malikanyiho,+ 12 okhala wiira, nnaamwi awehaka, awo khanoona. Nave-tho, nnaamwi yiiwaka, khanisuwela etthu ene. Awo khanrowa omutthikela Muluku wiira aleveleliwe”.+ 13 Yesu aahaakoha, iiraka: “Nyuwo mwaahisuweleke nlikanyiho nla, nto munrowa osuwela sai malikanyiho makina ootheene?
14 “Mulipa-oomisa, tuule onaala nuulumo na Muluku.+ 15 Epyo yaamorenle mukerekhere mwa estaraata, taale aniira yiiwaka-ru nuulumo na Muluku, Satana onnoorwa,+ onawaakha nuulumo naaliwe vamurimani vaya.+ 16 Epyo yaamorenle vamalukuni, taale aniira yiiwaka-ru nuulumo na Muluku, aneemererya atteeliwe ene murima.+ 17 Hata ahirina mitathaari, awo annikhala okathi vakhaani. Masi, sakhumelela mixankiho aahiiso olupatthiwa mwaha wa nuulumo na Muluku, annitthikela ottuli. 18 Epyo yaamorenle vamiiwani, taale aniiwa nuulumo na Muluku,+ 19 masi mwaha wa oxankela+ itthu sa olumwenku* ola ni woototha wa mihakhu+ ni ophavela+ itthu sikina onnikela vamurimani vaya, onavuvurya nuulumo nlo, nto ahiniima mihokorokho. 20 Wookiseryani waya, epyo yaamorenle etthaya yooreera, taale aniiwa nuulumo na Muluku, anaakhela ni murima wootheene. Nave anniima mihokorokho 100 ovikana ele yaaliwe, akina 60, nave-tho akina 30”.+
21 Nave-tho, aahaahimeerya wiira: “Niireke muthuko onnipattihiwa onakhuneeliwa ni ettanka* wala opwehiwa vathi va ekhaama? Kiira onipwehiwa osulu-sulu?+ 22 Tthiri, khiivo etthu yiipithihiwe, ehinrowa wooniheriwa. Nave, khiivo etthu evithiwe saana, ehinrowa osuweliwa.+ 23 Ole oniphavela wiiwa, iiweke”.+
24 Aahaahimeerya-tho wiira: “Nwiriyane oratteene etthu eniiwa anyu.+ Moota onaathokorerya anyu akhwiinyu, naawo anrowa woothokoreryani siiso. Tthiri nyuwo munimuncereriwa. 25 Veekeekhai, ole orina etthu, onimuncereriwa.+ Vano ole ohirina etthu, hata ele erina awe, onimwaakhiwa”.+
26 Yesu aahihimya-tho wiira: “Omwene wa Muluku onlikana ni epyo mutthu onaala awe vathi. 27 Owo onnirupa ohiyu ni onnivenya vaxa. Nto epyo ennimela, enannuwa. Masi owo khonisuwela moota eniiraneya aya. 28 Vakhaani-vakhaani, etthaya enniimiha mihokorokho mekhaya-ru. Enipacerya okhuma mutathi, nuumala-vo nnakhumelela nikala, nto wookiseryani waya, sinnikhumela ipyo vanikalani. 29 Vano muhokorokho ole wattokottha, mutthu owo onnipacerya ohepha, maana woophiya okathi woohepha”.
30 Aahihimya-tho wiira: “Ninrowa olikanyiha ni exeeni Omwene wa Muluku, nave ninrowa otthokiherya sai? 31 Omwene wa wiirimu onlikana ni enuku yaamukhaanixa,* yeeyo okathi yaaliwa aya, yaari yaamukhaanixa ovikana inuku sootheene sa vathi.+ 32 Masi yaaliwa vale, enninnuwa enakhala mwiri muulupale, enakumiherya iritta suulupale, memmo axipalame* aniphwanya aya opuro wooteka ipuru saya”.
33 Yesu aanaaleela atthu nuulumo na Muluku orumeelaka malikanyiho manceene,+ ntoko yaawerya aya wiiwexexa. 34 Tthiri, khiivo yaaleela awe ohirumeelaka malikanyiho. Nave, aanaatthokiherya wiiphiini awiixutti awe itthu sootheene.+
35 Nihiku nenle, nsuwa nikelaka-ru, Yesu aahaaleela awiixutti awe wiira: “Nrowe nilapuwele ekhopela ekina”.+ 36 Nuumala awiixutti waamwarya atthu ale, yaahimukuxa Yesu mukalawani anarowa. Nave saahikhala ikalawa sikina saamutthara.+ 37 Niinaano-ru, yaahikhumelela epheyo yuulupale mphareya. Nave mawimpi yaanimana ekalawa, nto eyo enahala vakhaani osama.+ 38 Masi Yesu aari mukalawani mpantta wa ottuli, orupaka valmofaatani.* Nto awiixutti yaahinvenxa, ahimyaka wiira: “Mwiixuttihi, khamunoona wiira nihanle okhwa?” 39 Vano, Yesu aahivenya, aahipwapwela epheyo, khwiirela ephareya wiira: “Mmaale! Mwiikhalele!”+ Epheyo yaahiikhalela ni waahikhumelela omaaleleya wuulupale. 40 Siiso, Yesu aahaakoha oriki: “Munoovela-ni? Niireke nlelo khamurina waamini?” 41 Awo yaahitepa woova, anakohana wiira: “Mulopwana ola ti pani? Hata epheyo ni ephareya sinnimwiiwelela”.+