Hagayo
2 Nihiku 21 na mweeri wa neethanu nenli, profeta Hagayo+ aahisuwelihiwa moolumo yaakhuma wa Yehova, yaahimya wiira: 2 “Xontte, mmukohe kuvernatoro a oYuda+ Zorobabeli+ mwaana a Salathiyeli, vamosa ni namukuttho muulupale Yooxuuwa,+ mwaana a Yehosadaki,+ ni atthu akina wiira: 3 ‘Niireke ookhala eriyari anyu otonko oweha moota empa* ela yaari aya yoovuwa khalai?+ Vano munoona sai makhalelo aya? Khamunoona wiira ti yoohisuwanyeya nalikanyiha ni moota yaari aya yoovuwa?’+
4 “‘Masi vano, Yehova onihimya wiira, nyuwo Zorobabeli vamosa ni nyuwo namukuttho muulupale Yooxuuwa, mwaana a Yehosadaki, mulipase murima’.
“Yehova onihimya wiira: ‘Nyuwo atthu ootheene a elapo ela, mulipe murima,+ ni nvareke muteko’.
“‘Tthiri miyo kiri ni nyuwo’.+ Yehova a anakhotto tonihimya. 5 ‘Muhiliyale etthu kooleihenryaakani okathi mwaakhumme anyu wExiitu,+ ni wiira ikuru saka siri ni nyuwo.+ Nto muhoove etthu’”.+
6 “Etthu onihimya awe Yehova a anakhotto, tiila: ‘Nave-tho, kinootthikela-tho othukumeliha erimu, elapo, ephareya ni etthaya’.+
7 “‘Kinoothukumeliha maloko ootheene, nave itthu sootheene sa efaita sa maloko ootheene sinooroihiwa empa ela,+ nto kinoosariha ovuwa empa ela’.+ Yehova a anakhotto tonihimya.
8 “‘Eparatha ti yawaka, nave eweero ti yawaka’. Yehova a anakhotto tonihimya.
9 “‘Empa ela enrowa okhala yootepa ovuwa ovikana khalai’.+ Yehova a anakhotto tonihimya.
“‘Nave kinookhaliha murettele opuro ola’.+ Yehova a anakhotto tonihimya”.
10 Nihiku 24 na mweeri wa neethanu neexexe, eyaakha ya nenli ya Dario, Yehova aahimuleela profeta Hagayo+ moolumo yaahimya wiira: 11 “Etthu onihimya awe Yehova a anakhotto, tiila: ‘Xontte, mwaakohe anamukuttho etthu nlamulo ninhimya aya:+ 12 “Akhala wiira mutthu onookuxa enama yooreerihiwa vakuwoni vawe, nto ekuwo eyo enakwata ephaawu, muhusi, eviinyu, makhura aahiiso khula etthu enilyiwa, niireke itthu iyo sinookhala sooreerihiwa?”’”
Anamukuttho yaahaakhula wiira : “Nnaari!”
13 Hagayo aahikoha wiira: “Ankhi soolya iyo sakwatiwa ni mutthu ori oohiloka mwaha wa ovara murutthu, niireke sinookhala soohiloka?”+
Anamukuttho yaahaakhula wiira: “Aayo, sinookhala soohiloka”.
14 Vano Hagayo aahihimya wiira: “Yehova onihimya wiira: ‘Ti siiso siri aya atthu ala, nave ti siiso siri aya nloko nla ohoolo waka, nave ti siiso siri aya miteko sootheene anivara aya, khula etthu aniruuha aya-mu ti yoohiloka’.
15 “‘Masi vano, xontte, okhuma olelo orowa ohoolo, nwehaweheke, etthu ela: itthu saari sai nihinatthi opwehiwa nluku vasulu va nluku nikhwaaya, mutemplo mwa Yehova?+ 16 Okathi mutthu aarowa awe omwaako saaliwa ipyo, olipelelaka wiira aarowa ophwanya miphimo 20, aaphwanya miphimo 10. Okathi mutthu aarowa awe nipuro oninyakattiwa ewuuva wiira akumihe miphimo 50 sa eviinyu, aaphwanya miphimo 20.+ 17 Miyo kaahihonona miteko sootheene mwaavara anyu, kaahookumiheryani oviha vanceene, eyuutte ni maralala,+ masi khuuvo nnakhala mmosa a nyuwo aakitthikenle’. Yehova tonihimya.
18 “‘Xontte, nwehaweheke etthu ela okhuma nihiku nla orowa ohoolo, eyo piiyo, okhuma nihiku 24 na mweeri wa neethanu neexexe, nihiku apakiwe aya alisenso a etemplo ya Yehova,+ nwehaweheke oratteene etthu ela: 19 Niireke sookhala ipyo opuro onisukiwa aya?+ Kiira mwiri wa ewuuva, mwiri wa efiiku, mwiri wa muhokorokho oniihaniwa roma ni mwiri wa olivera khoniima mihokorokho? Okhuma olelo vaava, kinimooreelihani’”.+
20 Nto Yehova aahimuleela Hagayo ekwaha ya nenli, nihiku 24 na mweeri owo,+ moolumo yaahimya wiira: 21 “Mmuleele Zorobabeli, kuvernatoro a oYuda wiira: ‘Miyo kinoothukumeliha erimu ni elapo.+ 22 Kinoopwetexa ehice ya omwene wootheene ni kinoomala-maliha ikuru sa maloko ootheene.+ Kinoopwetexa ikaaro sa ekhotto ni ale aneettiha ikaaro iyo, ikhavalo ni anakhavalo aya animwiiviwa, khula mmosa ni espaata ya munnawe’”.+
23 “Yehova a anakhotto, aayo, Yehova, onihimya wiira: ‘Nihiku nlo, kinimookuxani nyuwo murumeyi aka Zorobabeli,+ mwaana a Salathiyeli.+ Nave kinimookhalihani ntoko anela a eseelu, okhala wiira kihoothanlani’. Yehova a anakhotto tonihimya”.